Kada bulawanna Raja Sulaiman
10
Susi tee to sininna kada bulawanna Raja Sulaiman:Ia to pea macca, napumario tomatuanna,
apa ia to pea battuk, ssussairi indo ambe'na.
2 Ia to kasugiran diala majekkong te'da bua'na,
apa ia to tomaruruh penawa dipasalama' jio mai kamatean.
3 Te'da Naeloranni Puang Allataala kakurangan kande to tomakassing,
apa ia to nakadoangngi togaja' sipa'na, te'da Nabenni.
4 Ia to tomakuttu la kaasi-asi,
apa ia to tobassa' la buda assele'na.
5 Melo pangpikkirisanna to torrempun assele' peparena ke wattunnami peparean,
apa ia to tomamma' bang ke wattu pepareanni, mpakasiri' kalena.
6 Dibarakka'i to tomakassing,
apa ia to kadanna togaja' sipa'na, naniri mbuni kamaparranganna.
7 Napubarakka' tau ke nningaranni tomakassing,
apa ia to togaja' sipa'na te'damo nadiingaran.
8 Ia to tomacca ntarima melo pangpakainga',
apa ia to tomangkada tangkebattuan la masolang.
9 Ia to tomaruruh penawanna manyaman katuoanna,
apa ia to tomajekkong, nang la kaissenan to kamajekkonganna.
10 Inda to mangkidi' mata la mpaden kamasussan,
ia to tomangkada tangkebattuan la masolang.
11 Ia to kadanna tomakassing butung kalimbuah mepatuo,
apa ia to kadanna togaja' sipa'na, naniri mbuni kamaparranganna.
12 aIa to tongkaba'ci padanna rupa tau mpaden kasisakkan,
apa ia to tompakamoja' padanna rupa tau ndampangan sininna kasalan.
13 Ia to tomapahang mpau kada macca,
apa ia to tote'da akkalanna perambira dipatajananni.
14 Ia to tomacca nakabudai ke sabuda-budannai kapaissenanna,
apa ia to kadanna tobango' la mparaturi kamacilakan.
15 Ewanan to butung napubenteng tosugih
na kamakario-rioan llanynya'i tokaasi-asi.
16 Ia to sarona tomakassing mpamanyaman katuoan,
apa ia to naduppa to togaja' sipa'na, sabuda-budanna dosana.
17 Inda-inda to mparinawa pangpangngajah mangnguju lakoi katuoan melo,
apa inda-inda cia' mpuinawa pangpakainga' lao salai.
18 Pangnguraga to tompallan penawa bang kamaba'cian,
tobattuk to tompau gaja' bang tau.
19 Sabuda-budannai kada dipau, nang la den bang salana,
apa mandalan pangtangngaranna to tomangpikkiri' jolo' namane' mangkada.
20 Ia to kadanna to tomakassing butung pera' massang,
apa ia to assele' pangpikkirisanna togaja' sipa'na te'da bua'na.
21 Ia to kadanna tomakassing
menjaji barakka' lako tobuda,
apa ia to kabangosanna tobango'
mbawai lako kamatean.
22 Barakka'-Na Puang Allataala namessugih to tau,
tangngia kamawatangan mangjama mpupembuda ewanan.
23 Ia to tobattuk nakabudai mpugauk kasalan,
apa ia to tomapahang nakabudai nnangah kamaccan.
24 Ia to nakalaja'na to togaja' sipa'na ia ora naduppa,
na ia to tomakassing, natarima to nakadoangngi.
25 Ia ke naratuii angin bara' ta'pa lanynya'i to togaja' sipa'na,
apa te'da lalo natigesu' to tomakassing.
26 Danggi' sua tomakuttu, saba' mekani-kanianri,
susi cukka mpamangngilu isi,
ba'tu rambu mpamapasse mata.
27 Ngkalaja' ngkasiri' Puang Allataala mpamalambeh sunga',
apa ia to togaja' sipa'na, dipebondi'i sunga'na.
28 Ia to narannuan tomakassing, la napumasannang,
apa ia to togaja' sipa'na parannu lo'bang.
29 Nalendungngi Puang Allataala to tomaruruh penawanna,
apa Nalanynya'i to togaja' sipa'na.
30 Ia to tomakassing la tatta' torro manyaman,
apa ia to togaja' sipa'na, la diula'i llan mai tana manahna.
31 Ia to tomakassing mpau kada mepamacca,
apa ia to pangnguraga la dikerre'i lilana.
32 Ia to tomakassing naissen mpau kada mangkebattuan to napumasannang tau,
apa ia to togaja' sipa'na pangnguraga manda jio timunna.