Daud rrarii to-Amalek
30
Tallung alloi Daud sola taunna lumingka nadeteq kota Ziklag. Na mangkami nararii to-Amalek to tana Negeb sola kota Ziklag, nataloi to kota Ziklag nasumpunni.a 2 Malemi to-Amalek ssalaii joo kota, nabawa ngasanni to tau llan, la baine la muane, la tomatua la pea, na teqda lalo napatei. 3 Ia tonna ratumo Daud sola taunna lako kota Ziklag, nakitai to kota cappuqmi disumpun. Na ia to bainena sola anakkana Daud nabawami to-Amalek, moi bainena sola anakkana taunna Daud nabawa too. 4 Iamo nagaja masse Daud sola taunna na sigasaq tongan kumarrak arannai tangnakullemi kumarrak. 5 Nabawa tooi to-Amalek to dua bainena Daud, iamo to Ahinoam to-Yizreel sola Abigail to-Karmel pura bainena Nabal. 6 Gaja sussai Daud la nasilekkoqi batu tentarana, sabaq gaja paqdikki penawanna, sabaq male ngasanni dibawa to anakkana la muane la baine. Apa tattaqi Daud mangrannuan lako PUANG Allataala to nasompa. 7 Nakuamo Daud lako Imang Abyatar anakkana Ahimelekh, <<Bawai mai tuu baju Efod.>> Nabenmi Imang Abyatar.b 8 Mekutanami Daud lako PUANG Allataala nakua, <<La kuulaqrika joo parampoq? La kudeteq unarika?>> Nakuamo Puang Allataala, <<Malemoko nnulaqi, nang la mudeteqna, mupasalamaqi to tau nabawa.>>9-10 Malemi Daud sola annan ratuh tentarana, naratu lako Saqdan Besor. Apa napatorroi Daud to taunna dua ratuh, sabaq gaja boqjoqmi na tangnakullemi llambanni saqdan. Napatarruhhi Daud mangngulaq sola taunna pataratuh.
11 Sitammumi mesaq to-Mesir to taunna Daud jio padang pallawangan, nasolanni lako Daud. Namaneq mbenni roti sola wai diisoq, 12 naben tooi baqtu pira-pira bua ara dipekasei na dua dampoq kismis. Ia tonna mangkamo kumande sola mangngisoq joo to-Mesir memmawatang poleqmi, sabaq tallung allo tallung bongimi tangkumande tangmangngisoq. 13 Mangkai joo too mekutanami Daud nakua, <<Indara puangmu na topole umboroko?>> Mebalii nakua, <<Mesaqnaq kallolo jio mai tana Mesir, napukaunannaq to-Amalek. Apa nasalainaq puangkuq ntallung bongiq, sabaq masakinaq. 14 Mangkami kirarii to tana Negeb, to nanii torro to-Kreti loqna liu tana Yehuda, na tana Negeb tanana to-Yehuda, na tana Negeb to nanii torro batiqna Kaleb. Ia to kota Ziklag mangka toomi kirarii, na cappuqmi kisumpun.>>
15 Nakutanaimi Daud nakua, <<Madoangrokoka male mpakitannaq umbo naola joo parampoq?>> Mebalii nakua, <<Massumpakiq mpau sangan-Na Puang Allataala kumua, teqda talampateinaq baqtu danggiq tasuanaq pole lako puangkuq, kumaneq male mpakitankiq umbo naola joo parampoq.>> 16 Malemi mpakitanni Daud sola taunna to nanii joo parampoq. Nakitai titawa-tawa jio ntuu jio ngenan joo parampoq, mukkun kumande-mande sola mangngisoq-isoq mangmaroah-roah, sabaq buda asseleq narampa jio mai to-Filistin sola to-Yehuda.
17 Masawanna melambikki Daud male rrarii to-Amalek ratu lako kabuh allo, nataloi. Denra pataratuh kallolo to laqpah namale mpalaian kalena ssakei unta. 18 Naala poleqi Daud to sininna apa narampa to-Amalek, napasalamaq tooi Daud to bainena dua. 19 Teqda lalo taqde la tomatua la tomalolleq, la pea muane, la pea baine. Jaji napapole ngasanmi Daud to repokkona, na sininna kasugiranna to narampa to-Amalek naala poleqi Daud. 20 Naala ngasanni Daud to beke sola sapinna to-Amalek. Napajoloi to patuoan narampa naundi to taunna Daud rrewai jio mai bokoq, napada kumua, <<Pangrampana Daud tee.>>
21 Ratumi Daud lako randan Saqdan Besor to nanii mpatorro taunna dua ratuh to boqjoqmo. Malemi joo todipatorro ntammui Daud sola to tonasolan male nnulaq to-Amalek. Napendeppeqi Daud nakutanaii nakua, <<Malagah-lagah unara kamuqka?>> 22 Apa denni to tonasolan Daud male parari, masaqgaq na tangmelo penawanna, mangkada nakua, <<Ia to teqda namale parari, danggiqmo nadiben pangrampataq, akeqmo malaii sola anakkana na bainena.>> 23 Apa nakua Daud, <<Ee sileqtokuq, danggiq mipasusi joo to apa Nabenkiq PUANG Allataala, sabaq mangkamikiq Nalendungngi, Nabenkiq kapataloan nnewai joo parampoq to rrariikiq. 24 Moi mesaq tau teqda nawaqding ssitujuii joo akkattana. La ditawa rampaqri naketawa ngasan to tau. La to torro mangngampa barang, la malena parari, teqda dipasilaenan.>> 25 Mangpamula joo wattu ratu lako too allo, napattantui Daud menjaji atoran lako to-Israel.
26 Ia tonna ratumo Daud lako kota Ziklag, nakiringngi piraq to apa narampa lako tomatua-tua to-Yehuda to napusobaq, napasanni kumua, <<Den tee asseleq pangrampakiq jio mai ewa-Na PUANG Allataala, kukiringankiq matiq.>>
27-31 Ia to tonakiringan iamo to tomatua-tua to-Yehuda jio kaparentan kota Betel, Rama-Negeb lloqna liu tana Yehuda, Yatir, Aroer, Sifmot, Estemoa, Rakhal, sola sininna kotana to-Yerahmeel, sininna kotana to-Keni, sininna kotana to-Horma, Bor-Asan, Atakh na Hebron. Sininna kota to pura nanii Daud sola taunna male mellele-lele nakiringan tooi asseleq pangrampa.