Ciaqi to-Filistin ke malei sola Daud parari
29
Sirempunni to sininna tentarana to-Filistin jio kota Afek, na ia to to-Israel mpakeqdeh tendana jio kota Yizreel siandah mata wai. 2 Malemi to lima rajana to-Filistin mangbarisiq sola tentarana. Den to sisaratuh sangtorroan na den too to sisangsaqbu. Na ia to Raja Akhis sola Daud na tentarana mangbarisiq jio bokoq. 3 Nakuamo panglima tentarana to-Filistin, <<Apara tujunna tuu matiq to-Ibrani ntee?>> Mebalii Raja Akhis nakua, <<Ia tee Daud pangjamana Raja Saul rajana to-Israel baqtu piran, la duang taunmi kusolan. Pamula kusolan ratu lako too allo teqda mammo kukitai mpugauk kasalan.>>4 Apa mabirihhi to panglima tentarana to-Filistin lako Raja Akhis nakua, <<Suai tuu Daud pole lako kampong to tabenni. Danggiq tamale parari sola. Iamo dau ke mukkunkiq parari, nabalik nnewakiq. Waqding bangngi mpatei surudaduntaq, la mpamasannang Saul rajana. 5 Na iamo tee Daud to napanggelluq-gelluran baine namakkelong sibali-bali nakua,
Raja Saul ntaloi massaqbu-saqbu ewana,
apa Daud ntaloi ewana mangpulo-pulo saqbu.>>a
6 Natambaimi Raja Akhis to Daud nakuanni, <<Massumpanaq mpau sangan-Na PUANG Allataala to tuo kumua tomaruruh penawammu. Na kusanga melo ke malekiq sola parari, sabaq simulammu ratu lako akuq ratu lako too allo teqda lalo kukitako mpugauk kagajatan. Apa teqda nakabudaiko rajana to-Filistin laenna. 7 Iamo joo polemoko, tapada salamaq! Danggiq mupugauk apa to la napumabirih rajana to-Filistin.>>
8 Apa nakua Daud lako Raja Akhis, <<Apamora kasalan to kupugauk tee akuq kaunantaq? Na kitaq una mpaui kumua sipamulanaq tapukaunan ratu lako too allo, teqdapa kasalan kupugauk. Ciapari nateqda kudieloran male rrari ewataq puang?>> 9 Nakuamo Raja Akhis lako Daud, <<Kuissen kumua tomakassingko butung to-Nasua Puang Allataala. Apa panglima tentarana to-Filistin mangkada kumua, <Teqda tawaqding male parari sola.> 10 Iamo joo polemoko sola tau to mangka mpangjaman Raja Saul tonna tee. Ianna mariwangmo manikaleq, madoiqmo kamuq pole lako kota to mangka kuben kamuq.>>
11 Masawanna joo too melambikmi Daud sola taunna miqcok napole lako tana Filistin, na ia to to-Filistin male lako kota Yizreel la parari.