Raja Saul jio En-Dor
28
Baqtu pira-pira masainna tonna jio kaparentanna Raja Akhis to Daud, sadia omi to tentara to-Filistin la rrarii to-Israel. Nakuamo Raja Akhis lako Daud, <<La mupahang rampaq kumua la malekiq sola taummu parari.>> 2 Mebalii Daud nakua, <<Tantu kupahang, na la takita to la kupugauk tee akuq kaunantaq.>> Nakuamo Raja Akhis lako Daud, <<Melomi! La kuangkaqko pangtakinkuq angge tuomu.>>Raja Saul male lako baine macca sipangkada bombo
3 Masainmo mangkanna mate Nabi Samuel, to nabatingngi to-Israel, to dilamun jio kota Rama kampongna.a Na ia to topakita-kita sola tomacca sipangkada bombo, mangka naulaqi ngasan Raja Saul llan mai tana Israel.
4 Sirempunmi to tentarana to-Filistin namale lako kota Sunem namangtenda jio. Napasirempun todami Raja Saul to to-Israel namale lako Buntu Gilboa namangtenda jio. 5 Ia tonna kitai Raja Saul to tentarana to-Filistin, mangbede-bedei babaraqna malajaq. 6 Metaqdai pangpatuju Raja Saul lako PUANG Allataala, apa teqda Napebalii, la llan tindo baqtu mpake batu Urimb iarika nnolai nabi.c 7 Nakuamo Raja Saul lako pangjamana, <<Angarannaq mesaq baine to macca sipangkada bombo, kumale ssikitanni kupetaqda pangpatuju.>> Mebalii pangjamana nakua, <<Den mesaq baine jio kota En-Dor macca sipangkada bombo.>>
8 Mpakemi baju biasa Raja Saul dikua danggiq naperupai tau namale sola dua pangjamana. Ia tonna bongimo, tonna ratumo lako bolana joo baine nakuamo Raja Saul, <<Tambannaq bombona tee tomate kupau sanganna, napauannaq to la jaji.>> 9 Apa mebalii joo baine nakua, <<Tantu taissen kumua mangka ngasanmi naulaqi Raja Saul to sininna topakita-kita sola tomacca sipangkada bombo. Ciapari taangarannaq poja kamatean?>> 10 Massumpami Raja Saul nakua, <<Mpaunaq sangan-Na PUANG Allataala to tuo kumua, teqdara muladisessa ke mupugaukki.>> 11 Mekutanami joo baine nakua, <<Indara sanganna to tomate la kutambai bombona?>> Mebalii Raja Saul nakua, <<Nabi Samuel.>> 12 Ia tonna kitai joo baine to bombona Nabi Samuel, meolii. Nakuamo lako Raja Saul, <<Ciapari tauraganaq? Kitaq paleq Raja Saul.>> 13 Nakuamo Raja Saul, <<Danggiq malajaq! Apara to mukita?>> Mebalii joo baine nakua, <<Ngkitanaq dewata endek jiong mai lino tomate.>> 14 Nakutanai omi joo baine nakua, <<Umbo susi rupanna?>> Mebalii joo baine nakua, <<Den mesaq tomatua muane endek mangpakean lando.>> Naissen Raja Saul kumua Nabi Samuel joo nasanga, nasujuq doq litak ssompai.
15 Mangkai joo too mangkadami Nabi Samuel lako Raja Saul nakua, <<Ciapari muremakkinaq, mupangpetambannaq?>> Nakuamo Raja Saul, <<Gaja sussanaq sabaq la nararinaq to-Filistin, na Napabokoiqmoq penawa Puang Allataala. Teqdamo Napebaliinaq la llan tindo iarika nnolai nabi. Iamo joo kupangpetambankiq, tapauannaq apa to la kupugauk.>> 16 Nakuamo Nabi Samuel, <<Apapara buaqna mutambainaq? Napabokoqimoko penawa PUANG Allataala, ewa-Namoko. 17 Napugaukmi PUANG Allataala to kadan-Na to mangka kupauanko kumua, Naalaimoko to kaparentanmu Nabenni Daud.d 18 Napugaukki PUANG Allataala susi joo lako iko too, sabaq teqda mupugaukki to parenta-Na PUANG Allataala, nateqda mulanynyaqi to to-Amalek sola sininna apanna.e 19 La Nasorongmoko PUANG Allataala na sininna to-Israel sola surudadummu lako to-Filistin masawa, mumate sola anakkamu tapada jiong lino tomate.>> 20 Gaja lajaqi Raja Saul, nataqpa songka doq litak tonna saqdingngi joo kadanna Nabi Samuel. Umbopi sangngallo sangbongimi tangkumande namalamma kalena. 21 Mendeppeqmi joo baine lako Raja Saul nakitai kumua liwaq lajaqi, namangkada kumua, <<Takitamo puang, sakuturuqna bang to petaqdantaq, na teqdamo kujampang sungaqkuq. 22 Iamo joo metaqdanaq tapesaqdingngi todai tee petaqdanna kaunantaq. La kupasadiankiq kande takandei ciqdiq, tamawatang poleq mpatarruh kalingkantaq.>> 23 Apa ciaqi Raja Saul nakua, <<Teqda kulakumande.>> Apa naparukui pangjamana sola joo baine, arannai madoang kumande. Keqdehmi, nacumadokko jao katindoan. 24 Den anak sapinna maloppo jio bolana joo baine naalai nagereqi nakasaraii, nnala tooi taqpung nakabuaqi roti tangmpake ragi natunui. 25 Napalennaqmi joo kande jio olona Raja Saul sola jio olona dua pangjamana, nakumande. Ia bang unamo joo bongi nataqpa pole Raja Saul sola pangjamana.