Daud torro jio tanana to-Filistin
27
Apa napikkiriqi Daud kumua, <<Moi umbo susi nang la den wattu napateinaq Raja Saul. Jaji laqbiranmo ke palainaq lako bangsa Filistin. Ia ke jiomoq kotana to-Filistin, salamaqmoq, sabaq nang la pajai nnangahnaq indeq tana Israel.>> 2 Malemi sola taunna annan ratuhna sikita sala mesaqna raja to-Filistin disanga Akhis anakkana Maokh to mangparenta jio kota Gat. 3 Torromi jio sola taunna na pada ssolan repokkona jio kota Gat. Nasolan tooi Daud to dua bainena iamo to Ahinoam to-Yizreel, na Abigail to-Karmel pura bainena Nabal. 4 Ia tonna issenmi Raja Saul kumua palai lakoi kota Gat to Daud, teqdamo namadoang male nnulaqi.5 Nakuamo Daud lako Raja Akhis, <<Ia ke waqdingngi takamaseinaq tabennaq mesaq kota biccuq umbo-umbonna bangmo jio salean kota, danggiq kimentoratu tarruh bang llan ntee kota karajaantaq!>> 6 Nabenmi Raja Akhis to kota Ziklag. Iamo joo naratu lako too allo ia to kota Ziklag napupadang sininna rajana to-Yehuda. 7 Sangpulo annanni bulanna Daud torro jio tanana to-Filistin.
8 Pada masainna joo nanii Daud tuli male sola taunna rrarii to-Gesur, to-Girzi, na to-Amalek, bangsa to masainmo ntorroi joo tana Syur ratu lako tana Mesir. 9 Ia ke nararii Daud joo kota, teqda mesaq tau naajan la muane la baine. Narampa tooi to sininna to napusugih susinna dombana, bekena, sapinna, keledainna, untana sola sininna pakeanna, namaneq pole mangngolo lako Raja Akhis. 10 Ia ke nakutanaii Raja Akhis kumua, <<Umbora minii parari tee allo?>> Mebalii Daud nakua, <<Malekan sauq Negeb kampongna to-Yehuda,>> baqtu nakua, <<Tana Negeb kampongna to-Yerahmeel,>> baqtu, <<Tana Negeb kampongna to-Keni.>> 11 Teqda bang moi mesaq tau naajan tuo la muane la baine, sabaq nakua llan penawanna, <<Iamo dau ke denni teqda nadipatei namale mangpeasa lako to-Gat apa to napugauk Daud sola taunna.>> Susimi joo napugauk Daud sola taunna tonna torro jio kampongna to-Filistin. 12 Apa nakatappaqi Raja Akhis to Daud, na nakua llan penawanna, <<Nang la liwaqmi nakabaqci bangsana, napubuaq panggaukanna, iamo joo nang la kupukaunanmi angge tuona.>>