Penduanmi Daud teqda namadoang mpatei Raja Saul
26
Den wattu naratu to to-Zifi sikita Raja Saul jio kota Gibea napauanni kumua, jaoi Buntu Hakhila jio randan padang pallawangan Yehuda Daud membuni.a 2 Taqpa malemi doq padang makase Zif Raja Saul sola tallungsaqbu tentara to sigaja barani nnangah Daud. 3 Mpakeqdehmi tendana Raja Saul jao membuntu-buntunna Hakhila jio randan lalan padang pallawangan, apa ia to Daud jioi padang makase. Ia tonna issenni Daud kumua naulaqi Raja Saul ratu lako padang makase, 4 nasuami to taunna male mmata-mataii naissenmi kumua ratu tonganni to Raja Saul. 5 Taqpa malemi Daud lako to nanii Raja Saul mangbongi sola tentarana. Nakitai to nanii mammaq Raja Saul siandah Abner anakkana Ner, komandan tentarana. Ia to raja llanni tangnga mammaq natalimbung tentarana. 6 Nakuamo Daud lako Ahimelekh to-Het sola lako Abisai sileqtona Yoab anakkana Zeruyab nakua, <<Indannara kamuq sola dua la kusolan male doq to nanii mangbongi Raja Saul sola tentarana?>> Mebalii Abisai nakua, <<Akuqmo tasolan.>>7 Ia tonna bongimo male bunimi Daud sola Abisai lako ntuu joo nanii mangbongi tentarana Raja Saul, nakitai to Raja Saul sola Abner mammaq, natalimbung tentarana. Na ia to dokena Raja Saul napennosokan jio siandah ulunna. 8 Nakuamo Abisai lako Daud, <<Iamo tee bongi to wattu Nabenkiq Puang Allataala mpabalahhi ewataq. Taelorannaq mpissennii kupasilammak dokena doq litak, danggiq omo napenduan.>> 9 Apa mebalii Daud nakua, <<Danggiq mupateii! Nang la disessa to tompataqpai lima raja to Napilei PUANG Allataala.>> 10 Nakuapa Daud, <<Mpaunaq sangan-Na PUANG Allataala to tuo, PUANG Allataala Ia la mpatei Raja Saul, mate nadeteqmiraka wattunna, iarika mate pararii. 11 Dennaa upaq Napamabelai PUANG Allataala jio mai kalekuq to mpataqpai lima raja Napilei PUANG Allataala! Ia bangmo ala joo dokena sola ngenan wainna siandah ulunna, tapole.>> 12 Naalami Daud joo doke sola ngenan wai jio toq ulunna Raja Saul, namale sola Abisai. Teqda bang tau ngkitai sola nnissenni, na teqda bangngi pasaqding, sanga Napamanyaman PUANG Allataala mammaqna sola ngasan.
13 Ia tonna ratumo Daud lian sambaliqna lombok nasiallaqi Raja Saul, malemi deq botto membuntunna keqdeh, namabela jio mai Raja Saul. 14 Metambami Daud lako tentarana Raja Saul sola lako Abner anakkana Ner nakua, <<Ee Abner musaqding unaraka to gamarangkuq?>> Mebalii Abner nakua, <<Indaroko tuu metamba-tamba ntarui raja?>> 15 Nakuamo Daud lako Abner, <<Kusanga ssangako kalemu muane, na teqda tau ssusianko barani jio Israel. Ciapari na teqda mujagaii to rajamu? Maneq silalona den tau ratu la mpateii! 16 Teqda iko mubarakkan meloi tuu jamanmu Abner. Mpaunaq sangan-Na PUANG Allataala to tuo kumua, nang la mateko sola tentara laenna Raja Saul, sabaq teqda mijagai rampaqi to raja Napilei PUANG Allataala. Kitai kee umbomira to dokena sola ngenan wainna rajamu jio siandah ulunna?>>
17 Napegamara Raja Saul to Daud namekutana nakua, <<Ee, ikoraka tuu anakkuq Daud?>> Mebalii Daud nakua, <<Ieq, akuq puang.>> 18 Nakua omo Daud, <<Ciapari tamukkun bangra nnulaqnaq tee akuq kaunantaq? Apamora panggaukan gajaq kupugauk? 19 Tabeq puang, tapesaqdingngipi tee kadangkuq. Ia ke PUANG Allataala ssuakiq nnewanaq, maqnamo na karoba kupassompan to mpapajai to kamagallian-Na lako tee kaunantaq. Apa ia ke tolinora rrasikiq, akeq Natampakki ropu PUANG Allataala! Sabaq panggaukanna to tau kudiulaqi llan mai tana-Na PUANG Allataala, kupusabaqi male lako padangna to tossompa dewata. 20 Danggiq taeloranni tee kaunantaq mate jio padangna tau to mabela jio mai to dinii massompa lako PUANG Allataala. Sitonganna raturikiq la mpateinaq susi to ntiqde kutu, taulaq melakonaq susi to tonnulaq manuk lampung ntuu deq buntu.>> 21 Nakuamo Raja Saul, <<Ee anakkuq Daud, madosamoq lako iko! Polemoko, teqdamo kulassolangngiko, sabaq liwaq muanggaq to sungaqkuq na teqda mupateinaq pubongiq. Gaja bangoqnaq mangpanggaukan, nang salamoq.>> 22 Mebalii Daud nakua, <<Indeqi to doketaq puang! Tasuami mesaq tauntaq male mai nnalai. 23 Nabarakkaqi PUANG Allataala to todaqtan melo sola maruruh penawanna, sabaq sitonganna Nasorongmikiq PUANG Allataala tama limangkuq too allo, apa ciaqnaq mpataqpai lima puangkuq, raja to Napilei PUANG Allataala. 24 Susi sungaqtaq liwaq keanggaq lako akuq too allo na teqda kupateikiq, susi toomi joo kurannuan makeanggaq jio olo-Na PUANG Allataala to sungaqkuq Nalendungnginaq Napasalamaqnaq jio mai sininna abalaq.>>
25 Nakuamo Raja Saul lako Daud, <<Ee anakkuq, dennaa upaq Nabarakkaqiko Puang Allataala. Sininna to mupugauk nang la keasseleq melo.>> Malemi Daud mpatarruh kalingkanna, napole Raja Saul lako bolana.