Kamateanna Nabi Samuel nabatingngi to-Israel
25
Ia tonna mate Nabi Samuel, sirempunmi sininna to-Israel mbatingngii, namaneq lamunni siandah bolana jio kota Rama. Mangkai joo too, malemi Daud lako padang makase Paran.Daud sola Abigail
2-3 Den mesaq muane batiqna Kaleb disanga Nabal jio kota Maon, nnampui padang pangrewan siandah kota Karmel. Gaja sugihhi nnampui tallungsaqbu domba na sangsaqbu beke. Ia to bainena disanga Abigail. Ia joo Abigail malolo na melo pikkirisanna, apa ia to Nabal tomaparrang na gajaq panggaukanna.
Den wattu nanggoncingngi bulu dombana Nabal jio kota Karmel. 4 Ia joo wattu jioi padang makase Daud. Ia tonna saqdingngi kumua nggoncingngii bulu dombana Nabal, 5 nasuami Daud to sangpulo taunna nakua, <<Male kamuq lako kota Karmel sikita Nabal. Paratuannaq sallangankuq kumua, 6 <Dennaa upaq tadibarakkaqi sola repokkotaq na sininna to tapuapa. 7 Ssaqdingnaq kareba kumua manggoncing bulu dombakiq. Ia to tomangrewataq to kisiandan jio padang Karmel teqda lalo kiapa-apai. Padai masainna jio teqda lalo naden apanna taqde. 8 Waqding tapekutanan lako tomangrewataq, tantu napauankiq. Sirumpai allo pangramean tee karatuanna taungkuq. Dennaa upaq nacanning atintaq mbenni to tapueloh jio kaletaq lako Daud anakkataq sola taunna.> >>
9 Ia tonna ratumo lako kota Karmel to taunna Daud, napaumi to pepasanna Daud lako Nabal, namangpeagi kumua la napebalii Nabal. 10 Apa mebalii Nabal lako taunna Daud nakua, <<Indara joo Daud, na indara joo anakkana Isai? Na teqda silaenanna kaunan laen to mpalaian kalena jio mai puangna. 11 Buaqraka kulannalai to roti kuampui, sola wai la kuisoq na patuoan to mangka kugeresan tomanggoncing bulu dombakuq, kubenni lako totangkutandai na teqda too kuissenni topole umbori ia?>>
12 Polemi to taunna Daud na ia tonna ratumo lako Daud, taqpa napau ngasanni to kadanna Nabal. 13 Nakuamo Daud lako taunna, <<Pada nnala kamuq laqboh landomi mitakinni!>> Pada sitakinmi laqboh landona. Naala todami Daud to laqboh landona natakinni. Agi-agi den pataratuh tau undi nturuq Daud, na dua ratuh to torro mangjaga.
14 Apa den mesaq kaunanna Nabal mpaui lako Abigail kumua, <<Teqdaparaka taissenni kumua, den taunna Daud ratu jio mai padang makase, nasua mparatu sallanganna lako puangkuq, apa kan ori nakada-kadai. 15 Nasitonganna gaja melo penawanna lako kamiq. Teqda naapa-apaikan ke liu lalankan jio to nanii, nateqda mammo apangkiq taqde tongkijio padang makase sola. 16 Allo bongikan najagai jio ngenan kinii rrewai beke sola dombakiq. 17 Iamo joo tapikkiriq meloi tapattantui apa to la tapugauk, sabaq mangngattai la ncilakai puangkuq sola sininna tau llan bolana. Na teqda tau ssarai ssipangkadanni to puangkuq, sabaq gaja parrangngi.>>
18 Taqpa naparri-parrimi Abigail nnala dua ratuh roti, dua sepuq kuliq naissii anggur, lima domba mangkamo ditunu, sangpulo pitu kilo gandum baqte, saratuh dampoq kismis, na dua ratuh lemong bua ara makase. Nasariqi napadeqi keledai. 19 Nakuamo lako kaunanna, <<Jolomo kamuq, kuundimora.>> Apa teqda napauanni to Nabal muanena to akkattana namale.
20 Malemi Abigail ssakei keledainna. Ia tonna solohmo jio lalan mellekko jio saqde buntu, sitammumi Daud tingngo jao mai buntu sola taunna. 21 Ia joo wattu mangnawa-nawai Daud nakua, <<Teqda buaqna kujagai to apanna joo tau jio padang makase, arannai moi mesaq teqda mammo taqde, sabaq napabalahhii kagajatan to kameloan kupugauk. 22 Nasessamoraq Puang Allataala iarika Napateinaq ke berremi allo na teqdapa kupatei ngasanni to sininna muane taunna Nabal.>>
23 Ia tonna sitammumo Abigail to Daud taqpa mellaomi jao mai keledainna, nasujuq ratu doq litak jio olona Daud. 24 Sujuqi jio toq ajena Daud namangkada nakua, <<Tabeq puang! Maqnamo na akuq dipasala joo panggaukanna balingkuq. Tapesaqdingngipi tee kadanna kaunantaq! 25 Danggiq tapesaqdingngi joo Nabal totangmebattuan, siolanan unami ia sanganna na panggaukan tangmebattuanna. Teqda kitaq kukitai to tauntaq tonna ratu, namale sikita Nabal. 26 Teqda Naelorankiq PUANG Allataala nacarepai rara to limantaq mpabalahhi baqtu mpatei tau. Iamo joo kumassumpa too jio olotaq mpau sangan-Na PUANG Allataala to tuo kumua, sininna ewataq to madoang ssolangngikiq, la susi katuoanna to la naperasai Nabal. 27 Dennaa upaq tatarimai tee apa kubawankiq tabenni tauntaq. 28 Addampanganni tee kaunantaq to tangmparinawakiq, na nang la Napupenjajikiq PUANG Allataala rajana to-Israel to mawatang, moi batiqtaq la menjaji raja, sabaq Napakekiq PUANG Allataala parari na teqda tapugauk kagajatan angge tuotaq. 29 Ia ke denni tau nnewakiq napateikiq, nang la manyaman to sungaqtaq llan ngenan dipasadian tomatappaq lako PUANG Allataala, to tasompa, apa ia to sungaqna ewataq dipellekkoran susi batu. 30 Ia ke Napugaukmi PUANG Allataala to kameloan mangka Najanji lako kitaq puangkuq, Naangkaqkiq menjaji rajana to-Israel, 31 teqda talamasse, sabaq teqdara tapapatean baqtu mangpabalahhi. Ianna barakkaqimikiq PUANG Allataala kameloan, ingaranni tee kaunantaq.>>
32 Nakuamo Daud lako Abigail, <<Dipakalaqbih to PUANG Allataala nasompa to-Israel, to ssuako mpessitammuinaq tee allo. 33 Liwaqko dipuji, sabaq madoiqko mapahang, iamo muanggainaq mpembalaran kalekuq na teqda kumale papatean. 34 Nang Puang Allataala nnanggainaq mpugauk kagajatan lako iko. Massumpanaq mpau sangan-Na PUANG Allataala to tuo, Puang Allataala to nasompa to-Israel kumua, ia kenna la teqda mutaqpa ratu mpessitammuinaq too, tantu teqdapa naberre allo masawa namate ngasanmo to sininna muane taunna Nabal.>> 35 Natarimai Daud joo nabenni Abigail namaneq ngkuanni, <<Danggiqmo mumalajaq, kutarimamo to petaqdammu na la kupugauk, polemoko lako bolamu.>>
36 Ia tonna ratumo Abigail lako bolana, mukkunni mangmaroah-roah to Nabal jio bolana susi pangmaroasanna raja. Gaja rioi to Nabal naliwaq malango. Iamo na teqda bang apa nacurita Abigail lako Nabal ratu lako makaleqna. 37 Apa ia tonna makaleqmo, matanami Nabal, nacuritanmi bainena to napugauk tonna male mpessitammui Daud. Taqpa nakannai saki jantung, namatoro kalena. 38 Den sangpulo allona mangkanna Nabal nakanna joo saki, Nakaqtuii Puang Allataala to sungaqna, namate.
39 Ia tonna saqdingngi Daud kumua matemi Nabal, nakuamo, <<Dipakalaqbih to PUANG Allataala, Ia kalenamo mpabalahhii to katangnaanggasankuq Nabal, Naanggainaq mpugauk kagajatan. Nasessami PUANG Allataala to Nabal, napubuaq panggaukan gajaqna.>> Mangkai joo too nasuami Daud to taunna male mangtoratu lako Abigail sabaq madoangngi Daud la mpubainei.
40 Ratumi to taunna Daud lako bolana Abigail jio kota Karmel namangkada nakua, <<Nasuakan puangkiq Daud ratu mangkada kumua madoangngi la ssibaliankiq.>>
41 Keqdehmi Abigail nasujuq ratu doq litak namangkada nakua, <<Sitonganna, akuq tee kaunannanaq puangkuq Daud, sadianaq la menjaji tomangbase ajena kaunanna puangkuq.>> 42 Naparri-parrimi Abigail mangpasadia, namale ssakei keledainna naundi lima kaunanna baine nturuqi. Malemi situruq kaunanna Daud. Napubainemi Daud.