Teqda napateii Daud to Raja Saul
24
Nasalaimi Daud joo ngenan namale lako En-Gedi, natorro llan loqkoq. 2 Ia tonna polemo Raja Saul rrarii to-Filistin napauanmi tau kumua, <<Jioi En-Gedi siandah padang makase to Daud.>> 3 Napileimi Raja Saul tallungsaqbu to tentara pangbarani to-Israel, nasolanni male nnangah Daud sola taunna jio kadellekanna Buntu Beke Pangngala.a 4 Ratumi Raja Saul lako ngenan nanii pira-pira bontong domba jio randan lalan. Den mesaq loqkoq jio nanii mentama Raja Saul mangcaqbean, na sirumpa toda Daud sola taunna membuni llan cappaqna joo loqkoq. 5 Nakuamo taunna Daud, <<Nadeteqmi wattunna! Tang-Nakuara Puang Allataala lako kitaq kumua, <Nang la Kusorong tama limammu to ewamu, pugaukmi to musanga melo.> >> Keqdehmi Daud namale paenaq-enaq ngkerreq randan baju landona Raja Saul. 6 Menassanmi Daud tonna mangka ngkerreq randan baju landona Raja Saul. 7 Mangkadami Daud lako taunna nakua, <<Dennaa upaq Napamabelai PUANG Allataala jio mai kalekuq la ncilakai rajakuq Saul to mangka Napilei. Teqda lalo kulampaqdikkii to raja Napilei PUANG Allataala!>> 8 Susimi joo Daud nnanggai taunna danggiq napateii to Raja Saul. Mangkai joo too malemi Raja Saul ssalaii joo loqkoq la mpatarruh kalingkanna.9 Taqpa messunmi Daud llan mai loqkoq nametamba jio bokoqna Raja Saul nakua, <<Puangkuq, raja!>> Messaile bokoqmi Raja Saul, nakitai to Daud sujuq doq litak ssompai. 10 Mangkadami Daud nakua, <<Ciapari tapesaqdingngi bangngi to tau mangkada kumua la kucilakaikiq? 11 Takitamo too kumua, Nasorongmikiq PUANG Allataala lako akuq. Na nasuamoq tau mpateikiq, apa teqda kumadoang, sabaq kupakamojaqkiq na kukua llan penawangkuq, teqda akuq kulampaqdikkii to rajakuq to mangka Napilei PUANG Allataala. 12 Takitai ambeq! Indeq to cappaq baju landotaq jio limangkuq. Sitonganna waqding bangnaq mpateikiq ke la madoangnaq, apa cappaq baju landotaq mandara kukerreqi. Iamo tanii nnissen kumua teqda kulancarepai limangkuq mpugauk kagajatan baqtu nnewakiq to la kupumadosa, moiraka tamukkun bang nnulaqnaq la tapatei. 13 Dennaa upaq na PUANG Allataala rraqtahhi indannarikiq to sala. Akeq na PUANG Allataala mpabalahhii to tapugauk lako tee akuq. Apa teqda akuq kulancilakaikiq. 14 Den kada tomatua-tua tonna anuq nakua, <Ia to panggaukan gajaq, togajaq mpugaukki,> apa ia tee limanna kaunantaq teqda nalancilakaikiq. 15 Indara to male bang nararii rajana to-Israel? Indara to taulaq male melako bang? Ia tee akuq toteqda anggaqkuq, susiraq mesaq asu mate, padaraq kutu.
16 Dennaa upaq na PUANG Allataala rraqtahhi to kara-karataq sola dua. Dennaa upaq Naparinawai Napangkadannaq, Naraqtahhi kumua teqda akuq kusala. Napasalamaqnaq jio mai kitaq.>>
17 Ia tonna mangkamo Daud mangkada susi joo lako Raja Saul, nakuamo Raja Saul, <<Ikoraka tuu Daud, anakkuq?>> Mangkai joo too napematonggoii gamaranna Raja Saul kumarrak. 18 Nakuamo Raja Saul lako Daud, <<Iko-iko to tongan, sabaq melo to mupugauk lako akuq, apa gajaq kupugauk lako iko. 19 Mupangpekitanmi too to kameloan penawammu lako akuq, sabaq moi Nasorongmoq PUANG Allataala lako iko, teqda mupateinaq. 20 Malla naden tau ke naattai to ewana nalallaqparanni, nasuai male. Dennaa upaq Nabarakkaqiko kameloan PUANG Allataala, susi to kameloan mupugauk lako akuq too allo. 21 Kukatappaqimi too kumua nang la iko menjaji rajana to-Israel, na ia to kaparentanmu nang la mawatang. 22 Iamo joo massumpamoko mpau sangan-Na PUANG Allataala kumua, teqda mulallanynyaqii to batiqkuq na teqda mulamputtaii to sangangkuq jio mai batiq ambeqkuq.>> 23 Massumpami Daud kumua la napugaukki susi joo. Mangkai joo too polemi Raja Saul lako bolana, napole Daud sola taunna lako loqkoq to nanii membuni.