Matei Raja Saul sola anakkana
(1 Tawarikh 10:1-12)
31
Sirarii to to-Filistin na to-Israel jao Buntu Gilboa. Gaja buda to-Israel dipatei, na ia to tuo unapa male mpalaian kalena. 2 Naulaq tarruhhi to-Filistin to Raja Saul sola anakkana. Nadeteqi to tallu anakkana Saul muane, iamo to Yonatan, Abinadab na Malkisua, napateii. 3 Liwaq melajatan joo rari naoloi Raja Saul, namandalan kojongna, sabaq buda panana ewana ngkannai. 4 Nakuamo Raja Saul lako pangtakinna, <<Nonokki tuu laqboh landomu mugajangnaq, danggiq naratu joo totangdisunnaq nnaqga-aqganaq, namaneq mpateinaq.>> Apa ciaqi joo pangtakinna Raja Saul, sabaq malajaqi. Naalami Raja Saul to laqboh landona napennosokanni, nampessongkan kalena lako joo laqboh lando. 5 Ia tonna kitai joo pangtakin kumua matei Raja Saul, mpessongkan todami kalena lako laqboh landona, natossokki namate toda jio saqdena Raja Saul. 6 Susimi joo to kamateanna Raja Saul joo allo sola tallu anakkana muane, na pangtakinna sola tentarana. 7 Ia to to-Israel torro sambaliq Lombok Yizreel sola sambaliqna Saqdan Yordan sipalaianni ssalai kotana, sabaq nakitai kumua sipalaianmi to tentarana, na mate toomi to Raja Saul sola tallu anakkana muane. Ratumi to to-Filistin nnii torro to kotana to-Israel.8 Masawanna ratumi to to-Filistin rrampai to apanna to tomatemo, nakitai to Raja Saul sola anakkana silentenan mate jao Gilboa. 9 Nataqtakkii to ulunna Raja Saul naalaii to parewa napake parari, nasuai to pira-pira tau male llilingngi kota Filistin, mpaui joo kareba lako dewata sola lako tobuda. 10 Mangkai joo too naannai llan bola dewata Asytoret to parewa napake Raja Saul parari, natokeqi jio temboq kota Bet-Sean to batang rabukkuna.
11 Ia tonna saqdingngi to-Yabesh-Gilead to apa napugauk to-Filistin lako Raja Saul, 12 malemi to tentara pangbarani lumingka siupuh bongi nnalai to batang rabukkuna Raja Saul sola anakkana jio temboq kota Bet-Sean. Napole mbawai lako kota Yabesh natunui.a 13 Narempun ngasanni to bukunna nalamunni jiong toq garontoq tamariska jio kota Yabesh, napuasa to tau pitung allo.