Daud membuni llan loqkoq siandah kota Adulam
22
Nasalaimi Daud to kota Gat namale membuni lako loqkoq siandah kota Adulam. Ia tonna issenni sininna sileqtona sola keluargana, malemi mpessitammui Daud.a 2 Ia to tomperasai mangrupa-rupa parriq sola to tonaulaq melako tompaindannii, na tomapaqdik penawa pada ratu menturuq lako Daud agi-agi den pata ratuh tau. Na Daud ponggawana.3 Malemi Daud lako kota Mizpa jio tana Moab, nametaqda lako rajana to-Moab nakua, <<Taeloranpi to ambeqkuq sola indokuq natorropa indeq, kuratumora nnalai ke kuissenmi to pattujun-Na Puang Allataala lako akuq.>> 4 Nasolanmi to tomatuanna lako istanana rajana to-Moab natorro jio, pada masainna Daud membuni llan loqkoq jao buntu.
5 Apa nakua Nabi Gad lako Daud, <<Danggiqmo mutorro ntee, pole lakomoko tana Yehuda.>> Malemi Daud namentama pangngala Keret.
Imang jio kota Nob dipatei
6 Den wattu nacumadokko Raja Saul sitoe dokena jiong garontoq kaju tamariska jao membuntunna jio kota Gibea, na jio saqdena to sininna panglimana. Ia tonna issenmi to ngenan nanii male Daud sola taunna, 7 nakuamo Raja Saul lako panglimana, <<Ee to-Benyamin, pesaqdingngii! La naben unara kamuqka baraqbah anggur na baraqbah laen joo Daud anakkana Isai? La naangkaq unara kamuqka menjaji komandan tentara sisangsaqbu baqtu komandan tentara sisaratuh? 8 Susii joo pangpikkirisanmi, iamo mimesaq kada sola ngasan la nnewanaq, na teqda bang kamuq mpauannaq kumua mangkai massumpa sisobaq Yonatan sola Daud. Teqda bang kamuq mparinawanaq mipauannaq kumua, anakkuq rrasi Daud la mpateinaq.>>
9 Nakuamo Doeg to-Edom, kapala tomangrewana Raja Saul to keqdeh jio siandah sininna panglimana Raja Saul, <<Kukita joo anakkana Isai male lako kota Nob sitammu Ahimelekh anakkana Ahitub.b 10 Mpetaqdai pangpatuju Ahimelekh lako PUANG Allataala to la napugauk Daud, nabenni kinallo, naben tooi to laqboh landona Goliat to-Filistin.>>
11 Nasuami Raja Saul to taunna male ntambaii to Imang Ahimelekh anakkana Ahitub sola sininna sampunna muane to menjaji imang jio kota Nob, namangngolo lako raja. 12 Nakua Raja Saul lako, <<Ee Ahimelekh anakkana Ahitub, pesaqdingngii!>> Mebalii nakua, <<Ieq kitaq puang.>> 13 Mekutanami Raja Saul lako nakua, <<Ciapari mimesaq penawa nnewanaq sola joo anakkana Isai? Mubenni roti sola laqboh lando, mupetaqdanni pangpatuju lako Puang Allataala apa to la napugauk, na ia too mangngattami la nnewanaq na la napateinaq.>> 14 Mebalimi Ahimelekh nakua, <<Indara to pangjamataq la dikatappaqi susi Daud? Apa poleqpi namamintuntaq na komandan surudaduntaq tooi, to liwaq ditaratteq sola dianggaq llan bolataq. 15 Teqda namaneqna joo kupetaqdanni pangpatuju lako Puang Allataala. Teqda lalo kumua la mesaq penawai tee akuq kaunantaq sola Daud sola sininna keluargakuq la nnewakiq! Danggiq tamangpikkiriq susi tuu. Teqda akuq kuissenni joo passalan.>>
16 Apa nakua Raja Saul, <<Nang la dipateiko Ahimelekh sola sininna keluargamu.>> 17 Nasuami tentarana jio saqdena nakua, <<Talimbungngi mipateii tuu lako imang-Na PUANG Allataala, sabaq sikangkoloqi Daud. Naissen paleq kumua mpalaianni kalena to Daud nateqda napauannaq.>> Apa ciaqi tentarana mpateii. 18 Nakuamo lako Doeg, <<Ikomo mpateii.>> Malemi Doeg to-Edom napateii joo sininna imang. Ia joo wattu karuaipulona lima mangpakean baju efod jio mai kaen lenanc napatei. 19 Napangparentan tooi Raja Saul, nadipatei ngasan to tau torro llan kota Nob kampongna imang, la muane la baine, la pea baqtu ia to cumucu unapa, moi too sapin, keledai na domba nabaqta ngasanni laqboh lando namate.
20 Apa den mesaq anakkana Ahimelekh ampona Ahitub disanga Abyatar palai buni, namale lako Daud. 21 Ia tonna paui Abyatar lako Daud kumua napatei ngasan Raja Saul to imang-Na PUANG Allataala, 22 nakuamo Daud lako Abyatar, <<Ia tongkukitai to Doeg to-Edom jio kota Nob joo wattu, kukuamo llan penawangkuq nang la napaui lako Raja Saul, kumua, <Kukitai to Daud jio kota Nob.> Akuq ntumangngi nadipatei ngasan to keluargamu. 23 Tatorromo sola, danggiq malajaq. Teqda na iko manda la napatei Raja Saul la napatei toonaq. Teqda tau la nnapako ke solakiq.>>