Daud palai lako Imang Ahimelekh jio kota Nob
21
Malemi Daud lako Imang Ahimelekh jio kota Nob. Malajaqi Ahimelekh na mbeqbeh ntammui Daud nakutanaii nakua, <<Ciapari mumesa-mesara nateqda bang tau musolan?>>a 2 Mebalii Daud lako imang Ahimelekh nakua, <<Den nasuannaq raja, na nakua raja, <Teqda tau waqding nnissenni tee kusuangko.> Iamo joo kusuai to taungkuq mangtajan jio mesaq ngenan. 3 Tabeq! Denraka apa dikande? Benpaq roti lima, baqtu apa bangmi to den.>> 4 Mebalii joo imang nakua, <<Teqda roti biasa indeq, den una rotib to dipakera massompa. Waqding muala, assalan ia to taummu teqda nasisola mammaq bainena namale jio mai.>> 5 Nakuamo Daud mebali, <<Nang teqda kidieloran sisola mammaq bainekiq ke la malekan parari to biasamo napugauk taungkuq, nang la mapaccing situruq atoran agama, laqbi-laqbi to njama jaman liwaq parallu disuankan too.>> 6 Nabenmi imang joo roti dipake massompa lako PUANG Allataala, sabaq teqda roti laenna. Ia joo roti diala jio mai ngenan passompan nadisullei roti baru.c7 Sirumpa joo wattu den mesaq pangjamana Raja Saul jio to napattantu mpugauk atoran agama, kapala pangrewana Raja Saul, disanga Doeg to-Edom.
8 Mekutanami Daud lako Ahimelekh nakua, <<Denraka laqboh lando baqtu doke taanna to waqding kupake? Teqda lalo parewa kubawa, sabaq gaja sekaq joo parentana raja.>> 9 Nakuamo Imang Ahimelekh, <<Den laqboh landona Goliat to-Filistin, to mutalo jio Lombok Tarbantin. Diannai jio bokoq baju efod dibukkuq kaen. Ia ke madoangko, iamo muala, ia mandara den.>> Nakuamo Daud, <<Teqda nasusian melona joo laqboh lando, iamo bennaq kupakei.>>d
Daud palai lako Filistin
10 Ia joo allo nasalaii Daud to Raja Saul, namale mpalaian kalena lako Akhis raja jio kota Gat. 11 Nakuamo sininna pangjamana Raja Akhis, <<Kisanga raja tee Daud jio tana Israel. Iamo napanggelluq-gelluranni baine namakkelong sibali-bali nakua,
<Raja Saul ntaloi massaqbu-saqbu ewana,
apa Daud mangpulo-pulo saqbu.> >>e
12 Nanawa-nawa bang Daud to kadanna pangjamana Raja Akhis, iamo namalajaq lako Raja Akhis, raja jio kota Gat.f 13 Iamo naanggaiqi Daud memmame-mame jio olona Raja Akhis sola sininna pangjamana. Nakarruk-karrukki to rinding babangan kota sola naanggaiqi mpalolong kasolena ratu doq janggoqna.g 14 Nakuamo Raja Akhis lako pangjamana, <<Teqdaraka mikitai kumua tomame tuu tau, misolan ori lako akuq? 15 Misanga ciqdiqparaka to tomame ntee mai kota, miratu omo mbawai tee tomame tama bolakuq?>>