Yonatan sijanji Daud
20
Palaimi Daud jio mai Nayot kota Rama, namale sitammu Yonatan namekutana nakua, <<Apara akuq kupugauk? Apara dosakuq baqtu denraka salakuq lako ambeqmu, namangngattara la mpateinaq?>> 2 Nakuamo Yonatan, <<Danggiq mangkada susi tuu! Teqdara nalampateiko. Parallu muissen kumua, ia ke denni la napugauk ambeqkuq la passalan biccuq, la passalan matonggo, tuli napauannaq. Jaji ia tee passalan musanga, teqda natongan.>> 3 Apa mebalii Daud nakua, <<Gaja napahang ambeqmu kumua liwaqkiq sipakamojaq. Iamo namangpikkiriq kumua, <Teqda nawaqding Yonatan nnissenni tee akkattakuq, sabaq la napumasussa penawanna ke naissenni.> Apa massumpanaq jio olomu mpau sangan-Na PUANG Allataala to tuo kumua nabajo-bajoi bangmoq kamatean.>> 4 Nakuamo Yonatan lako Daud, <<Iami musanga iami la kupugauk.>> 5 Nakuamo Daud, <<Susi tee, allo pangramean bulan baru masawa, sitonganna la cumadokkoraq sola raja kumande. Ia ke muelorannaq, la malenaq membuni jio padang pallawangan ratu lako duang bongi karuen.a 6 Ia ke naangahnaq ambeqmu la mukua mebali, <Memmase-mase tonganni Daud metaqda lako akuq la madoiq pole lako Betlehem kampongna, sabaq la mpugaukki karoba pentaunan to sangbatiq.> 7 Ia ke natarima meloi, salamaqnaq, apa ia ke mabirihhi tajaimi nang la madoangngi ncilakainaq. 8 Ia ke susimi joo la mupangpekitan lako akuq, kumua tattaqko mpugauk janjintaq la sisobaq, sabaq mangkamikiq sijanji mpau sangan-Na PUANG Allataala. Apa ia ke denni salakuq maqnamo na iko bangmo mpateinaq, danggiq na ambeqmu.>> 9 Apa mebalii Yonatan nakua, <<Danggiq lalo najaji joo! Ia ke kuissenni kumua manassa la nacilakaiko ambeqkuq, tantu la kupauanko.>> 10 Mekutanami Daud lako Yonatan nakua, <<Umbo kukua la nnissenni ke mebali kassaraqi ambeqmu lako iko?>> 11 Nakuamo Yonatan, <<Tamale sola lako padang pallawangan.>> Malemi sola duai.12 Nakua omo Yonatan lako Daud, <<Massumpanaq mpau sangan-Na PUANG Allataala to nasompa to-Israel, masawa baqtu duang bongi tatteq susi tee, la kupematai kuwaqding nnissenni to akkattana ambeqkuq. Ia ke teqda unai namagalli lako iko, la ssuanaq tau napauanko. 13 Apa ia ke la mangngattai ncilakaiko, la kupauan tooko mumale mpasalamaq kalemu. Nasessa laqdaqmoraq PUANG Allataala ke teqda kupauanko. Dennaa upaq Natulungko PUANG Allataala, susi ambeqkuq mangka Natulung. 14 Ia ke tuo unapaq, ingaranni tee janjintaq sola dua to tapau jio olo-Na PUANG Allataala, daqtanko mpugauk kameloan lako akuq. Apa ia ke matemoq, 15 daqtanko mpugauk kameloan lako batiqkuq. Na ia ke Nalanynyaqii PUANG Allataala to sininna ewamu,b 16 danggiq anggeii to janjintaq sola dua. Ia ke muanggeii, la Nasessako PUANG Allataala.>> 17 Nasuami Yonatan to Daud massumpa poleq, la tattaq mpugauk kameloan lako batiqna, sabaq gaja napakamojaqi Daud. Liwaq napakamojaq Yonatan to Daud susi to kalena napakamojaq.
18 Nakuamo Yonatan lako Daud, <<Allo pangramean bulan baru masawa, nang la dipekutananko ke teqdako jio ngenan cadokkoanmu. 19 Apa duang bongi nang la diangahko, jaji maleko lako ngenan to munii membuni baqtu piran, mumangtajan jio toq saqde batu titombonc. 20 La mpangpattarannaq tallu mata pana lako saqde batu munii membuni, butung to den apa kupana. 21 Kumaneq ssua kaunankuq male nnangahhi joo pira-pira mata pana. Ia ke kukua lako kaunankuq, <Mandoppiqra joo mata pana, alai,> waqdingmoko messun jio mai pembunianmu. Massumpanaq mpau sangan-Na PUANG Allataala to tuo kumua salamaqmoko, teqdara nalancilakaiko ambeqkuq. 22 Apa ia ke kukua lako kaunankuq, <Jio-jiori olomu nanii joo mata pana,> maleko palai, sabaq Nasuako PUANG Allataala. 23 PUANG Allataala saqbintaq tatattaq mpugauk janjintaq teqda anggena.>>
24 Mangkai joo too malemi Daud membuni jio padang. Ia joo wattu nadeteqmi to pangramean bulan baru nacumadokko to Raja Saul la kumande. 25 Susi biasanna cumadokkoi Raja Saul jao kaderana jio toq rinding. Na jio saqdena Raja Saul to Abner, na Yonatan sioloan raja, apa ia to Daud teqdai jio cadokkoanna. 26 Na teqda bang namekutana Raja Saul sabaq nakua llan penawanna kumua, <<Mbai naden apa jaji lako kalena. Mbai nateqda namapaccing situruq atoran agama.>> 27 Apa masawanna, tonna allo mangpenduannamo pangramean bulan baru, teqda unapi jio cadokkoanna Daud, mekutanami Raja Saul lako Yonatan anakkana nakua, <<Ciapari joo anakkana Isai nateqda ratu kumande, ssangboq na ia tee allo?>> 28 Mebalimi Yonatan nakua, <<Memmase-mase tonganni Daud lako akuq metaqda la pole lako Betlehem, 29 nakua, <Addampangannaq taeloranpaq pole lako kota Betlehem sabaq la mpugaukki karoba pentaunan to sangbatiq, na natambainaq sileqtokuq. Ia ke takamaseinaq taeloranpaq pole sikita sileqtokuq.> Iamo na teqda naturuq ntee pangrameantaq ambeq.>>
30 Gaja gallii Raja Saul lako Yonatan namangkada kumua, <<Ee, anakkanako baine sala kedo, tangmessipaqko! Kuissenmi too kumua mulaqbiran to anakkana Isai na ia to akuq. Mpakasiriqko kalemu sola indomu! 31 Parallu muissen kumua, ianna tuo unapa joo anakkana Isai llan lino, nang la teqda na iko ssullenaq mparentai tee karajaan. Iamo joo taqpa suai to tau too male nnalai, sabaq nang la dipateii.>>
32 Apa mebalii Yonatan lako Raja Saul ambeqna, <<Ciapari na la dipateira? Apara salana?>>
33 Naperraukanni Raja Saul to dokena lako Yonatan la napatei. Napahangmi Yonatan kumua ia to ambeqna nang la mpatei Daud. 34 Gaja gallimi Yonatan nataqpa keqdeh male ssalaii joo pangramean. Ia tonna allo mangpenduannamo joo pangramean bulan baru, teqda lalo nakumande to Yonatan, sabaq massei penawanna nnawa-nawa Daud to teqda naanggaqi Raja Saul ambeqna.
35 Masawanna makaleq, malemi Yonatan lako padang nasolanni to mesaq pea kaunanna susi janjinna lako Daud. 36 Nakuamo lako joo kaunanna, <<Maleko lari muangahhi ke kupempatteranni tee panakuq.>> Taqpa larimi joo kaunan, napempatteranni Yonatan to panana na nnola jao toq ulunna kaunanna. 37 Ia tonna deteqi joo pea to nanii mata pana, metambami Yonatan jio mai bokoqna nakua, <<Ee, jio-jiori olomu joo mata pana.>> 38 Metambami Yonatan nakua, <<Ee, madoiqko danggiq mutorro bang jenjen.>> Naalami joo kaunan to mata pana nabawai lako puangna. 39 Teqda napahangngi joo kaunan to pattujunna Yonatan, ia manda sola Daud mpahangngi. 40 Mangkai joo too nabenmi Yonatan joo pana lako kaunanna nakuanni, <<Polemoko mbawai tee pana lako kota.>>
41 Ia tonna polemo joo pea, messunmi Daud jio mai pembunianna jio saqde batu. Sujuqmi Daud pentallun doq litak jio olona Yonatan. Namaneq sirakaq sola dua nasikumarrakan. Laqbi masse penawanna Daud na ia to Yonatan. 42 Nakuamo Yonatan lako Daud, <<Puang Allataala ntulungkiq tapada salamaq. Mangkamikiq massumpa mpau sangan-Na PUANG Allataala la mpugauk tarruhhi to janjintaq ratu lako batiqtaq.>> 43 Mangkai joo too malemi Daud napole toda Yonatan lako kota.