Raja Saul mangngatta la mpatei Daud
19
Nakua Raja Saul lako Yonatan anakkana sola lako sininna pangjamana kumua, ia to Daud la dipatei. Apa liwaq napakamojaq Yonatan to Daud. 2 Iamo namangkada Yonatan lako Daud nakua, <<Majagako, sabaq mangngattai ambeqkuq la mpateiko! Maleko manikaleq membuni lako padang pallawangan jio mesaq ngenan. 3 La male todanaq sola ambeqkuq lako joo padang munii membuni. Kusipangkadaii to akkattana lako iko. Kupauanmoroko to apa kisipangkadai.>>4 Napaumi Yonatan lako ambeqna to sininna kameloan napugauk Daud nakua, <<Metaqdanaq danggiq tacilakaii to Daud kaunantaq, sabaq teqdara kasalan napugauk lako kitaq. Na kusanga melo ngasan to napugauk lako kitaq. 5 Teqda nakasajangngi sungaqna Daud tonna patei Goliat, to-Filistin, Nabenni PUANG Allataala kapataloan laqdaq to to-Israel. Ia joo wattu takita tapumarioi. Ciapari talampugauk dosa la mpatei to tangkasalan? Ciapari tamadoang mpatei Daud na teqda sabaqna?>>
6 Napesaqdingngi Raja Saul joo kadanna Yonatan, nakuamo Raja Saul, <<Massumpanaq mpau sangan-Na PUANG Allataala to tuo kumua teqda kulampateii joo Daud.>> 7 Mangkai joo too natambaimi Yonatan to Daud napauan ngasanni to pura nasipangkadai sola ambeqna. Nasolanni to Daud lako Raja Saul napangjamanni susi baqtu piran.
8 Den wattu nasirari omo to-Israel na to-Filistin. Malemi Daud sola tentarana rrari to-Filistin naliwaq melajatan to kaditaloanna to-Filistin nasipalaian.
9 Apa den wattu nacumadokko to Raja Saul jio bolana sitoe doke, nakuasai omi setang to Naeloran PUANG Allataala, namukkun mangcuqbekan to Daud. 10 Naraukki doke Raja Saul to Daud nasanga la napasitarruh rinding jio bokoqna Daud. Apa napessalaii Daud na rinding mandara to nakanna dokena. Namale palai to Daud nasalamaq joo bongi.
11 Nasuami Raja Saul to pira-pira taunna male lako bolana Daud mmataii, dikua napateii ke makaleqmi. Apa napauanni Mikhal bainena Daud kumua, <<Ia ke teqda mupalai tee bongi, la napateiko tau masawa.>>a 12 Napannola jaoi mai pentiroan Mikhal to Daud namale palai mpasalamaq kalena. 13 Naalami Mikhal to tau-tau dewata llan bolana, napamammaqi jao katindoanna Daud, nabukkuqi pangtannun bulu beke to ulunna, namaneq ssalimuqi. 14 Ia tonna ratumo tuu lako taunna Raja Saul la nnala Daud jio bolana nakuamo bainena, <<Masakii.>> 15 Mangkai joo too nasua omi Raja Saul to taunna ngkita Daud nakua, <<Pasiangkaq bangmi katindoanna jio mai, kupateii.>> 16 Mentamami sapaq to todisua, nakitai tau-tau dewata paleq dipajao katindoan dipabukkuqi pangtannun bulu beke to ulunna. 17 Nakuamo Raja Saul lako Mikhal, <<Ciapari muuraganaq susi joo? Mueloranni to ewakuq male palai.>> Apa mebalii Mikhal nakua, <<Napangngandonaq Daud nakua, <Elorannaq kumale palai, ia ke teqda muelorannaq la kupateiko.> >>
18 Malemi Daud mpalaian kalena, namale lako Nabi Samuel jio kota Rama, nacurita ngasanni to napugauk Raja Saul lako kalena. Mangkai joo too malemi sola dua lako Nayot natorro jio. 19 Napaui tau lako Raja Saul kumua jioi Nayot jio kota Rama to Daud. 20 Iamo nasuai Raja Saul to pira-pira taunna male njokko Daud. Apa nakitai tee todisua to sangrombongan nabi to naatoroq Nabi Samuel to Nakuasai Roh Allataala nampau joloi to la jaji ke anuq. Nakuasai toomi Roh Allataala tee to nasua Raja Saul, napugauk tooi susi joo sangrombongan nabi. 21 Napaumi tau lako Raja Saul joo apa jaji lako taunna, nasua omi pira-pira to tau laen male, apa napugauk tooi susi joo sangrombongan nabi. Nasua omi to pira-pira taunna, pentallunmi massua, na susi unai tuu lako tau. 22 Iamo na Raja Saul kalenamo male lako kota Rama. Ia tonna ratumo lako Sekhu, siandah bubun tonggo, mekutanami nakua, <<Umbora nanii torro Nabi Samuel sola Daud?>> Mebalii to tau nakua, <<Jioi Nayot jio kota Rama.>> 23 Tarruhmi Raja Saul lako Nayot, nakuasai todami Roh Allataala. Iamo napugauk todai susi joo sangrombongan nabi, arannai ratu lako Nayot. 24 Ia tonna ratumo lako Nayot nnalaimi bajunna, nakuasai tooi Roh Allataala jio olona Nabi Samuel, arannai songka doq litak, namellengan tangmebaju sangngallo sangbongi. Iamo napuuleleanni tau nakua, <<Nabi todamiraka to Raja Saul?>>b