Daud dipilei menjaji raja
16
Mangkada-Mi PUANG Allataala lako Nabi Samuel Nakua, <<La masse bang unaparaka penawammu napubuaq Raja Saul? Teqdamo Kuakuii kumua rajanai to-Israel. Issimi minynyak zaitun tuu suke tandukmua, la Kusuako male sikita Isai to-Betlehem, sabaq den sala mesaqna anakkana mangka Kupilei la menjaji raja-Kuq.>> 2 Apa mebalii Nabi Samuel nakua, <<Makaraka la kupugauk joo? Ia ke nasaqdingngi Raja Saul nang la napateinaq!>> Mebali-I PUANG Allataala Nakua, <<Bawako mesaq sapin lundara. La mukua lako to buda jio, <Ratunaq mpassompan karoba lako PUANG Allataala.> 3 Na ia ke la mangkarobamoko, tambai tooi to Isai. La Kupauanko to la mupugauk. Ia to to-Kupattantu sanganna iamo la mubolloi minynyak zaitun to ulunna mpaassahhi menjaji raja.>> 4 Malemi Nabi Samuel lako kota Betlehem napugaukki to Naparentanni PUANG Allataala. Naratu to tomatua-tua ntammuii, simalajatanni namangkada nakua, <<Apa tujunna tee karatuantaq, la kipumelonaraka?>> 5 Mebalii Nabi Samuel nakua, <<Tongan! Ratunaq la mpassompan karoba lako PUANG Allataala. Mpasadia kamuq kalemib miratu tamassompa sola.>> Mangkai joo too napasadiai Samuel to Isai sola anakkana muane, nasuai male lako to la dinii mpugauk pangkaroban.6 Ia tonna ratumo Isai sola anakkana muane, nakitami Nabi Samuel to Eliab anak pamungahna Isai, nakuamo llan penawanna, <<Nang iamo tee to Napilei PUANG Allataala.>> 7 Apa Nakua PUANG Allataala lako Nabi Samuel, <<Danggiq mumengkita rupa sola pangkalean, sabaq teqda Kutarimai tuu. Teqda nasusi pengkitanna tolino na pengkitang-Kuq. Ia to tolino mengkita rupa, apa ia to Akuq penawara.>>
8 Natambaimi Isai to Abinadab anakkana, nasuai mangngolo lako Nabi Samuel, apa nakua Nabi Samuel, <<Tangngia too tee to-Napilei PUANG Allataala.>> 9 Nasuami Isai to Syama mangngolo lako Nabi Samuel, apa nakua Nabi Samuel, <<Tangngia too tee to Napilei PUANG Allataala.>> 10 Iamo joo pitu anakkana Isai nasua mangngolo lako Nabi Samuel, apa mangkadai Nabi Samuel lako Isai nakua, <<Ia tee pitu anakkamu, teqda bang Napilei Puang Allataala.>> 11 Mekutanami Nabi Samuel lako Isai nakua, <<Ia ngasanmoraka tee to anakkamu?>> Mebalii Isai nakua, <<Denpa to tampak, apa mangrewa dombai.>> Nakuamo Nabi Samuel, <<Suai to tau namale ntambaii, sabaq teqdapa tawaqding kumande, ke teqdapi naratu.>>
12 Nasuami Isai to tau male ntambaii joo anak tampakkana. Ia joo pea muane malea kuliqna, mellong matanna na magarattaq. Nakuamo PUANG Allataala lako Nabi Samuel, <<Iamo tee to Kupilei, keqdehmoko mupasahhi menjaji raja.>> 13 Naalami Nabi Samuel to suke tanduk nanii minynyak zaitun, nabolloii to ulunna joo pea muane nakitai kakanna. Pamula joo wattu nakuasaimi Roh Allataala joo pea muane disanga Daud. Mangkai joo too polemi Nabi Samuel lako kota Rama.
Daud llan istanana Raja Saul
14 Nasalaimi Roh Allataala to Raja Saul, Napupangelohnai PUANG Allataala to setang mpabalisai namalajaq bang. 15 Nakuamo kaunanna Raja Saul, <<Manassa den setang Naeloran Puang Allataala rremakkikiq. 16 Mbai melo ke malekan nnangah mesaq to tomacca mangcuqbekan, na ia ke ratu omi joo setang rremakkikiq, tasuai joo tau mpannoniankiq cuqbekan, namanyaman tasaqding.>> 17 Nakuamo Raja Saul lako kaunanna, <<Angaranmoq mesaq tomacca mangcuqbekan, misolanni jio mai.>> 18 Nakuamo sala mesaqna joo kaunanna Raja Saul, <<Den kuissen! Den anakkana Isai to-Betlehem, macca mangcuqbekan. Gaja barani namacca mangrari, magarattaq, macca mangbicara nadaqtan bang Natulung PUANG Allataala.>>
19 Nasuami Raja Saul to kaunanna male lako Isai napasanni kumua, <<Suai namangngolo lako akuq to anakkamu disanga Daud to rrewai dombamu.>> 20 Nnalami mesaq keledai Isai, napassampei anggur llan mesaq sepuq kuliq, na mesaq anak beke na den too roti. Nasuai to Daud male mbawanni Raja Saul. 21 Ia tonna jiomo bolana Raja Saul to Daud napupangjamai. Liwaq napakamojaq Raja Saul napupenjajii pangtakinna. 22 Iamo namepasan Raja Saul lako Isai nakua, <<Akeq natorro bangmo indeq to Daud mpangjamannaq, sabaq mpamasannang penawangkuq.>> 23 Ia ke ratu omi joo setang Naeloran Puang Allataala rremakki Raja Saul, naala omi Daud to cuqbekan napannonii. Palai omi joo setang, matana omi namanyaman nasaqding Raja Saul.