To-Amalek nararii to-Israel
15
Den wattu namangkada Nabi Samuel lako Raja Saul nakua, <<Akuq to Nasua Puang Allataala mpaassahko menjaji rajana to-Israel, ummaq-Na. Iamo joo turuqi tee parenta-Na PUANG Allataala.a 2 Susii tee kadan-Na PUANG Allataala to makuasa, <La Kupabalahhi to to-Amalek, to mangka napugauk lako to-Israel, sabaq nararii tojolona tonna tee to to-Israel tonna messun llan mai tana Mesir.b 3 Jaji malemo kamuq too rrarii mitaloi, lanynyaqi ngasanni to apanna, danggiq naden miajan, danggiqmo mimamase ngkitai. Patei ngasanni la muane, la baine, la pea baqtu ia to cumucu unapa, moi too sapin, domba, unta na keledainna.> >>4 Nasuami Raja Saul to tentarana sirempun jio kota Telaim, narekenni. Ia to lumingka, den duaratuh saqbu tentara to-Israel na sangpulo saqbu to-Yehuda. 5 Ia tonna ratumo Raja Saul sola tentarana lako kotana to-Amalek, nasuami to tentarana sadia jiong lombok la mangrari. 6 Napasanmi Raja Saul lako to-Kenic nakua, <<Male kamuq salaii to to-Amalek, danggiq midilanynyaqi sola. Sabaq mangkami to tojolomi mpemeloanni penawa tojolokiq to-Israel tonna ratu jio mai tana Mesir.>> Palaimi to to-Keni ssalai to-Amalek.
7 Nararimi Raja Saul to to-Amalek, nataloi pamula jio mai kota Hawila ratu lako padang makase Syur jio kadellekanna tana Mesir. 8-9 Napatei ngasanni Raja Saul sola tentarana to to-Amalek mpake laqboh lando, na ia to Agag, rajana to-Amalek, teqda napateii, apa najokkori. Susi too to sininna sapin, domba sola anak sapin sola anak domba to simellongna na simaloppo, teqda napateii, na sininna to keanggaqna teqda nalanynyaqii. Ia manda napatei to patuoan siganjang na teqda buaqna.
Teqdamo Naakuii Puang Allataala to Raja Saul menjaji rajana to-Israel
10 Mangkada-Mi PUANG Allataala lako Nabi Samuel Nakua, 11 <<Menassan-Naq mpilei Raja Saul menjaji raja, sabaq napabokoqi-Naq penawa, nateqda naturuqi to parenta-Kuq.>> Mabirihmi Nabi Samuel. Iamo joo nasangbongi bang sumarro lako PUANG Allataala. 12 Napelambikkimi Nabi Samuel miqcok la male sitammu Raja Saul, apa napauanni tau kumua, <<Malei nnenaq sauq kota Karmel, na ia tonna mangka mpasitodoq-todoq batu nanii nningaran kapataloanna, polemi namangnguju req kota Gilgal.>> 13 Ia tonna sitammumo Nabi Samuel na Raja Saul, nakuamo Raja Saul, <<Dennaa upaq Nabarakkaqikiq PUANG Allataala. Mangkami kupugauk to parenta-Na PUANG Allataala.>> 14 Nakuamo Nabi Samuel, <<Matumbai paleq na naden unapa beke sola domba kusaqding mberre na sapin mangngoeq?>> 15 Mebalii Raja Saul nakua, <<Ia joo beke, domba sola sapin to sigaja melo napasalamaq surudaduntaq jio mai to-Amalek, sabaq la dipangkarobanni lako PUANG Allataala to tasompa. Apa ia to laenna, kipatei ngasanmi.>> 16 Nakuamo Nabi Samuel lako Raja Saul, <<Pajaimi tuu kadammu! La kupauanko, apa to Napauannaq PUANG Allataala pubongiq.>> Nakuamo Raja Saul, <<Tapauanmoq.>>
17 Nakuamo Nabi Samuel, <<Moi musanga kalemu to tangsipatoqko, apa menjajimoko tomangparentana to-Israel. Ikomo Napilei PUANG Allataala menjaji rajana to-Israel. 18 Mangkamoko Napasan PUANG Allataala kumua, malemoko llanynyaqi ngasanni to to-Amalek to tomangpanggaukan gajaq. Rarii ratu lako cappuqna. 19 Ciapari nateqda muturuqi to parenta-Na PUANG Allataala? Ciapari murampai joo patuoan, mupugaukki to Napangnganggai PUANG Allataala?>>
20 Mebalimi Raja Saul lako Nabi Samuel nakua, <<Nang kuturuq to PUANG Allataala, kupugaukki to Nasuannaq. Kujokkoi to Agag rajana to-Amalek, na kupatei ngasanmi to taunna. 21 Apa ia to patuoan dipattantu la dilanynyaqi, narampai surudadungkuq, napassalai to domba sola sapin simelo, la dipangkaroban jio kota Gilgal lako PUANG Allataala to tasompa.>> 22 Apa mebalii Nabi Samuel nakua,
<<Umbonnara laqbi Nakabudai PUANG Allataala, karoba ditunuraka sola karoba digereq,
iarika nturuq parenta-Na?
Nang laqbi melo to nturuq parenta-Na, na ia to pangkaroba,
na laqbi melo mangpesaqding sola menturuq, na ia to mpassompan lompo domba muane.
23 Sabaq nnewa Puang Allataala pada bang dosana to napugauk topaissen-issen,
na matampo pada una gajaqna to ssompa tau-tau dewatad.
Teqdamo Naakuiko PUANG Allataala kumua rajanako to-Israel,
sabaq teqda muturuqi to parenta-Na.>>
24 Nakuamo Raja Saul lako Nabi Samuel, <<Madosamoq, sabaq teqda kuturuqi to parenta-Na PUANG Allataala, nateqda kuparinawai to pangpakaingaqtaq, apa malajaq lakoraq taungkuq kuturuqi bangmi to petaqdanna. 25 Metaqdanaq too taaddampangannaq, tamalemo sola, la massompanaq lako PUANG Allataala.>> 26 Apa mebalii Nabi Samuel nakua, <<Teqda kumadoang ke malekiq sola, sabaq teqda muturuqi to parenta-Na PUANG Allataala, napusabaqi teqdamo Naakuiko PUANG Allataala menjaji rajana to-Israel.>>
27 Ia tonna la membalikmo Nabi Samuel la male, napendokeqi Raja Saul to cappaq baju landona Nabi Samuel, naceqce. 28 Nakuamo Nabi Samuel, <<Susi tee bajungkuq mucaqcean, susi toomi joo PUANG Allataala la nnalaiko tee allo to karajaanna to-Israel, Nabenni lako tau laen to laqbi melo sipaqna. 29 Umbopi Ia to Puang Allataala to malaqbih to nasompa to-Israel, teqda Namangnguraga na teqda Namenassan, sabaq tangngia Ia tolino to biasa menassan.>> 30 Apa nakua Raja Saul, <<Madosamoq, apa pangpekitanni lako tomatua-tua llan bangsakuq sola taungkuq kumua daqtannaq taanggaq, iamo joo tapolemo sola kuwaqding massompa lako PUANG Allataala to musompa.>> 31 Mangkai joo too polemi Nabi Samuel sola Raja Saul, namassompa Raja Saul lako PUANG Allataala.
32 Nakuamo Nabi Samuel, <<Solanni mai tuu Agag rajana to-Amalek.>> Gaja rioi Raja Agag male mennolo lako Nabi Samuel, sabaq napikkiriqi kumua teqdamo naladipatei. 33 Apa nakua ora Nabi Samuel, <<Susi laqboh landomu napumate anakkana buda indoq, susi toomi joo to indomu la kataqdean toda anakkana.>> Mangkai joo too nataqtak-taqtakki Nabi Samuel to Raja Agag jio olo ngenan passompan lako PUANG Allataala jio kota Gilgal.
34 Mangkai joo too malemi Nabi Samuel tama kota Rama, apa ia to Raja Saul pole lakoi bolana jio Gibea, kotana Raja Saul. 35 Ratu lako matena Nabi Samuel, teqdamo naden nasikita Raja Saul. Gaja massei Nabi Samuel ngkita panggaukanna Raja Saul, napumasse tooi to kamenassanan-Na PUANG Allataala mpilei Raja Saul menjaji rajana to-Israel.