Pangbarani Yonatan
14
Den wattu namangkada Yonatan anakkana Raja Saul lako pangtakinna nakua, <<Tamale lako pangrondanna to-Filistin.>> Apa teqda napaui lako ambeqna. 2 Ia joo wattu cumadokkoi Raja Saul jiong toq garontoq delima jio kota Migron siandah kota Gibea, na den annan ratuh tentarana jio nasolan. 3 Ia to Imang Ahia anakkana Imang Ahitub mpake baju efod joo wattu. Ia to Ahitub sola Ikabod anakkana Pinehas. Ia to Pinehas anakkana Imang Eli tompangjaman PUANG Allataala jio kota Silo tonna tee.Teqda naissenni tobuda to kamaleanna Yonatan lako pangrondanna to-Filistin. 4 Iapi nakullei Yonatan ntamaii to pangrondanna to-Filistin, ke nnola jioi allaq buntu batu mataran disanga Bozes na Sene. 5 Ia joo buntu batu jajanna liu, sioloanni kota Mikhmas, na ia to lloqna liu, sioloanni kota Geba.
6 Nakuamo Yonatan lako pangtakinna, <<Tamalemo lako pangrondanna tokapereq. Dennaa upaq Natulungkiq PUANG Allataala, sabaq teqda ia Namasussa la ntulungkiq, la budarikiqka la ciqdirikiqka.>> 7 Mebalii joo pangtakinna nakua, <<Apami taakkattai tapugauk, iami kuturuq.>> 8 Nakuamo Yonatan, <<Melomi! Ia ke jiomikiq, tapangpekitanmo kaletaq. 9 Ia ke nakuankiq, <Ntuumo kamuq, na kamiq male matiq,> takenden, danggiq na kitaq male deq mpendeteqii. 10 Apa ia ke nakuankiq, <Endek kamuq mai,> tamale deq, sabaq iamo tandana kumua Nabenmikiq kapataloan PUANG Allataala.>>
11 Ia tonna pangpekitanmo kalena Yonatan sola pangtakinna lako pangrondana to-Filistin, nakuamo joo to-Filistin, <<Kitai to to-Ibrani messunmi llan mai loqkoq pembunianna.>> 12 Metambami lako Yonatan sola pangtakinna nakua, <<Endek kamuq mai, den la kipauan kamuq.>> Nakuamo Yonatan lako pangtakinna, <<Tamalemo deq, sabaq Nabenmikiq PUANG Allataala kapataloan tee kitaq to-Israel.>>
13 Malemi Yonatan sola pangtakinna mentekeq deq. Nabaqtai laqboh lando Yonatan to pangrondana to-Filistin, naundi to pangtakinna mpateii. 14 Iamo tee pamula kapataloanna Yonatan sola pangtakinna, agi-agi den duangpulo tau napatei, jio padang agi-agi duangsaqbu limaratuh metereq luahna. 15 Ia joo kapataloanna mpamarongka tentarana to-Filistin nasimalajatan, la to llan tenda, la to jio tangnga padang, la to jio pangrondan, na to nanii parampoq. Napatirogei Puang Allataala to padang na samalajaq-lajaqna nasumpalingan to to-Filistin.
Taloi to to-Filistin
16 Ia tonna kitai mata-matanna Raja Saul jio kota Gibea jio tana suku Benyamin to to-Filistin sumpalinganni susi ombaq jiong tasik male lako male jio mai, 17 nakuamo Raja Saul lako tentara nasolan, <<Rekenni kee! Gannaq unaraka to surudaduntaq?>> Direkenmi to surudadu, nataqde Yonatan sola pangtakinna. 18 Nakuamo Raja Saul lako Imang Ahia, <<Bawai mai to baju efodmu, mupakei.>> Ia joo wattu Imang Ahia manda to mpake baju efoda llan allaqna to-Israel. 19 Mukkun unapi Raja Saul mangkada lako joo imang, apa samarongka-rongkanami to tau jio tendana to-Filistin, iamo joo nakuamo Raja Saul, <<Danggiqmo mualai.>> 20 Malemi to Raja Saul sola tentarana to nasolan lako joo nanii tau sirari. Ia tonna ratumo lako, nakitami to to-Filistin liwaq laqdaq sirongka, napada iamo sipatean mpake laqboh landona. 21 Na ia to to-Ibrani masainmo torro jio tana Filistin naturuq male parari, kannori mentaqpa lako tentarana Raja Saul sola Yonatan nnewa to-Filistin. 22 Susi toomi to to-Israel membuni jao membuntunna tana suku Efraim, tonna saqdingngi kumua sipalaianmi to to-Filistin, mentaqpa lakoi padanna to-Israel, namale rrarii to-Filistin. 23 Susimi joo PUANG Allataala mpasalamaq to-Israel joo allo. Na ia to ngenan nanii sirari naliwanni to kota Bet-Awen.
Teqda najaji Yonatan dipatei
24 Ia joo allo gaja boqjoqmi to tentarana Raja Saul na tangbarah toomi, sabaq nasuai Raja Saul massumpa kumua, <<Ditampakki ropu, ke denkiq llepaq kande ratu lako kabuh allo, ke teqdapi kupabalahhii to ewakuq.>> Iamo nateqda bang tau llepaq kande. 25 Ia tonna ratu tama pangngalah, liwaq buda serang anean nakita, 26 apa teqda bang mesaq tau ssarai llepaqi joo canik lolong-lolong, sabaq malajaqi nakanna passumpana. 27 Apa teqda naissenni Yonatan kumua mangkai Raja Saul ssua tentarana massumpa susi joo. Nacummui Yonatan to tekkenna tama serang anean, napalakoi limanna nalepaqi. Taqpa memmawatang poleqmi namasumangaq. 28 Denmi mesaq tentara mangkada lako Yonatan nakua, <<Sitonganna tangpakulle ngasanmokan, apa mangkamokan nasua ambeqtaq massumpa kumua ditampakki ropu ke denni tau llepaq kande ratu lako kabuhna allo.>> 29 Mebalii Yonatan nakua, <<Takkaliwaq joo napugauk ambeqkuq lako bangsataq! Kitari mangkangkuq llepaq caniq, memmawatang poleqmoq kumasumangaq. 30 Ia kenna la nneloranni to tentara ngkandei to kande mangka narampa jio mai ewa, la laqbi budapa to to-Filistin dipatei.>>
31 Ia joo allo sirarii tentara to-Israel na to-Filistin mangpamula jio mai kota Mikhmas ratu lako kota Ayalon, napatalo to to-Israel. Gaja boqjoqmi, 32 napada nnala domba na sapinna ewana, nataqpa nggereqi jiong litak, natunui napasikande bangngi rarana. 33 Napaumi tau lako Raja Saul nakua, <<Tabeq raja! Ia to surudaduntaq madosami lako PUANG Allataala, sabaq ngkandei jukuq denpa rarana.>> Nakuamo Raja Saul, <<Teqda mituruq parenta-Na Puang Allataala. Lolinni mai to batu tonggo!>>b 34 Nakuapa Raja Saul lako to tompauanni joo kareba nakua, <<Male kamuq lleleii to tentara misuai mbawai to sapinna sola dombana jio mai, nadigereq jao ntee batu, nawaqding dikande. Danggiq nakandei to jukuq denpa rarana, danggiq namadosa lako PUANG Allataala.>> Ia joo bongi nabawa ngasanmi lako joo ngenan nanii batu to patuoan narampa, nagereqi. 35 Napakeqdehmi Raja Saul to ngenan pangkaroban lako PUANG Allataala. Iamo joo pamulanna nanii Raja Saul mpakeqdeh ngenan pangkaroban lako PUANG Allataala.
36 Nakuamo Raja Saul lako tentarana, <<Ia tee bongi la malekiq nnulaq to-Filistin ratu lako makaleq, tarampaii sola tapatei ngasanni.>> Mebalii to tau nakua, <<Ieq melomi, tapugaukmi apa to tasanga melo.>> Apa nakua joo imang, <<Melo ke mekutanakiq joloq lako Puang Allataala, apara to la tapugauk.>> 37 Mekutanami Raja Saul lako Puang Allataala nakua, <<Oo Puang Allataala, waqdingraka kirarii to to-Filistin? La Taben unarakannika kapataloan tee kamiq to-Israel?>> Apa teqda Napebalii Puang Allataala joo wattu. 38 Nakuamo Raja Saul lako sininna komandan tentara kumua, <<Male kamuq mai sola ngasan, taparessai indamora to mpugauk dosa tee allo? 39 Massumpanaq mpau sangan-Na PUANG Allataala to tuo, to mangka mben kapataloan to-Israel kumua, ia to tompugauk dosa la dipatei, moi na anakkuq Yonatan.>> Apa teqda bang mesaq tau barani mpebalii.
40 Nakuamo Raja Saul lako sininna tentarana nakua, <<Ntuu ngasan kamuq joo jenjen, kuntee sola anakkuq Yonatan.>> Mebalii to tau nakua, <<Tapugaukmi apa to tasanga melo.>> 41 Mekutanami Raja Saul lako Puang Allataala nakua, <<Oo PUANG Allataala to kisompa, ciapari na teqda Tapebaliinaq tee allo? Tapattantui mpake undi. Ia ke akuq baqtu Yonatan to sala, Tapebaliinaq mpake batu Urim. Ia ke ummaq-Taq to sala, Tapebaliinaq mpake batu Tumim.>> Na ia to pebalin-Na Puang Allataala batu Urim, battuananna Yonatan sola Raja Saul to sala, tangngia surudadu.c 42 Nakua omo Raja Saul, <<Pattantui mpake undi akuqraka to sala, Yonatanraka?>> Na Yonatan to sala. 43 Nakuamo Raja Saul lako Yonatan, <<Apara to mangka mupugauk?>> Mebalii Yonatan nakua, <<Mangkanaq ncummui tee tekken tama canik, kualai ciqdiq kulepaqi. Sadianaq dipatei.>>
44 Nakuamo Raja Saul, <<Ee Yonatan, ia ke teqda mudipatei, akuq la Nasessa laqdaq Puang Allataala.>> 45 Apa nakua tentarana Saul, <<Teqda nasipatoq dipatei to Yonatan, sabaq sitonganna iara mbaraniankiq tapatalo. Pamabelai to susi joo! Massumpakan mpau sangan-Na PUANG Allataala to tuo kumua, danggiq lalo nadipataqpai lima. Patalokiq too allo, sabaq pangtulung-Na Puang Allataala lako Yonatan.>> Susimi joo nateqda najaji dipatei to Yonatan napasalamaq tobuda.
46 Mangkai joo too pajami Raja Saul nnulaq to-Filistin, napole to to-Filistin lako kampongna.
Kaparentanna Raja Saul
47 Ia to Saul tonna menjaji rajanamo to-Israel, malei rrarii sininna ewana to siandahna tana Israel, susinna to-Moab, to-Amon, to-Edom, sininna rajana tana Zoba, na to-Filistin. Na ia ke nararii, tuli patalo to Raja Saul. 48 Gaja barani parari, natalo tooi to to-Amalek, napasalamaqi to to-Israel jio mai torrampa bang apanna.
49 Ia to anakkana Raja Saul muane disanga Yonatan, Yiswi na Malkisua. Den too dua anakkana baine Raja Saul. Ia to pamungah disanga Merab na adinna disanga Mikhal. 50 Ia to bainena Raja Saul disanga Ahinoam anakkana Ahimaas. Na ia to panglima tentarana disanga Abner anakkana Ner, ambequrena Raja Saul. 51 Ia to ambeqna Raja Saul disanga Kish, na ia to ambeqna Abner disanga Ner. Ia to ambeqna Kish sola Ner disanga Abiel.
52 Padai masainna Raja Saul mangparenta, pada tooi masainna to rari liwaq laqdaq nnewa to-Filistin. Ia ke nakitai Raja Saul to tobarani na mawatang, taqpa naalai menjaji tentarana.