Raja Saul nnewa to-Filistin
13
Matonaqmo Saul tonna diangkaq menjaji rajana to-Israel. Duang taunmi mangparenta, 2 napileii tallungsaqbu to to-Israel. Duang saqbu nasolan Raja Saul, napajio kota Mikhmas na den too napajao membuntunna siandah kota Betel. Na ia to sangsaqbu malei sola Yonatan anakkana Raja Saul lako kota Gibea tana suku Benyamin. Na ia to to-Israel teqda nadipilei, disuai pada pole lako bolana.3 Nasaqdingngi to-Filistin kumua napateimi Yonatan to baqtu pira-pira tentarana to-Filistin jio kota Geba. Iamo napangpesuanni Raja Saul nadipannoni to tarompeq, nasaqdingngi tau llan sininna tana Israel, sabaq nakua llan penawanna kumua, <<Akeq nasaqdingngi to-Ibrani naturuq ngasan male parari.>> 4 Susimi joo nasaqding sininna to-Israel kumua, mangkami natalo Raja Saul to baqtu pira-pira tentarana to-Filistin, iamo nagaja baqci lako to-Israel. Disua ngasanmi to to-Israel undi nturuq Raja Saul lako kota Gilgal male parari.
5 Sirempun todami to to-Filistin sadia la rrarii to-Israel. Den tallungsaqbu keretana, annan saqbunna tentara mangnyarang, na ia to tentara lumingka susi kassiq budanna. Malei deq kota Mikhmas jio kadellekanna kota Bet-Awen na jao nanii mangtenda. 6 Ia tonna kitai to-Israel kumua la disolangngimi, sipalaianmi male membuni. Den to mentama loqkoq batu, den to membuni jiong garuang, den to malai deq buntu, den to mentama allaq batu, den to mendoq bubun. 7 Den too to male llambanni Saqdan Yordan mangnguju lako tana Gad sola tana Gilead, na ia to Raja Saul jio bang unai kota Gilgal na ia to toundi nturuqi simbeqberan malajaq.
8 Pitung allomi Raja Saul ntajan Nabi Samuel jio kota Gilgal susi to najanjianni Nabi Samuel. Apa teqdapa naratu, namalemo to taunna Raja Saul sisarak-sarak ssalaii.a 9 Iamo namangkada Raja Saul nakua, <<Bawannaq mai to karoba ditunu sola karoba dipasalamaq.>> Napassompanmi Raja Saul joo karoba ditunu. 10 Mangka mandai Raja Saul mpangkarobanni, timbaqmi Nabi Samuel. Malemi Raja Saul ntammuii, nasujuqi. 11 Apa mekutanai Nabi Samuel lako Raja Saul nakua, <<Apara iko tuu mupugauk?>> Mebalii nakua, <<Kukitai to taungkuq malemi sisarak-sarak ssalainaq, nateqda unapa taratu, na nadeteqmi to wattu tapattantu, na ia to to-Filistin sirempunmi jio kota Mikhmas, 12 kumangkada llan penawangkuq kumua, <La mbaraniannaq kalekuq mpassompan karoba ditunu, sabaq cinggaqtuqmora naratu to to-Filistin indeq kota Gilgal rrariinaq, na teqdapa kumetaqda tulung lako PUANG Allataala.> >>
13 Nakuamo Nabi Samuel lako Saul, <<Mangpanggaukan tobangoqko. Teqda muturuqi to parenta-Na PUANG Allataala to mangka Naparentanko, nasitonganna Naakkattaimo PUANG Allataala kumua iko na batiqmu la mparenta to-Israel teqda cappaqna. 14 Jaji teqdamo nalamasain to kaparentanmu. Denmo tau laen Napilei PUANG Allataala to napumasannang penawan-Na la menjaji rajana ummaq-Na, sabaq teqda muturuqi to parenta-Na.>>b
15 Malemi Nabi Samuel jio mai kota Gilgal lako kota Gibea tana suku Benyamin. Na ia to Saul mparessa tentarana agi-agi den annan ratuh budanna, 16 namaneq male sola Yonatan anakkana na tentarana lako kota Geba tana suku Benyamin na jio nanii mangtenda. Na ia to to-Filistin mangtenda jioi kota Mikhmas. 17 Ia joo wattu den tallung torroan parampoqna to-Filistin, den to mangnguju lako kota Ofra tana Syual, 18 den to mangnguju lako kota Bet-Horon, na den to mangnguju lako padang pallawangan deqna Lombok Zeboim.
19 Ia joo wattu teqda lalo pande bassi jio tana Israel. Ia to to-Filistin teqda naeloran to-Israel menjaji pande bassi, sabaq malajaqi ke maccai ngkabuaq laqboh lando sola doke. 20 Jaji ia to to-Israel ke la mpematarannii tengkona, bingkungna, wasena sola pesaeqna, malepi lako to-Filistin. 21 Simesaq doiq peraqc nabajaranni ke mpematarannii wasena sola mpemeloi perambi sapinna,d na sidua doiq peraq ke mpematarannii tengkona sola bingkungna. 22 Iamo na ia tonna la sirarimo jio kota Mikhmas, moi mesaq laqboh lando baqtu doke teqda lalo naampui tentarana Raja Saul sola tentarana Yonatan. Raja Saul manda sola Yonatan to nnampuii.
23 Na ia to sangtorroan tentarana to-Filistin malei mangronda njagai lalan jio lombok allaq buntu siandah kota Mikhmas.