Cappaq pepasanna Nabi Samuel
12
Mangkadai Nabi Samuel lako to-Israel nakua, <<Mangkami kupugauk to petaqdammi, kuangkaqmi to mesaq raja. 2 Mangpamula tee allo iamo joo raja la mparenta kamuq. Matuamoq na ubananmoq, na simatonggo ngasanmi to anakkuq. Sipamula malolleqkuq ratu lako too allo kunii mangparenta. 3 Keqdehnaq ntee jio olo-Na PUANG Allataala sola jio olona raja to mangka Napilei. La misaqbiinaq, denraka kualai kamuq sapinmi iarika keledaimmia? Denraka kurampai to kasugiranmi? Denmoraka kuuraga kamuq iarika mpandasa kamuq? Denmoraka kutarima sogoq kumangraqtah tangmaruruh? Pauannaq ke denmi kualai to tangsipatoqna, kupapole poleqi.>> 4 Mebalii to to-Israel nakua, <<Teqdara tarampaikan nateqda too naden tapandasakan sola teqda lalo tatarima sogoq.>> 5 Nakuamo Nabi Samuel, <<PUANG Allataala sola raja to Napilei ssaqbii tuu kadammi too kumua, teqda lalo salakuq lako kamuq.>> Mebalii to tau nakua, <<Ieq, Puang Allataala ssaqbii.>>6 Nakuamo Nabi Samuel lako to-Israel, <<Ieq, PUANG Allataala ssaqbii. Iamo to mangka mpilei Nabi Musa sola Imang Harun, to ssolan tojolomi messun llan mai tana Mesir.b 7 Puang Allataala la mangraqtah too. Iamo joo keqdeh kamuq ntee sola ngasan mipesaqdingnginaq. Kupangngingaran kamuq to kameloan mangka Napugauk Puang Allataala lako kamuq sola lako tojolotaq. 8 Ia tonna mellelemo Yakub sola repokkona lako tana Mesir, nasessai to-Mesir to batiqna, nametaqda tulung to tojolomi lako PUANG Allataala, Nasuai PUANG Allataala to Nabi Musa sola Harun ssolanni messun llan mai tana Mesir, Naeloranni ntorroii tee tana Israel.c 9 Apa Napupangngelohnai Puang Allataala nataloi Sisera panglima tentarana to-Hazor sola to-Filistin na rajana to-Moab, sabaq napabokoqii penawa to-Israel to PUANG Allataala to nasompa.d 10 Menassanni to tojolomi lako PUANG Allataala nakua, <Madosamokan, sabaq kipabokoqimi-Kiq penawa, kannorakan male ssompa dewata Baal sola Asytoret. Metaqdakan Talaqparankan jio mai kuasanna ewakiq kimassompa matiq kale-Taq.>e 11 Gideon, Barak, Yefta namaneq akuq Napake PUANG Allataala llaqparan kamuq jio mai ewami to misiandan, mimanyaman torro.f 12 Apa ia tommikitai to Nahas rajana to-Amon la rrarii kamuq, ciaqmo kamuq ntarimai ke PUANG Allataala mparenta kamuq, mikua ora lako akuq, <Teqda! Nang la rajapi mparentakan,> na sitonganna PUANG Allataala to rajami.g 13 Jaji kitami! Indeqmi to raja mangka mipilei, na Nabenmo kamuq PUANG Allataala. 14 Ia ke daqtan kamuq ngkalajaq-ngkasiriq-I, misompa-I, mituruq-I to parenta-Na, la melo katuoanmi sola rajami. 15 Apa ia ke teqda mituruq parenta-Na PUANG Allataala, kannori miewa, PUANG Allataala kale-Na la nnewa kamuq sola rajami. 16 Danggiqpa mipole joloq, la ngkita kamuq to liwaq mejangngaran la Napugauk PUANG Allataala. 17 Moi napebarrangan too, apa la metaqdanaq lako PUANG Allataala Naparatu galugu sola uran, iamo minii nnissenni kumua liwaq laqdaq to dosa mipugauk jio olo-Na PUANG Allataala, sabaq mpetaqda kamuq mesaq raja.>> 18 Massambajangmi Nabi Samuel, na ia bang unamo joo wattu Napupenggalugui PUANG Allataala to langiq Napupembanasai to uran, naliwaq simalajatan to tau lako PUANG Allataala sola lako Nabi Samuel. 19 Nakuamo to-Israel lako Nabi Samuel, <<Passambajangankan tee kamiq kaunantaq lako PUANG Allataala to tasompa, danggiq kimate, sabaq ia tee panggaukankiq mpetaqda raja kannori mpakerangngan dosakiq.>>
20 Nakuamo Nabi Samuel, <<Danggiq mimalajaq! Tongan kumua mangkamo kamuq mpugauk kasalan, apa danggiq mipaja nturuq parenta-Na PUANG Allataala, mipalantuk tongan penawammi ssompa-I. 21 Danggiq mimale nturuq dewata to teqda nakullei ntulung kamuq na teqda too nakullei mpasalamaq kamuq, sabaq teqda buaqna joo mipudewata. 22 Pakkaeloran-Na Puang Allataala Napuummaq kamuq. Iamo nateqda Nalassalai kamuq, sabaq Najagai to sanga malaqbih-Na danggiq nacaccai tau. 23 Ia tee akuq, la daqtannaq mpassambajangan kamuq dikua nadanggiq kumadosa lako PUANG Allataala. La daqtannaq nnajahhi kamuq kameloan sola kamarurusan. 24 Iara to kumua la ngkalajaq-ngkasiriq kamuq PUANG Allataala, na lantuk tongan penawammi ssompa-I. Ingaranni to sininna panggaukan liwaq mejangngaran to mangka Napugauk lako kamuq. 25 Apa ia ke daqtan bang kamuq mpugauk dosa, nang la dilanynyaqi kamuq sola rajami.>>