Saul ntaloi to-Amon
11
Mangkai joo too, ia to Nahas rajana to-Amon male sola tentarana ntalimbung kota Yabesh jio tana Gilead. Nakuamo to to-Yabesh lako Raja Nahas, <<Ia ke mpadenkiq kasitujuan, mengkatalokan.>> 2 Mebalii Raja Nahas nakua, <<Iapi naden kasitujuantaq ke kucukkeqi ngasanni to mata kananmi, tanda kadipakasirisanna to to-Israel.>> 3 Nakuamo tomatua-tua to-Yabesh, <<Benkan wattu pitung allo kisuapa tau male lako padangkiq to-Israel, na ia ke teqdai ngkullei ntulungkan, maneqkan menturuq matiq.>>4 Disuami baqtu pira-pira to to-Yabesh male lako kota Gibea to nanii torro Saul. Ia tonna ratumo lako kota Gibea, napaumi to pepasan lako to-Israel. Kumarrakmi to to-Israel mpeandongngi gamaranna. 5 Timbaqmi Saul pole jio mai baraqbahna undi nturuq sapinna, namekutana nakua, <<Ciapari nasikumarrakan to tau?>> Nacuritanmi to apa napau joo to-Yabesh. 6 Ia tonna saqdingngi Saul joo curita, nakuasaimi Roh Allataala. Liwaqi magalli 7 na nnala sangpasang sapin nataqtak-taqtakki, namaneq ssuai to tau male ntawai lako sininna tana Israel, namepasan kumua, <<Inda-inda to ciaq nturuq Saul sola Nabi Samuel male parari, ia to sapinna la ditaqtak-taqtak tooi susi tee.>> Malajaqmi to to-Israel ke Naparatuanni abalaq PUANG Allataala, iamo namale ngasan turuq parari. 8 Sirempunmi jio kota Bezek narekenni Raja Saul, den talluratuhpa saqbu to-Israel na tallung pulo saqbu to-Yehudaa. 9 Dikuanmi to todisua jio mai kota Yabesh tana Gilead kumua, <<Pauanni to-Yabesh kumua, ia ke kamalussu-lussuannami allo masawa, naratu to tolantulung kamuq.>> Ia tonna polemo joo todisua, gaja rioi to to-Yabesh ssaqdingngi joo kareba. 10 Nakuamo to to-Yabesh lako Raja Nahas, <<Masawapi kimaneq menturuq. Apa bangmo to misanga melo, iamo migaukankan.>>
11 Ia joo bongi natawa tallui Saul to taunna, na ia tonna la mariwangmo, natamaimi to nanii mangtenda to-Amon, nararii, nateqdapa natangnga allo natalomi. Na ia to tolaqpah unapa malei sipalaian simesaq-mesaq.
12 Nakuamo to to-Israel lako Nabi Samuel, <<Benkan kipateii to tomangkada kumua, <Na la ia toda ora ia to Saul la menjaji rajataq?> >> 13 Apa nakua Saul, <<Teqda nawaqding den tau dipatei tee allo, sabaq ia tee allo Nanii PUANG Allataala mpasalamaq to-Israel.>> 14 Nakuamo Nabi Samuel lako to-Israel, <<Tamalemo lako kota Gilgal, na jio dinii mpasah poleqi to Saul menjaji raja.>> 15 Male ngasanmi lako kota Gilgal na jio nanii mpaassahhi to Saul menjaji raja jio olo-Na PUANG Allataala. Namaneq mpassompan karoba dipasalamaq lako PUANG Allataala. Gaja rioi to to-Israel sola Raja Saul namangmaroah-roah.