Samuel nnangkaq Saul menjaji raja
10
Naalami Nabi Samuel to mesaq bitoloq nanii minynyak zaitun, nabolloii to ulunna Saul, namaneq nnudungngi, namangkada nakua, <<Mangkamoko Napilei PUANG Allataala menjaji rajana to-Israel. Ikomo la mparenta ummaq-Na PUANG Allataala, mulaqparanni jio mai sininna ewana. Ia to tandana kumua assahmoko Napilei PUANG Allataala menjaji raja ummaq-Na susi tee: 2 Ia tee allo, ke mpatarruhko kalingkanmu, la sitammuko dua muane jio siandah lamunanna Rahel, jio kampong Zelzah tanana suku Benyamin. La mangkadai lako iko nakua, <Ia to keledai muangah diampaqmi. Na tangngiamora keledai to napikkiriq ambeqmu, apa ikomora to nanawa-nawa nakua, <<Apamora la kupugauk kuampaqi to anakkuq?>> > 3 La mpatarruhko kalingkanmu, ratu lako garontoq kaju tarbantin jio Tabora, jio la nanii mpessitammuiko tallu muane to la endek deq kota Betel la massompa lako Puang Allataala. Mesaq rrenden anak beke tallu, mesaq mbawa roti mapipang tallu, na mesaq mbawa ngenan waib nanii anggur. 4 La nakua, <Male umborikiq?> namaneq mbenko roti mapipang dua, mualai. 5 Mangkai joo too mpatarruhmoko kalingkanmu mudeteq kota Gibea jao buntun-Na Puang Allataala to nanii tentarana to-Filistin. Na ia ke mentamamoko kota, la sitammuko sangrombongan nabi, pole jao mai buntu dinii mangkaroba. Den tonjoloanni mpannoni gambus, rebana, suling na cuqbekan, na den to manggelluq-gelluq nasimeoli-olian. 6 Ia joo wattu la Nakuasaiko Roh Allataala, nadibarui to penawammu, mumenjaji tolino laen na ia to biasanna, muturuq manggelluq-gelluq sola meoli-oli. 7 Ia ke jaji ngasanmi joo tanda lako iko, pugaukmi to musanga melo, sabaq Nalendungngiko Puang Allataala. 8 Jolomoko lako kota Gilgal mutajannaq jio, ingaranni pitung allopi kuundi lako mpassompan karoba ditunu sola karoba dipasalamaq, kumaneq mpauanko to la mupugauk.>>9 Ia tonna membokoqmo Saul la sisarak Nabi Samuel, Nabaruimi Puang Allataala to penawanna. Na jaji ngasan to tanda mangka napauanni Nabi Samuel joo allo. 10 Ia tonna ratumo Saul sola pangjamana lako kota Gibea, sitammumi sangrombongan nabi. Nakuasaimi Roh Allataala to Saul, naturuq manggelluq-gelluq sola meoli-oli susi to napugauk joo sangrombongan nabi. 11 Ia to tonnissen sipaqna Saul mellao jiona mai, sijangngaran ngkitai joo napugauk nasipangkada-kada nakua, <<Apamora jaji lako joo anakkana Kish? Menjaji nabimiraka ia?>> 12 Den sala mesaqna totorro llan joo kota mangkada nakua, <<Indara ia ambeqna tuu lako nabi?>> Iamo joo pamulanna naputuleqi tau kumua, <<Nabi todamiraka to Saul?>>c
13 Ia tonna mangkamo Nakuasai Roh Allataala to Saul, malemi deq ngenan dinii mangkaroba jao buntu. 14 Sitammumi ambequrena to Saul sola pangjamana nakutanaii nakua, <<Pole umbora kamuq?>> Mebalii Saul nakua, <<Polekan nnangahhi joo keledai, apa teqda kiampaqi, kimale lako Nabi Samuel.>> 15 Nakuamo joo ambequrena Saul, <<Curitai kee, apara nakuan kamuq Samuel?>> 16 Nakuamo Saul, <<Nakuankan diampaqmi joo keledai.>> Apa teqda nacuritai Saul kumua mangkami naangkaq Nabi Samuel menjaji raja.
Saul menjaji rajana to-Israel
17 Nasuai Nabi Samuel nasirempun to to-Israel jio kota Mizpa la mangngolo lako PUANG Allataala. 18 Nakuamo Nabi Samuel, <<Susi tee kadan-Na PUANG Allataala to tasompa kitaq to-Israel Nakua, <Mangkamo kamuq Kulaqparan jio mai kuasanna to-Mesir, Kusolan kamuq messun llan mai tana Mesir, na Kulaqparan too kamuq jio mai kuasanna sininna bangsa to mpandasa kamuq. 19 Mangkamo kamuq Kupasalamaq jio mai sininna abalaq sola kamasussan. Apa ia too ciaqmo kamuq nnakui-Naq, mikuara mangkada, <<Teqda! Nang la Tapileankan mesaq raja.>> Iamo joo mangngolomo kamuq lako Akuq PUANG Allataala, sisangbatiq llan mai simesaq suku.> >>
20 Nasuami Nabi Samuel napada mangngolo to suku to-Israel, nadipilei mpake undi, na suku Benyamin to nakanna undi. 21 Mangkai joo too, disuami mangngolo sisangbatiq to suku Benyamin. Na batiqna Matri to nakanna undi. Namaneq disua mangngolo to batiqna Matri na sanganna Saul anakkana Kish to nakanna undi. Apa ia tonna diangah, teqdai dikita. 22 Iamo namekutana to tau lako PUANG Allataala nakua, <<Ratu toorika joo tau indeq?>> Mebali-I PUANG Allataala Nakua, <<Membunii jio allaq parewa dipake parari.>>
23 Taqpa malemi lari to tau ntambai Saul nasolanni jio mai. Ia tonna keqdeh llan allaqna tobuda, angge kamalaqna ngasanri Saul tuu lako tau. 24 Mangkadami Nabi Samuel lako to-Israel nakua, <<Iamo tee to to-Napilei PUANG Allataala. Teqda tau nasusian llan bangsami.>> Siarrakanmi to tau nakua, <<Dennaa upaq namalambeh sungaq raja.>>
25 Mangkai joo too napamanassai Nabi Samuel lako tobuda, apa to sipatoq la napugauk raja, sola apa to sipatoq napuapa raja, naukiqi llan mesaq suraq, napajioi olo-Na PUANG Allataala llan Bola Puang Allataala. Mangkai joo too nasuami to tau pada pole lako bolana. 26 Pole todami Saul lako bolana jio kota Gibea, Napamasumangaqi Puang Allataala to pira-pira pangbarani na undi nturuq Saul. 27 Apa den to tomangpanggaukan gajaq mangkada nakua, <<Na la ia toda ora ia joo tau la mpasalamaqkiq.>> Teqda naanggaqi to Saul nateqda too nabenni to sipatoqna la naben lako raja. Apa naanggaiq bang Saul teqda nasaqdingngi joo kadanna.