Saul sitammu Nabi Samuel
9
Den mesaq tosugih namatongko jio mai batiq suku Benyamin disanga Kish, anakkana Abiel, ampo jajianna Zeror, ampo uttuqna Bekhorat, ampo gariginna Afiah. 2 Den anakkana pea muane magarattaq namelo pangkaleanna disanga Saul. Teqda to-Israel ncauq garattaqi, teqda too ncauq tandei, angge kamalaqna ngasanra to tau laen.3 Ia to Kish ambeqna Saul den baqtu pira-pira keledainnaa baine taqde. Nakuamo lako Saul anakkana, <<Tambaii mesaq to pangjamataq mimale nnangahhi joo keledaintaq.>> 4 Malemi Saul sola joo pangjamana llingkai membuntunna Efraim sola tana Salisa, apa teqda naampaqi joo keledainna. Mpatarruhmi kalingkanna nnola tana Sahalim, apa teqda too naampaqi. Male poleq omi llingkai tana suku Benyamin, apa teqda unapa naampaqi. 5 Ia tonna ratu lako tana Zuf, nakuamo Saul lako joo pangjamana, <<Tapole bangmo! Iamo ke kitaqmora nanawa-nawa ambeqkuq tangngiamo joo keledai.>> 6 Nakuamo joo pangjamana, <<Doppa joloq! Den nabi llan tee kota, gaja nataratteq tau, nateqda naballe to kadanna. Tamale sikita mbai nawaqding mpauankiq umbo nanii joo keledai.>> 7 Nakuamo Saul, <<Apa la tabawanni ke malekiq sikita? Na cappuqmi to kinallotaq, na teqdamo apa la tabenni.>> 8 Nakuamo joo pangjama, <<Den unapa doiqkuq indeq mesaq peraq. Iamo tabenni napauankiq umbo nanii joo keledai.>> 9-11 Mebalii Saul nakua, <<Melomi, tamalemo!>>
Malemi deq kota to nanii joo nabi. Ia tonna tukaqmo, sitammumi baqtu pira-pira anaqdara la male mewai. Nakutanaimi joo anaqdara nakua, <<Jao unarika to topaissen?>> Ia joo wattu, ia to nabi disanga topaissen. Jaji ia ke denni tau madoang mekutana lako Puang Allataala nakua susi tee, <<Tamale mpekutananni lako topaissen.>>
12-13 Mebalimi joo anaqdara nakua, <<Ieq denni, tangmasainpa liunna mitimbaq. Madoiq-doiqmo kamuq mbai mideteq unapi. Maneq mentamanna kota, sabaq den pangkaroba la nakande tobuda too allo jao buntu. Na iapi namaneq kumande to tobuda ke mangkami nasambajangngi joo karoba. Madoiqmo kamuq male, mbai mideteq unapi llan kota, namaneq tukaq deq buntu.>> 14 Malemi Saul sola pangjamana deq kota. Ia tonna mentamamo babangan kota, sitammumi Nabi Samuel la male deq buntu ngenan dinii massompa.
15 Dikua sangngallopi naratu Saul, Napau jolomi PUANG Allataala lako Nabi Samuel kumua, 16 <<Masawa agi-agi tatteq pada tee, la Kupasitammuko mesaq muane to-Benyamin. Iamo la muangkaq menjaji raja, to la llaqparan taung-Kuq jio mai to-Filistin, sabaq Kusaqdingmi to sarrona taung-Kuq na Kukitamo to kamaparrisanna.>>
17 Ia tonna kitami Nabi Samuel to Saul, Nakuamo PUANG Allataala lako Nabi Samuel, <<Iamo tee to tau mangka Kupauanko ssangboq. Iamo la mparenta taung-Kuq to-Israel.>> 18 Napendeteqimi Saul to Nabi Samuel jio toq babangan kota nakutanaii nakua, <<Tabeq la mekutananaq! Umbora nanii bolana to topaissen-issen?>> 19 Mebalii Nabi Samuel nakua, <<Akuqmo to topaissen-issen. Jolomo kamuq deq to dinii massompa jao buntu, sabaq la kumandekiq sola tee allo. Manikaleqpa kumaneq mpebalii to sininna pekutananmi, mimaneq pole. 20 Danggiqmo nasussaiko to keledaimmu tallung allomo taqde sabaq diampaqmi. Ia to sininna makeanggaqna indeq tana Israel la mupunnai sola keluargana ambeqmu.>> 21 Mebalimi Saul nakua, <<Ia tee akuq suku Benyaminnaq, iamo suku biccuqna jio mai suku to-Israel, na kamiqmo batiq to kaminang tangdianggaqnaq jio mai suku Benyamin. Matumbai tamangkada susi tuu lako akuq?>>
22 Nasolanmi Nabi Samuel to Saul sola pangjamana lako ngenan maluangan llan bola, nasuai cumadokko jio ngenan kaminang dianggaq jio olona toratu agi-agi den tallung pulo tau. 23 Mangkai joo too, nakuamo Samuel lako tomannasu, <<Palennaqmi to jukuq mangka munasu to kusuangko mpassalai nnenaq.>> 24 Naalami joo tomannasu to jukuq upab sola loppo upa mangka nakasarai, napalennaqi jio olona Saul. Nakuamo Nabi Samuel, <<Ia tee jukuq jio olomu la mukande, kupassala jolo jio mai to la nakande toratu llan tee pangramean. Takumandemo!>> Kumandemi Saul sola Nabi Samuel joo wattu. 25 Mangkai joo too polemi jao mai buntu dinii massompa, namale Nabi Samuel sola Saul na pangjamana doq kota. Ratumi lako bola, nasipangkada-kada Nabi Samuel sola Saul jao loteng.
26 Makaleq unapa, natundanmi Nabi Samuel to Saul nakua, <<Miqcokmoko, kumale ssolanko lako randan kota.>> Miqcokmi Saul namale ssolanni. 27 Ia tonna ratumo lako randan kota, nakuamo Nabi Samuel lako Saul, <<Suami najolo tuu pangjamamu, tatorropa joloq ntee cinggaqtuq, den pepasan jio mai Puang Allataala la kupauanko.>>