Madoangngi to to-Israel ke raja mparentai
8
Ia tonna matuamo Samuel, naangkaqmi to dua anakkana muane menjaji tomangraqtah kara-karana to-Israel. 2 Ia to anak pamungahna disanga Yoel, na mangpenduanna disanga Abia. Iamo joo dua anakkana menjaji tomangraqtah kara-kara jio kota Bersyeba. 3 Apa teqda nasusi panggaukanna ambeqna joo anakkana. Teqda namaruruh rraqtah kara-kara, nnangah bangri saro sola ntarima sogoq.4 Iamo joo nasirempun to tomangparentana to-Israel namale lako Nabi Samuel jio kota Rama, 5 nakuamo lako Nabi Samuel, <<Matuamikiq na teqda nasusi sipaqtaq to dua anakkataq. Jaji, melo ke tapileankan mesaq tau, taangkaqi menjaji rajakiq susi bangsa laen naparenta raja.>>a 6 Apa teqda namasannang Nabi Samuel ssaqdingngi joo petaqdanna to-Israel kumua, <<Pileankan mesaq raja naparentakan.>> Iamo joo namassambajang Nabi Samuel lako PUANG Allataala. 7 Nakuamo PUANG Allataala, <<Tarima bangmi to sininna petaqdanna tuu matiq tau. Sabaq tangngia iko to tangnakabudai, apa Akuqra! Ciaqi ke Akuq menjaji rajana. 8 Susi bangmi joo to sipaqna pamula tong-Kusolanni messun llan mai tana Mesir ratu lako too allo. Teqda napesaqdingngi-Naq kannori ssompa sininna dewatanna bangsa laen, nasusi una joo teqda napesaqdingngiko. 9 Iamo joo tarima bangmi to sininna petaqdanna. Apa la mupamapahangngi tongan umbo susi carana ke raja mangparenta.>>
10 Naparatumi Nabi Samuel to kadan-Na PUANG Allataala lako joo bangsa to mpetaqda raja 11 nakua, <<Susi tee to carana ke raja mparenta kamuq: ia to anakkami muane la naparukui menjaji tentarana. Den to mangkereta, den to mangnyarang, den too to lari njoloan kereta. 12 Den piraq to la napupenjaji komandan surudadu, den to sisangsaqbu tentara na mesaq komandanna, den to silimangpulo na mesaq komandanna. Ia joo raja la naparuku to anakkami muane mbingkungnganni baraqbahna, den to nasua megandum, den to nasua nggaraganni baliliq, den too to nasua nggaraga parewa kereta dipake parari. 13 Ia to anakkami baine den to nasua nggaraga minynyaq-minynyaq busarungnguq, den to naputomannasu, den too to nasua manggaraga roti. 14 Ia to baraqbah anggurmi, baraqbah zaitunmi na baraqbah laenna to kaminang melona la naalai nabenni lako komandan tentarana sola tomangjamana. 15 Ia to asseleq anggurmi sola gandummi la naala tawa sangpulona, nabenni lako komandan tentarana sola tomangjamana llan istana na tomangjama laenna. 16 Ia to kaunanmi la muane la baine na keledaimmib sola sapinmi to kaminang melona, la naala napakei mpangjamanni. 17 Ia to dombami sola bekemi la naala tawa sangpulona. Na ia to kamuq napukaunan ngasan kamuq. 18 Ia joo wattu la sisumarroan kamuq, napusabaq panggaukanna joo raja mipilei, apa teqda Nalampesaqdingngii PUANG Allataala to sarromi.>>
19 Apa teqda namadoang mpesaqdingngii to Nabi Samuel, nakua ora, <<Akeqmo! Moi umbo susi, nang madoangkan naparenta raja. 20 Madoangkan susi to bangsa laen, raja rraqtahhi to kara-karakiq, najoloankan ke malekan parari.>> 21 Ia tonna mangkamo Nabi Samuel ssaqding kadanna to-Israel, napaumi lako PUANG Allataala. 22 Mebali-Mi PUANG Allataala nakua, <<Tarima bangmi to petaqdanna, mupileanni mesaq raja.>> Mangkai joo too nasuami Nabi Samuel to to-Israel pada pole lako bolana.