7
Malemi to to-Kiryat-Yearim nnalai to Patti Janjin-Na PUANG Allataala, nabawai lako bolana Abinadab jao buntu. Na Eleazar, anakkana Abinadab dipattantu la njagaii joo Patti Janji.aNabi Samuel menjaji tomangparentana to-Israel
2 Agi-agi duangpulo taunna joo Patti Janji torro jio kota Kiryat-Yearim. Pada toomi joo masainna nanii metaqda tulung to to-Israel lako PUANG Allataala. 3 Nakuamo Nabi Samuel lako to-Israel, <<Ia ke mengkatobaq tongan kamuq lako PUANG Allataala, caqbean ngasanni to tau-tau dewatanna bangsa laen sola tau-tau dewata Asytoret. Patuju lako tonganni PUANG Allataala to penawammi, na Ia manda misompa, la Nalaqparan kamuq jio mai kuasanna to-Filistin.>> 4 Nacaqbean ngasanmi to-Israel to tau-tau napudewata iamo to Baal sola Asytoret, na PUANG Allataala manda to nasompa.
5 Mangkai joo too nakua omo Nabi Samuel, <<Pasirempunni sininna to-Israel jio kota Mizpa, kupassambajangan kamuq lako PUANG Allataala.>> 6 Ia tonna sirempunmo to to-Israel jio kota Mizpa, pada ssiokmi wai natolloanni jio olo-Na PUANG Allataala menjaji passompan, napuasa too to tau joo allo. Napada mangkada kumua, <<Madosamokan lako PUANG Allataala.>> Jiomo kota Mizpa nanii Nabi Samuel mangpamula mangparenta sola rraqtah kara-karana to-Israel.
7 Ia tonna saqdingngi rajana to-Filistin kumua sirempunni to to-Israel jio kota Mizpa, malemi joo lima rajana to-Filistin sola tentarana rrarii. Simalajatanni to to-Israel sabaq nasaqdingngi kumua la ratu omi to to-Filistin la rrarii. 8 Nakuamo to to-Israel lako Nabi Samuel, <<Danggiq tapaja mpassambajangankiq lako PUANG Allataala to tasompa dikua Napasalamaqkiq jio mai to-Filistin.>> 9 Iamo joo naalai Nabi Samuel to mesaq anak domba nagereqi menjaji karoba ditunu puqpuh lako PUANG Allataala. Massambajangmi Nabi Samuel dikua Natulungngi Puang Allataala to to-Israel. Natarimai PUANG Allataala to sambajangna. 10 Ia tonna mukkun Nabi Samuel mpangkarobanni joo karoba ditunu puqpuh, narariimi to-Filistin to to-Israel. Ia bang unamo joo wattu Nampaden galugu tonggo PUANG Allataala jao langiq deqna to-Filistin. Nasumpalingan sipalaian napatalo to to-Israel. 11 Messunmi to tentarana to-Israel llan mai kota Mizpa male nnulaqi joo to-Filistin, nabulewanni to kota Bet-Kar.
12 Mangkai joo too nnalami mesaq batu Nabi Samuel napakeqdehhi jio parallaqna kota Mizpa na Yesana. Nasangaii Eben-Haezer, battuananna Batu Pangtulung, sabaq nakua Nabi Samuel, <<Angge ntee Nanii PUANG Allataala ntulungkiq.>> 13 Susimi joo to to-Filistin natalo to-Israel. Padai masainna Nabi Samuel mangparenta, teqda Naeloranni PUANG Allataala to to-Filistin rrarii to-Israel. 14 Sininna kota to narampa to-Filistin jio mai to-Israel, mangpamula jio mai kota Ekron ratu sauq kota Gat sola kampong to nasiandan, naala ngasan poleqmi to-Israel. Ia joo wattu sikalino toomi to-Israel sola to-Amori.
15 Ia to Nabi Samuel mangparenta jio tana Israel ratu lako matena. 16 Taun-taunni male llilingngi kota Betel, Gilgal na Mizpa, nanii rraqtah kara-karana to-Israel. 17 Mangkai joo too, pole omi lako kota Rama, to nanii torro na mparenta to-Israel. Jio toomo nanii mpakeqdeh ngenan pangkaroban lako PUANG Allataala.