Patti Janjin-Na Puang Allataala dipapole lako tana Israel
6
Ia tonna pitung bulanmo jio tanana to-Filistin joo Patti Janjin-Na PUANG Allataala, 2 natambaimi to-Filistin to imangna sola topakita-kitanna nakutanaii kumua, <<La diapamira joo Patti Janjin-Na PUANG Allataala? Umbo la takua mpapolei lako ngenanna?>> 3 Mebalimi to imang sola to topakita-kita nakua, <<Danggiq mipapole loqbangngi joo Patti Janjin-Na Puang Allataala ke mipapolei. Apa nang la mipasibawai karoba lako Puang Allataala to nasompa to-Israel, menjaji pelaqbak kasalanmi. Ia ke mipugaukki susi joo, la Napamondo kamuq. Iamo minii nnissenni ciapari Nasessa tarruh kamuq Puang Allataala to nasompa to-Israel.>> 4 Mangkai joo too mekutanami to to-Filistin nakua, <<Apara to pebajah kasalan la dipasibawanni?>> Mebalii to imang nakua, <<La mipasibawai joo Patti Janji lima bulawan malebu mangrupa bundang na lima bulawan mangrupa balao, sabaq limai rajana to-Filistin. Sabaq susimi joo to abalaq ngkanna kamuq sola rajami. 5 Jaji tampai to bulawan pasusii bundang sola balao to makkasolang llan tee tana Filistin. Tapakalaqbih tooi to Puang Allataala to nasompa to-Israel. Mbai Namadoang una mpapajai to pangsessa-Na lako kitaq sola lako dewatantaq na tanataq. 6 Apara buaqtaq membattuk susi rajana to-Mesir sola taunna tonna anuq? Ingaranni umbo nakua Puang Allataala ssessa Raja Mesir sola taunna, namaneq nneloranni to to-Israel ssalai tana Mesir. 7 Iamo joo pasadiai to mesaq keretaa na dua indo sapin, to cucu unapa anakkana, to teqda bangpa nadipake mangruiq kereta, iamo la rruiqi joo kereta. Ia to anakkana patamai bontongna, danggiq nameundi. 8 Alai joo Patti Janjin-Na PUANG Allataala, mipadeqi joo kereta. Na ia to bulawan mangka mitampa to pebajah kasalan, patamai patti biccuq, mipajioi saqde Patti Janjin-Na PUANG Allataala jao kereta, namale kalena joo sapin rruiq kereta mbawai. 9 La undi kamuq mpemataii, ia ke nnola lakoi lalan mangnguju lako kota Bet-Semes jio tana Israel, tongan kumua Puang Allataala to nasompa to-Israel mpakannaikiq sessa. Apa ia ke messalai jio mai joo lalan, battuananna tangngia Puang Allataala mpakannaikiq sessa, sirumparikiq nakanna.>>10 Napugaukmi to-Filistin susi joo. Nnalami dua indo sapin to cucu unapa anakkana, la ruiq joo kereta, na ia to anakkana napatamai bontong. 11 Napadeqmi kereta joo Patti Janjin-Na PUANG Allataala sola joo patti nanii bulawan mangrupa balao sola mangrupa bundang. 12 Taqpa malemi joo sapin rruiqi joo kereta rrundun tarruh bataq mangnguju lako kota Bet-Semes teqda namessala lako lalan laen, namangngoeq-ngoeq bang. Naundi tarruh joo lima rajana to-Filistin mpemataii, arannai nadeteq to lalan lako Bet-Semes.
13 Ia joo wattu ia to to-Bet-Semes megandummi jiong lombok. Ia tonna kitai joo Patti Janji, simarioanmi. 14-15 Kendenmi joo sapin jio toq batu matonggo jio baraqbahna Yosua to-Bet-Semes. Napupellaoi to-Lewi joo Patti Janjin-Na PUANG Allataala sola joo patti nanii bulawan, napatorro jaoi joo batu matonggo. Na ia bang unamo joo allo napiak-piakki to-Bet-Semes joo kaju kereta, naala tooi joo dua sapin rruiq kereta napangkaroban ditunu puqpuhhi lako PUANG Allataala. Nampugauk too karoba digereq napangkaroban lako PUANG Allataala. 16 Nakita ngasan joo lima rajana to-Filistin to napugauk to-Bet-Semes. Mangkai joo too, ia bang unamo joo allo napole lako kota Ekron.
17-18 Susimi joo to to-Filistin llan lima kota mbajah kasalanna, iamo to kota Asdod, Gaza, Askelon, Gat na Ekron. Ia joo lima kota den bentengna na den too kampong mengguririkkina. Ia to napake joo lima rajana to-Filistin mangbajah, iamo to simesaq bulawan mangrupa bundang na simesaq bulawan mangrupa balao. Ia to napubutti joo apa jaji, iamo to batu matonggo llan baraqbahna Yosua, to dinii mpatorroi joo Patti Janjin-Na PUANG Allataala. Naratu lako too allo denpa joo batu llan baraqbahna Yosua to-Bet-Semes.
19 Den pitungpulo to-Bet-Semes Napatei Puang Allataala, sabaq napenunui tama joo Patti Janjin-Na PUANG Allataala. Mbatingngi to to-Bet-Semes, sabaq liwaqi Nasessa PUANG Allataala.
Patti Janjin-Na Puang Allataala dipalele lako kota Kiryat-Yearim
20 Sipangkadami to to-Bet-Semes nakua, <<Teqda tau ssarai sioloan PUANG Allataala to malaqbih. Umbora la tanii mpalelei joo Patti Janjin-Na PUANG Allataala namabela jio mai kitaq?>> 21 Disuami to tau male lako to-Kiryat-Yearim mpau pepasan kumua, <<Napapolemi to-Filistin to Patti Janjin-Na PUANG Allataala. Male kamuq mai nnalai.>>