Patti Janjin-Na Puang Allataala jio tanana to-Filistin
5
Ia tonna mangka to-Filistin rrampai joo Patti Janjin-Na Puang Allataala jio Eben-Haezer, nabawai lako kota Asdod. 2 Naalai to-Filistin joo Patti Janji napatamai bola dewatanna, napajioi saqde tau-tau Dagon to napudewata. 3 Apa masawanna, melambik unapa, namentama bola dewatanna to to-Asdod, nakitai to tau-tau Dagon songka lumbang koko jiong litak jio olona joo Patti Janji, napajenjen poleqi jio ngenanna. 4 Ia tonna makaleq omo, nakitai joo tau-tau Dagon songka poleq omi. Ia to kalena jio olo Patti Janji, na ia to ulunna sola limanna dua, tipallekkoqi lako pellesean tama bola. 5 Iamo joo naratu lako too allo, ia to imangna dewata Dagon sola tomassompa jio Asdod, ianna mentama bola dewatanna, teqda nalesei to pellesean tama bola, apa natengkairi.6 Nasessai PUANG Allataala to tau jio kota Asdod sola kampongna, Napakannaii bundangan. 7 Ia tonna kitami to-Asdod joo apa rratuii, pada nakuamo, <<Tapapolemi tee Patti Janjin-Na Puang Allataala, danggiqmo patorroi indeq kampongtaq, sabaq Nasessamikiq Puang Allataala to nasompa to-Israel na Nasolangan toomi to Dagon dewatantaq.>> 8 Napetaqdai to-Asdod nasirempun to lima rajana to-Filistin nakutanaii nakua, <<La diapamira tuu Patti Janjin-Na Puang Allataala to nasompa to-Israel?>> Mebalimi to lima raja nakua, <<Tapalelei lako kota Gat.>> Napalelemi lako Gat mesaq kota jio tanana to-Filistin.
9 Apa ia tonna ratumo joo Patti Janji lako kota Gat, Nasessa omi PUANG Allataala to sininna tau jio. Napakannaii bundangan to sininna tau, la pea, la to matua, naliwaq marongka to tau. 10 Nabawa omi joo Patti Janji lako Ekron, mesaq una kota jio tanana to-Filistin. Ia tonna ratumo lako, sipetamba-tambanmi to tau jio nakua, <<Nabawai ratu joo Patti Janjin-Na Puang Allataala to nasompa to-Israel, na iamo la mpusabaqi tamate ngasan.>> 11 Iamo joo natambai ngasanni to rajana to-Filistin nasirempun nakuanni kumua, <<Tapapolemi lako ngenanna unamo joo Patti Janjin-Na Puang Allataala, danggiq tamate ngasan sola bangsataq.>> Sininna tau llan joo kota marongka ngasan, sabaq gaja budami tau mate napubuaq pangsessa-Na Puang Allataala. 12 Ia to tau tuo unapa, nakanna ngasanni bundang, iamo nasimetamba-tamban metaqda tulung lako dewatanna.