4
Apami to napau Nabi Samuel, nasaqding ngasan to-Israel.Patti Janjin-Na Puang Allataala narampa to-Filistin
Ia joo wattu malemi to to-Israel la rrarii to-Filistin. Mangtendai siandah Eben-Haezer, na ia to to-Filistin mangtenda jioi kota Afek. 2 Ia joo wattu nnatoroqmi tentarana to to-Filistin nnoloi tentarana to-Israel. Liwaq laqdaq to kasirarian naditalo to to-Israel. Den agi-agi patang saqbu tentarana to-Israel dipatei jio. 3 Ia tonna polemo lako tendana to tentarana to-Israel to tuo unapa, nakuamo to tomatua-tua to-Israel, <<Ciapari Napupangngelohnakiq Puang Allataala natalo to-Filistin too? Tamale nnalai to Patti Janjin-Na PUANG Allataalaa jio kota Silo, tapaindeqi, Natulungkiq Puang Allataala, Nalaqparankiq jio mai ewataq.>> 4 Nasuami to tau male lako kota Silo nnalai joo Patti Janjin-Na PUANG Allataala to makuasa to cumadokko jao dua kerub.b Ia to Hofni sola Pinehas anakkana Imang Eli nturuqi joo Patti.c
5 Ia tonna ratumo dibawa joo Patti Janjin-Na Puang Allataala lako padang nanii mangtenda to-Israel sola tentarana, siarrakanmi nabutung tiroge to padang. 6 Sikutanami to to-Filistin nakua, <<Ciapari nasiarrakanra to to-Ibrani?>> Apa ia tonna issenni kumua ia to Patti Janjin-Na PUANG Allataala jiomi tendana to-Israel, 7 simalajatanmi napada mangkada nakua, <<Ratui to Puang Allataala jio tendana! Mandasamikiq! Teqdapa naden taampaqi to susinna tee! 8 Mandasa tonganmikiq! Indamora la mpasalamaqkiq jio mai Puang Allataala to liwaq mawatang? Ia toomo to mangka mpatei to-Mesir jio padang pallawangan tonna anuq mpake mangrupa-rupa abalaq. 9 Ee kitaq to-Filistin, danggiq namoroq penawantaq! Mangngewa susi unamikiq muane tararii. Ia ke teqda tasusi joo la napukaunankiq to to-Ibrani, susi kitaq mpukaunanni tonna tee.>>
10 Mangkai joo too nararimi to-Filistin to to-Israel natalo laqdaq, napada mpalaian kalena lako tendana. Ia joo wattu ditaloi to to-Israel naden tallung pulo saqbu tentarana mate, 11 namate too to Hofni sola Pinehas anakkana Imang Eli. Moi Patti Janjin-Na Puang Allataala narampa tooi to-Filistin.
Imang Eli nasalai penawa
12 Den mesaq tau jio mai suku Benyamin mpalaian kalena llan mai kapararian, na allo ia bang unamo joo naratu lako kota Silo. Ia to bajunna naceqce-ceqce napadeqi litak to ulunna, sabaq gaja massei. 13 Ia to Imang Eli cumadokkoi jao kaderana jio randan lalan jio babangan kota, mpeagi kareba, natangrapaq penawanna mpikkiriqi to Patti Janjin-Na Puang Allataala. Nacuritai joo to-Benyamin lako to-Silo to kaditaloanna to-Israel, nasimbatingan to to-Silo. 14 Nasaqdingngi Imang Eli to tosibatingan namekutana nakua, <<Matumbari nasimbatingan to tau?>> Taqpa malemi joo to-Benyamin lako Imang Eli mpauanni joo kareba tangmelo. 15 Matuami to Imang Eli, kaserami pulona karua umuruqna, nateqdamo namacora tongan pengkitanna. 16 Nakuamo joo to-Benyamin, <<Mpalaiannaq kalekuq jio mai kasirarian nnenaq.>> Mekutanami Imang Eli nakua, <<Umbomora susi joo tosirari, anakkuq?>> 17 Nakuamo joo tombawa kareba kumua, <<Palai ngasanmi to to-Israel, na gaja budai mate. Moi joo dua anakkataq, Hofni sola Pinehas, mate tooi. Na ia to Patti Janjin-Na Puang Allataala narampa tooi to-Filistin.>> 18 Ia tonna iamo joo Patti Janjin-Na Puang Allataala napau joo tau, taqpa songkami Imang Eli jao mai kaderana, natungngara saqkaq jio saqde babangan kota. Leqtoi cokkongna namate, sabaq gaja tuami, namacommoq too. Patangpuloi taunna Imang Eli mparenta to-Israel.
Bainena Pinehas nasalai penawa
19 Ia joo wattu mabandaqi kebaqtang to mamintunna Imang Eli, bainena Pinehas. Ia tonna saqdingngi joo kareba kumua dirampai to Patti Janjin-Na Puang Allataala, na matei to matuanna sola muanena, taqpa cadokko mengguntuqi, kapaqdikanmi nakeanak. 20 Ia tonna la kaqtu sungaqna, nakuamo to baqtu pira-pira baine mpakeanakki, <<Masumangaqko! Muane tee anakkamu!>> Apa teqda bang napebalii sola teqda naparinawai joo kadanna. 21 Nasangaii indona joo pea Ikabodd, sabaq nakua, <<Taqdemi to kamalaqbiran-Na Puang Allataala llan tangngana to-Israel.>> Mangkadai susi joo, sabaq mangkami narampa to-Filistin to Patti Janjin-Na Puang Allataala na matemi to matuanna sola muanena. 22 Iamo joo namangkada kumua, <<Taqdemi kamalaqbiran-Na Puang Allataala llan tangngana to-Israel, sabaq dirampami to Patti Janjin-Na Puang Allataala.>>