Puang Allataala mpangkadai Samuel
3
Ia to Samuel pea bangpa, na mpangjaman PUANG Allataala, napatujui Imang Eli. Ia joo wattu mallamo naden pepasan baqtu pengkita jio mai PUANG Allataala. 2 Den wattu tonna bongimo, Imang Eli to maraunmo pengkitanna, mammaq llan sapaq, 3 na ia to Samuel mammaq jioi to nanii Patti Janjin-Na Puang Allataala llan Bola PUANG Allataala. Ia tonna mapattangpa nadukku unapa to palita, 4 metamba-Mi PUANG Allataala lako Samuel Nakua, <<Samuel! Samuel!>> Mebalii Samuel nakua, <<Ieq ambeq, indeqnaq.>> 5 Miqcokmi Samuel nataqpa lari lako Imang Eli nakua, <<Ieq ambeq, indeqmoq sabaq tatambainaq.>> Apa mebalii Imang Eli nakua, <<Teqdara kutambaiko, mammaqmoko.>> Malemi Samuel mammaq.6 Natambai o-Mi PUANG Allataala to Samuel. Miqcok omi, namale lako Imang Eli nakua, <<Ieq ambeq, indeqmoq sabaq tatambainaq.>> Apa mebalii Imang Eli nakua, <<Teqdara kutambaiko anakkuq, mammaq poleqmoko.>> 7 Ia joo wattu teqdapa naissenni Samuel to PUANG Allataala, sabaq maniangga Napangkadaii PUANG Allataala.
8 Mangpentallunnami Natambai PUANG Allataala to Samuel, miqcok omi, namale lako Imang Eli nakua, <<Ieq ambeq, indeqmoq sabaq tatambainaq.>> Ia joo wattu maneqri napahang Imang Eli kumua PUANG Allataala ntambaii joo pea. 9 Nakuamo Imang Eli lako Samuel, <<Malemoko mammaq. Ia ke Natambai poleqko, mebaliko kumua, <Ieq, Puang indeqnaq tee kaunan-Taq, mangkadami-Kiq, kupesaqdingngi.> >> Male poleqmi Samuel mammaq.
10 Mangkai joo too, ratu-Mi PUANG Allataala Nakeqdeh jio to nanii Samuel mammaq, Napangkadaii susi to mangka Natambanni nnenaq Nakua, <<Samuel! Samuel!>> Miqcokmi Samuel namebali nakua, <<Ieq, Puang indeqnaq tee kaunan-Taq, mangkadami-Kiq, kupesaqdingngii.>>
11 Mangkada-Mi Puang Allataala lako Samuel Nakua, <<La muissen kumua den la Kupugauk napumarongkai to-Israel, na sininna to tossaqdingngi la sabakan napussak. 12 La Kupugauk ngasan to mangka Kupau jiona repokkona Eli ke anuq, na teqda lalo joo akkatta-Kuq tangjaji. 13 Mangka Kupauan Eli kumua la Kusessai sola repokkona teqda anggena, napubuaq kasalanna anakkana. Naissen Eli kumua mangka-Naq nacapaq anakkana apa teqda naanggaii. 14 Iamo joo Kumassumpa kumua ia to dosana repokkona Eli teqdamo naladiaddampangan, moi apa napangkaroban sola napassompan.>>
15 Mangkai joo too mammaqmi Samuel ratu lako makaleq. Ia tonna miqcokmo, natimbakanni to salliq Bola PUANG Allataala. Malajaqi Samuel mpaui lako Imang Eli to Napauanni Puang Allataala pubongiq. 16 Natambaimi Imang Eli to Samuel nakua, <<Ee, anakkuq.>> Mebalii Samuel nakua, <<Ieq, ambeq.>> 17 Nakutanaii Imang Eli nakua, <<Apara Napauanko Puang Allataala pubongiq? Pauan ngasannaq, sabaq ia ke denni moi sangbukura kada mubuni, la Nasessa mabandaqko Puang Allataala.>> 18 Napau ngasanni Samuel lako Imang Eli to Napauanni Puang Allataala, teqda lalo nabuni. Nakuamo Imang Eli, <<Na PUANG Allataala-I, Iami Nasanga melo, maqnamo Napugaukki.>>
19 Samatonggo-tonggonami Samuel, nadaqtan bang Naampai PUANG Allataala, najaji ngasan sininna pepasan-Na Puang Allataala to napau Samuel. 20 Iamo joo na sininna to-Israel, mangpamula jaja mai kota Dan ratu sauq kota Bersyeba nnakuii kumua nabi Napilei PUANG Allataala to Samuel. 21 Mangpamula joo wattu daqtanmi PUANG Allataala mpangpekitan kalena sola mpangkadai Nabi Samuel jio kota Silo.