Passambajangna Hana
2
Massambajangmi Hana nakua,<<Liwaq kupumario to Napugauk PUANG Allataala,
napumasannang too penawangkuq.
Situruq kamasannangankuq kucapaqi to ewakuq,
sabaq kukanassai kumua Natulungmoq PUANG Allataala.a
2 Teqda nasusian malaqbih to PUANG Allataala!
Teqda laenna Puang Allataala mandara.
Puang Allataala mandara butung buntu batu,
dinii manyaman mentilendung.
3 Pajaimi mangkada tangkebattuan!
Pajaimi mangkada matampo!
Sabaq PUANG Allataala manda to liwaq mapahang,
to maruruh rraqtah panggaukanna tolino.
4 Teqdamo buaqna to panana pangbarani,
apa ia to tokaasi-asi samawatang-watangna.
5 Ia to tomangpebarah bang baqtu piran sabaq kalaqbian kande,
ia too disaropi, namaneq nnampaq kande.
Ia to totangbarah bang tonna tee,
saumi penawanna,
sabaq gannaqmi nakande too.
Ia to baine nasanga tau tamanang baqtu piran masannangmi too,
sabaq njajianmi pitu anak!
Apa ia to tobudamo anakkana tonna tee,
makarorrongngi sabaq disalaimi.
6 PUANG Allataala mangpamate,
Ia too mangpatuo.
Ia mpadoqi lino tomate to tau,
na Ia too mpatuoi.
7 Puang Allataala mangpakaasi-asi na Ia too mangpasugih.
Puang Allataala mpatangdianggaq tau na Ia too mpupennanggaq tau.
Den to to-Napamajiong na tangdianggaq,
den too to-Napamatande, nagaja dianggaq.
8 Naendekan to tokaasi-asi jio mai kamasussanna,
Nalaqparanni to tokaidaq-idaq jio mai kamaparrisanna.
Napapada keanggaqi sola tomapangkaq,
Napasangcadokkoanni to todianggaq puang.
Sabaq apanna PUANG Allataala to garontoq lino,
nanii mpakeqdehhi tee lino.b
9 Ia to todaqtan matappaq Nalendungngi Puang Allataala nadaqtan manyaman.
Apa lanynyaqi llan kamalillinan to togajaq.
Teqda nakullei tolino mpangngewan kamawatanganna,
teqda nakullei mpapatalo kalena.
10 La mpangpekitan-Ni kamagallian-Na PUANG Allataala lako tonnewa-I, susi galugu jao langiq,
Nalanynyaqii to tonnewa-I.
La Naraqtah PUANG Allataala to kara-karana tolino.
Napamawatang to raja Naangkaq,
Napamakuasai joo to-Napileic.>>
11 Mangkai joo too, polemi Elkanad lako bolana jio kota Rama, apa ia to Samuel anakkana torroi jio kota Silo, napatujui Imang Eli mpangjaman PUANG Allataala.
Panggaukanna anakkana Imang Eli
12 Gaja gajaq panggaukanna to dua anakkana Imang Eli. Teqda nangkalajaq-ngkasiriq PUANG Allataala, 13 napake salai to jaman imang dipabarakkananni. Elohna bang napugauk lako to-Israel. Ia ke denni to toratu mpassompan karoba digereq, digereqi nadinasu. Mukkun unapi dinasu, ratumi to tonasua imang mbawa petossok mentangke tallu, 14 natossokmi to jukuq llan kurin, iami naala joo petossokkona iami nabawan imang. Sininna to to-Israel ratu lako kota Silo mangkaroba napegaukki ngasan susi joo to karobana. 15 Laqbi-laqbipa biasa teqdapa nadialai to loppona to jukuq karoba la ditunu, ratumi joo tonasua imang nakua lako tomangkaroba, <<Bennaq tuu jukuq mamataqpa la naputawa imang la natunu. Teqda nakabudaii to jukuq dinasu.>> 16 Ianna mebali to tomangkaroba nakua, <<Melo ia ke atoran dituruqi, dialaii joloq to loppona la ditunu, tamaneq nnalai umbonna to jukuq takabudai.>> Mebalii joo tonasua imang nakua, <<Teqda! Benmoq too. Ia ke ciaqko mbennaq, la kuala kalenai.>>
17 Susimi joo to dosa takkaliwaq napugauk anakkana Imang Eli jio olo-Na PUANG Allataala, sabaq teqda naanggaqi to karoba dipassompan lako PUANG Allataala.
Samuel jio kota Silo
18 Moi nabiccuqpa to Samuel, apa daqtanmi mpangjaman PUANG Allataala. Ia to bajunna digaraga jio mai kaen lenan susi to baju efod biasa napake imang, ke massompai lako PUANG Allataala. 19 Taun-taunni nagaragan baju lando biccuq indona, nabawanni to Samuel, ke malei mangkaroba sola Elkana, muanena, to napugauk pissen sangtaun. 20 Nabarakkaqii Imang Eli to Elkana sola bainena nakua, <<Dennaa upaq Nabenpoko anak PUANG Allataala sullena tee pea mangka mupangbengan mpangjaman PUANG Allataala.>> Mangkai joo too polemi Elkana sola bainena lako kota Rama.
21 Nabarakkaqii PUANG Allataala to Hana, na njajianpa tallu pea muane na dua pea baine. Samatonggo-tonggonami Samuel, na mpangjaman tarruh PUANG Allataala.
Imang Eli sola anakkana dua
22 Gaja tuami to Imang Eli. Nadaqtan bang to tau ratu mpangpeasan anakkana to manggauk gajaq lako to-Israel. Naissen toomi Imang Eli kumua manggauk sala joo anakkana sola pira-pira baine pangjaga jio lalan tama Tenda Kasitammuane. 23 Nakuamo Imang Eli lako anakkana, <<Kusaqdingmo jio mai sininna tau kumua manggauk gajaq kamuq. Ciapari mipugaukki susi joo? 24 Ee, anakkuq! Pajaimi manggauk susi joo! Liwaq ganjang disaqding to curitanna ummaq-Na PUANG Allataala to apa mipugauk. 25 Ia ke mpugaukkiq kasalan lako padantaq rupa tau, Puang Allataala la mpasipemeloankiq, apa indara la mpasipemeloankiq, ke mpugaukkiq dosa lako PUANG Allataala?>> Apa teqda napesaqdingngii anakkana Imang Eli joo pangpakaingaq, sabaq mangkami Napattantu PUANG Allataala kumua la Napateii.
26 Apa samatonggo-tonggonami to Samuel, na sanapakamojaq-mojaqna tau sola PUANG Allataala.f
Pangpakaingaq lako repokkona Imang Eli
27 Den wattu naratu to mesaq nabi mangkada lako Imang Eli nakua, <<Susi tee kadan-Na PUANG Allataala, <Mangkamoq mpangpekitan kale-Kuq lako tojolomu, tonna pukaunan unapi Raja to-Mesir. 28 Kupilei to Harun sola batiqna llan mai allaqna suku to-Israel menjaji imang-Kuq, la mpusara karoba jao ngenan pangkaroban, ntunu dupa sola mpake baju efodg ke denni apa la napekutanan lako Akuq. Na mangkami Kupattantu lako batiqna kumua waqding naala sangtawan to jukuq karoba dipassompan to ditunu jao ngenan pangkaroban.h 29 Ee Eli, ciapari mutangnnanggaqri to sininna karoba to napangkaroban taung-Kuq to situruq parenta-Kuq jio Tenda-Kuq? Ciapari na laqbi muanggaq to anakkamu na ia to Akuq? Na ciapari mupupangngelohnai nnalai to jukuq kaminang melona to napangkaroban taung-Kuq lako Akuq mikandei mpeloppokki kalemi?> 30 Iamo joo Nakua PUANG Allataala to nasompa to-Israel kumua, <Moi Kumangjanji tonna tee kumua, batiqna Harun la daqtan menjaji imang-Kuq, apa ia too teqdamo Kumadoang. Sabaq inda-inda to tonnanggaq-Naq la Kuanggaq todai, na inda-inda toteqda naanggaq-Naq teqda toda Kuanggaqi. 31 Ingaranni! Den wattunna dau Kupatei ngasanni to batiqmu tomalolleqna, nateqdamo batiqmu la matua. 32 La masussako mumapaqdik penawa ngkitai to sininna barakkaq diben tolaen jio Israel, sabaq sininna repokkomu la mate malolleq ngasan. 33 Apa den mesaq batiqmui Kueloran tuo, to la mpangjaman-Naq, dikua nateqda napussak penawammu, namemmaraun matammu. Na ia to batiqmu laenna la mate dibaqtai laqboh lando. 34 Ia to mpamanassai kumua la jaji joo Kupaunna, ia to anakkamu Hofni sola Pinehas sangngallora nanii mate sola dua. 35 Kumaneq mpilei mesaq imangj to tattaq nturuq parenta-Kuq, na ia to panggaukanna napumasannang penawang-Kuq. Na sininna batiqna la njama jaman imang jio olona sininna raja Kupilei. 36 Ia ke den unapi batiqmu tuo, la malei lako joo imang metaqda doiq baqtu mesaq roti nakua, <<Elorannaq mbaliikiq, kuwaqding kumande moi nasangjiqpuqra.>> > >>