1 Samuel
Elkana sola repokkona jio kota Silo
1
Den mesaq muane disanga Elkana to-Efraim. Torroi jio kota Rama jao membuntunna tana suku Efraim. Ia to Elkana anakkana Yeroham, ampona Elihu ampo uttuqna Tohu na ampo gariginna Zuf. 2 Dua bainena Elkana disanga Hana na Penina. Den ia anakkana Penina, apa Hana teqda anakkana. 3 Teqda nasalaii taun-taun to Elkana male lloq mai kota Rama male deq kota Silo massompa sola mangkaroba lako PUANG Allataala to makuasa. Ia to imang joo wattu iamo to Hofni sola Pinehas anakkana Eli. 4 Ia ke mangkaroba oi Elkana, pada dibenni sisangtawan to jukuq lako Penina sola anakkana. 5 Teqda anak Nabenni PUANG Allataala to Hana, apa liwaq napakamojaq Elkana. Iamo nabenni Elkana to jukuq pangkaroba duang tawan lako Hana. 6 Ia to Penina daqtan bang mpaqdikki penawanna Hana maruena nateqda too naanggaqi, sabaq teqda Nabenni anak PUANG Allataala. 7 Mangtaun-taun nanii Penina mpaqdikki penawanna Hana, ke male oi massambajang lako Bola PUANG Allataala. Ia ke napaqdikki omi Penina, kumarrak omi, naciaq kumande. 8 Ianna kumarrak omo to Hana, mekutana omi Elkana kumua, <<Ciapari mukumarrakra, muciaq too kumande? Masse bangroko iko. Kusanga laqbi makeanggaqnaq lako kalemu na ia to sangpulo pea muane kenna den mujajian.>>Hana sola Imang Eli
9-10 Den wattu jio kota Silo llan Bola PUANG Allataala, tonna mangkamo kumande sola ngasan, keqdehmi Hana massambajang. Ia joo wattu ia to Imang Eli cumadokkoi jao kaderana siandah ariri salliq Bola Puang Allataala. Ia to Hana liwaq masse penawanna na nnaqdek-nnaqdek kumarrak mukkun massambajang lako PUANG Allataala. 11 Mangjanjii Hana lako PUANG Allataala nakua, <<Oo PUANG Allataala to makuasa, parinawai tee akuq kaunan-Taq. Kitai dikkaq to paqdikkuq. Ingaranni tee akuq kaunan-Taq, danggiq Takalupaii! Ia ke Tabarakkaqinaq mesaq anak pea muane, maqnamo Tapakei mpangjaman-Kiq angge tuona, nateqda too naladicakkuruqi to beluakkana.>>a
12 Gaja sainni Hana massambajang lako PUANG Allataala, napematai bangngi Imang Eli to timunna. 13 Teqda disaqding to napau Hana, sabaq mangnyemu-nyemu bangri timunna namangkada llan penawanna, iamo nasangai Imang Eli malangoi. 14 Nakuanmi Imang Eli, <<Mumalangora iko ntee, pajaimi mangngisoq anggur.>> 15 Apa nakua Hana <<Teqda akuq kumalango, teqda akuq kuisoq anggur moi ciqdik! Massambajangraq lako PUANG Allataala mpaui to sininna paqdikkuq, sabaq pussakmi penawangkuq. 16 Danggiq tasanganaq baine tangmangrundunan, massambajangnaq susi tee, sabaq liwaq paqdik to penawangkuq.>> 17 Nakuamo Imang Eli, <<Ia ke susii tuu, polemoko tapada salamaq. Dennaa upaq na ia tuu petaqdammu Napebalii Puang Allataala to tasompa kitaq to-Israel.>> 18 Mebalii Hana nakua, <<Kurrusumangaq to kameloan penawantaq lako akuq.>> Polemi Hana, namadoangmo kumande, sabaq teqdamo namasussa penawanna.
Samuel dijajian nadibawa lako Bola PUANG Allataala
19 Masawanna, makaleq unapa, miqcokmi Elkana sola repokkona. Ia tonna mangkamo massambajang lako PUANG Allataala, polemi lako kota Rama. Ia tonna sisolamo mammaq Elkana sola Hana, Natarimami PUANG Allataala to passambajangna Hana. 20 Kebaqtangmi na njajian mesaq pea muane, nasangaii Samuelb sabaq nakua, <<Kupetaqdai lako PUANG Allataala Nabennaq.>>
21 Nadeteq omi wattunna Elkana sola repokkona male deq kota Silo mangkaroba pentaunan lako PUANG Allataala. Napangngattai tooi Elkana mangkaroba mpalabaq tinjaqna. 22 Apa ia joo wattu teqda namale to Hana, nakua lako Elkana muanena, <<Mangkapi kusarakki tee Samuel kumaneq ssolanni lako Bola PUANG Allataala, natorro jio angge tuona.>> 23 Nakuamo Elkana, <<Melomi, pasusimi to musanganna, torromoko ratu lako nadeteq wattunna disarakki tuu anakkataq. Dennaa upaq Napugaukki PUANG Allataala to janjin-Na.>> Jaji torromi Hana ratu lako nasarakkinna joo anakkana.
24 Ia tonna disarakkimo Samuel, moi nabiccukpa nabawami indona lako Bola PUANG Allataala jio kota Silo. Na mbawa too mesaq sapin muane umuruq tallung taun, gandum sangpulo kilo, sola mesaq sepuq balulangc nanii anggur. 25 Ia tonna mangkamo mpangkarobanni joo sapin, nasolanmi to Samuel lako Imang Eli. 26 Nakua Hana lako Imang Eli, <<La mekatabeqnaq puang, taingaran unapaqraka? Akuqmo to baine to takita jenjen ntee massambajang lako PUANG Allataala. 27 Iamo tee to pea kupetaqda tongkumassambajang, na Nabenmoq PUANG Allataala. 28 Iamo joo kupangngoloi lako PUANG Allataala nampangjaman Puang Allataala angge tuona.>> Mangkai joo too massompamid.