Yerikho natalo to-Israel
6
Ia to sininna babangan kota jio Yerikho ditene' ngasanmi, dikua danggi' na den to-Israel mentama kota, te'da lalo tau dieloran messun mentama. 2 Mangkadam-I PUANG Allataala lako Yosua Nakua, “Nadete'mi wattunna la Kunii mben kamu' joo kota Yerikho sintong rajana sola sininna surudadunna to sigaja barani. 3 Annan allona la munii male sola surudadummu ngguririkkii sipissen sangngallo joo kota, 4 naden pitu imang suku Lewi pada sibawa tarompe' tanduk bembala', la lumingka njoloan Patti Basse. Ianna allo mangpempitunnamo, la miguririkkii pempitu joo kota, namukkun mpannoni tarompe'na to imang. 5 Iammisa'dingmi to tarompe' masain nnoni, siarrakan ngasanmo kamu', naro'pok joo tembo' kota, mimane' pada male nnolai to tembo' ro'pok jio olomi, mimentama joo kota.”6 Natambaimi Yosua to imang nakuanni, “Bullemi tuu Patti Basse, na kamu' to pitu imang sibawa tarompe', jolomo kamu' lumingka njoloan Patti Basse-Na PUANG Allataala.” 7 Nasuami Yosua to to-Israel ngguririkki kota Yerikho na ia to surudadu mangbarisi' njoloan tombulle Patti Basse-Na PUANG Allataala. 8-9 Mangkai joo too jolomi to surudadu jio lalo olo, namane' nturu'i pitu imang to mpannoni tarruh tarompe' tanduk bembala', namane' tombulle Patti Basse-Na PUANG Allataala, naundi mangbarisi' to surudadu pira' njagai Patti Basse. 10 Apa mangka memanmi napauan Yosua to surudadu kumua, “Danggi' misumu. Ia ke kusuamo kamu' mearrak, mane'ra kamu' siarrakan.” 11 Susimi joo to Patti Basse-Na PUANG Allataala dibulle ngguririkki kota pempissen. Mangkai joo too pada polemi lako tendana mangbongi.
12-13 Ia tonna masawannamo makale unapa, mi'cokmi Yosua, napangparentanni lako imang sola surudadu namale pole' ngguririkki joo kota. Susi una to pangbarisi'na ssangbo', surudadu jio olona imang to mpannoni tarruh tarompe', namane' tombulle Patti Basse-Na PUANG Allataala, naundi to surudadu pira'. 14 Susimi joo, allo mangpenduannami nanii male ngguririkkii joo kota pempissen, namane' pole lako tendana. Annan allona nanii mpugaukki susi joo.
15 Ia tonna mangpitung allomo, mane' la mariwangngi nami'cokmo, male pole'mi ngguririkkii joo kota, susi una to mangka napugauk. Apa ia joo allo, pempitui ngguririkki kota. 16 Ia tonna mangpempitunnamo mengguririk, napannonimi imang to tarompe'na, napangparentanmi Yosua nasiarrakan to sininna surudadunna, nametamba Yosua nakua, “Nabenmiki' PUANG Allataala tee kota! 17 La dilanynya'i ngasan tee kota sola sininna issinna, menjaji passompan lako PUANG Allataala. Ia mandara joo Rahab mesa' baine bandarang te'da naladipatei, nasaba' mangkami ntulung mata-matanta'. Moi to sininna tau llan bolana te'da too naladipatei. 18 Apa ingaran meloi, danggi' lalo naden apa miala, la dilanynya'i ngasan, nasaba' ia ke denni miala, la macilaka ngasanki' nakanna abala'. 19 Sininna bulawan, pera', salaka, bassi, la menjaji passompan lako PUANG Allataala na dianna ngasan llan ngenan mangkamo dipattantu dinii nnanna ewanan to dipatuju lako PUANG Allataala.”
20 Ia tonna sa'dingngi to-Israel to oni tarompe' dipemasainni, siarrakanmi naro'pok to tembo' kota Yerikho. Ta'pa malemi to surudadu to-Israel napada nnolai to tembo' ro'pok jio olona ntamaii, nakuasaii.a 21 Sininna to to-Yerikho mate ngasan dipa'dangngi, la muane la baine, la to matua, la tomalolle'. Sininna sapin, bembala' na keledai dipatei ngasan too.
22 Nakuamo Yosua lako joo dua mata-mata, “Male kamu' lako bolana joo baine bandarang, solanni messun llan mai kota sola sininna tau llan bolana, susi to mangka mijanjianni.” 23 Jaji malemi joo dua mata-mata lako bolana Rahab nasolanni to Rahab messun llan mai kota sola tomatuanna, sile'tona sola sininna rapunna, napakitanni ngenan la nanii torro jio siandah tendana to-Israel. 24 Mangkai joo too, nasumpunmi surudadu to-Israel to kota Yerikho sola sininna apa llan, ia manda diajan to bulawan, pera', salaka, na bassi. Ia to ewanan dialai na dibawa lako ngenan dipattantumo dinii nnanna ewanan dipatuju lako Bola PUANG Allataala. 25 Apa te'da naeloranni Yosua to tau mpatei Rahab sola sininna rapunna, nasaba' mangkami ntulung mata-mata to nasua Yosua ba'tu piran mmata-matai kota Yerikho. Ratu lako too allo da'tan unapi torro to Rahab sola bati'na jio tana Israel.b
26 Ia joo wattu massapahhi Yosua nakua,
“Inda to mpemeloi pole'i tee kota Yerikho,
la Natampakki ropu PUANG Allataala.
La napumate anak pamungahna
ke nakabua' pole'i to pondasinna,
la napumate anak tampakkana
ke nakabua' pole'i to babangan kotana.”c
27 Da'tanni Natulung PUANG Allataala to Yosua, na liwa' kaissenan llan alla'na to-Israel to napugauk.