5
Ia tonna sa'dingngi sininna rajana to-Amori llan kalambunan Sa'dan Yordan, sola rajana to-Kanaan jio siandah randan Tasik Tangnga kumua, Napamakasei PUANG Allataala to Sa'dan Yordan, naolai lamban to-Israel, malaja'mi na moro' penawanna la nnewa to-Israel.Disunna'i to to-Israel jio Gilgal
2 Ia joo wattu mangkada-I PUANG Allataala lako Yosua, Nakua, “Alako batu mukabua'i piso, mupakei ssunna' to-Israel to te'dannapa nadisunna'.” 3 Napangparentanni Yosua lako ba'tu pira-pira tau nnala batu, nakabua'i piso napakei ssunna' to-Israel jao buntu. Mangpamula joo wattu disangami joo ngenan Buntu Passunatan. 4-6 Iamo Nasuai Puang Allataala to Yosua ssunna' to-Israel, nasaba' sininna muane to jaji tonna lingkai padang pallawangan patang pulo taunna, te'da bangpa disunna'. Sininna muane to messun llan mai tana Mesir mangka ngasanmi disunna'. Na ia to muane nadete'mo umuru'na menjaji surudadu joo wattu, mate ngasanmi jio padang pallawangan, nasaba' cia'i mpesa'dingngi parenta-Na PUANG Allataala. Nakatangmangpesa'dingannamo Namassapah PUANG Allataala kumua, te'da Nalanneloranni ngkitai to tana la Nabenni to pura Nabasse lako tojolona to nanii buda canik sola dadik.a 7 Ia to anakkana to jaji jio padang pallawangan, iamo Naeloran Puang Allataala ssulle ambe'na. Apa te'dapa nadisunna'. Iamo joo nasunna'i Yosua.
8 Ia tonna mangkamo disunna', pada polemi tama tendana arannai mole to kojongna. 9 Nakuamo PUANG Allataala lako Yosua, “Ia too allo la diangga' pole'mo kamu', te'da nasusi tommi jio tana Mesir dipukaunan.” Iamo joo nadisanga Gilgalb joo ngenan ratu lako too allo.
10 Ia tonna mangtenda unapa jio Gilgal, merrantena Yerikho, tonna karuenmo tanggala' sangpulo appa' joo bulan, mpugaukmi pangramean Paskah.c 11 Masawanna joo too, iamo allo pamulanna nanii ngkande assele' padangna tana Kanaan, iamo to roti tangdiragii sola gandum ba'te. 12 Mangpamula joo allo ia to to-Israel te'damo roti jao mai langi' dibenni, jaji pajami ngkande roti jao mai langi' to disanga manna. Mangpamula joo wattu assele padang tana Kanaanmora nakande.d
Yosua sipangkada malaeka'-Na Puang Allataala
13 Ia tonna mandoppi'mo Yosua lako kota Yerikho ngkitami mesa' tau ke'deh jio olona sitoe pa'dang. Nakandoppi'mi Yosua nakutanaii kumua, “Sipusolariki'ka ba'tu siewaliriki'ka?” 14 Mebalii joo tau nakua, “Tangngia, apa ratura', sanga pangbarani surudadun-Nana' PUANG Allataala.” Suju'mi Yosua ratu do' litak, namangkada nakua, “Apara to sipato' la kupugauk tee aku' kaunanta'?” 15 Mebalimi nakua, “Alaii tuu sapatummu, nasaba' ia tee ngenan munii ke'deh, ngenan dipattantu lako Puang Allataala.” Naalaimi Yosua to sapatunna.