Tampak kadanna Yakub
49:1-28
49
Mangkai joo too, natambai ngasanmi Yakub to anakkana nakua, <<Ntee kamuq sirempun. La kupauan kamuq to la jaji lako kamuq tee wattu la mioloi lako.2 Ee anakkuq, ntee-tee kamuq mipesaqdingnginaq tee akuq Yakub ambeqmi, to disanga too Israel.
3 Ee Ruben, ikomo anak pamungahkuq,
ikomo mpamasumangaqnaq kumauku,
bungahna bua kamawatangankuq.
Ikomo liwaqna malaqbih
na mawatang jio mai sininna anakkuq.
4 Makkasolangko susi wai buda tangdikulle ntampangngi,
arannai teqdamo mudipakalaqbih,
sabaq mammaqko sisola sala mesaqna bainekuq,
ncarepaiko katindoankuq.
5 Ee Simeon sola Lewi anakkuq to sangngindo,
ia to laqboh landomi mipake makkasolang.
6 Ciaqnaq nturuqi to akkatta gajaqmi,
teqda too kuturuq llan kasirempunanmi,
sabaq kamabirisanmi mipapatean.
Mirepok-repok to sapin mpesannangngi penawammi.
7 Tampak ropu to kamabirisanmi,
sabaq takkaliwaq ke mabirih kamuq.
Tampak ropu to kamagallianmi
sabaq takkaliwaq ke magalli kamuq.
La sisarak-sarak to batiqmi, nasiallaq batiqkuq laenna.
La titawa-tawai tama sininna suku llan tana Israel.a
8 Ee Yehudab anakkuq, iko la ntaloi ewamu,
la napujiko sileqtomu
nasujuqko.
9 Ee Yehuda, susiko anak singa malolleq,
ia ke mangkai ngkande peattana, endek poleqmi deq loqkoqna
mangnguleqteq namaneq mammaq.
Teqda tau barani ntundanni.c
10 Teqda to la ssulle kaparentanna Yehuda,
namangparenta to batiqna teqda anggena,
arannai ratu to todipattantu ntoe kaparentan,
na sininna bangsa sujuq jio olona.
11 Ia to tananan anggurna liwaq buda iamo na teqda napurugii ke llaqkaqi keledai tangbarah jio,
moi to anak keledainna nalaqkaq tooi jio tananan anggur gaja melo.
Liwaq buda to wai anggur nawaqding mpakei mbosok pakeanna,
na mpaccingngii bajunna mpake wai anggur malea susi rara.
12 Malea matanna, sabaq buda anggur naisoq.
Mabusa isinna, sabaq buda dadik naisoq.
13 Ee Zebulon anakkuq la torro jioko randan tasik,
to nanii kenden kappalaq,
na sikatonan kota Sidon to tanamu.
14 Ee Isakhar anakkuq, susiko keledai mawatang kenden
ssampe bang pamawanna.
15 Ia tommukitai joo ngenan kakendenan melo na maballo,
diparukuko mangjama susi kaunan,
moi namabandaq musaqding.
16 Ee Dan anakkuq, la menjajiko mesaq suku llan Israel,
la rraqtahko kara-karana bangsamu.
17 Susiko ulah jio randan bataq,
susiko ulah keipo jio randan lalan,
la ntitto kambutuq nyarang,
natipallekkoq to tossakeii.>>
18 Nakua Yakub lako Puang Allataala, <<Oo PUANG Allataala, ntajannaq kasalamatan jio mai Kitaq.>>
19 Nakuapa Yakub, <<Ee Gad anakkuq, la naratuiko parampoq,
apa iko poleq ora nnulaqi mualaii to apanna.
20 Ee Asyer anakkuq, la kalaqbian kandeko.
Iko la mpasadia kande to la nakande raja.
21 Ee Naftali anakkuq, susiko jonga laqpah teqda ssakkalangngii.
La den anakkana na sigaja melo rupanna.
22 Ee Yusuf anakkuq, susiko garontoq kaju siandah mata wai,
malolopa namabuamo,
la matande tangkena nnonganni temboq.
23 Moi napandasako rari ewamu,
naulaqko mpake pana,
24 apa tattaq mauku to takeahmu,
nadaqtan mawatang to panamu,
sabaq Natulungko Puang Allataala to liwaq mawatang to nasompa Yakub.
Iamo Tomangrewa to llendungngi to-Israel.
25 Ee Yusuf anakkuq, Puang Allataala to kusompa ntulungko.
Puang Allataala to makuasa mbarakkaqiko
uran jao mai langiq,
wai jiong mai litak,
sola batiq na patuoan.
26 Ia tee barakkaq kubarakkasanko
laqbi malaqbih na ia to barakkaq dibarakkasan buntu to tempon jiona mai nang denmo.
Dennaa upaq nadipatuju lako ngasan iko joo barakkaq,
naanggaq puangko sileqtomu.
27 Ee Benyamin anakkuq, susiko serigala masaqgaq.
Ia ke makaleqi mbunoii peattana,
natawa-tawai ke bongii.>>
28 Iamo joo to sangpulo dua suku Israel. Susimi joo kadanna Yakub, tonna mbarakkaqi anakkana to pada dipattantuanni.
Yakub mate
49:29-33
29-30 Mangkadami Yakub lako anakkana nakua, <<Cinggaqtuqmora kusalai lino. Patamanaq loqkoq jio Makhpela kadellekanna Mamre jio tana Kanaan, mipajionaq saqdena tojolokuq. Mangkami naalli Nabi Ibrahim joo loqkoq, napulamunan, sola baraqbah mengguririkkina jio mai Efron to-Het.d 31 Iamo dinii llamun Nabi Ibrahim na Sara, Ishak na Ribka. Na jio toomo kunii llamun Lea.e 32 Ia joo loqkoq sola baraqbahna mangkami dialli jio mai to-Het, jio toomo la minii lamunnaq.>> 33 Ia tonna mangkamo Yakub mpasan anakkana, rruiqmi ajena deq katindoan, nakaqtu sungaqna.f