Yakub mbarakkaqi Efraim sola Manasye
48:1-22
48
Baqtu pira-pira wattu masainna dipauanmi Yusuf kumua, <<Masakii ambeqmu, wattunnamora ditajan.>> Malemi mpellingiq ambeqna nasolanni joo dua anakkana disanga Manasye sola Efraim. 2 Ia tonna saqdingngii Yakub kumua ratui Yusuf sola anakkana napengkullei tongan miqcok nacumadokko jao katindoanna. 3 Mangkadami Yakub lako Yusuf nakua, <<Puang Allataala to makuasa mangka ssikitannaq jio kota Lusa jio tana Kanaan Nabarakkaqinaq.b 4 Nakuannaq, <La Kupebudai batiqmu namenjaji buda bangsa. La Kuben batiqmu tee tana napumanah tarruhhi.> >>5 Nakuapa Yakub, <<Ee Yusuf, ia tee anakkamu dua Manasye sola Efraim, to jaji indeq tana Mesir tonna teqdapa kuratu, la kupuanak kupapadai Ruben sola Simeon. 6 Apa ia ke den unapi anakkamu jaji ke anuq, teqda kupatamai rekenan anakkuq apa anakkamu iko. Ia to manahna la natarima jio mai Efraim sola Manasye kakanna. 7 Iamo kupugaukki susi joo, sabaq ia tongkipole jio mai tana Mesopotamia, llan kalingkankiq matemi Rahel indomu jio tana Kanaan, teqda namabela jio mai kota Efrata. Kulamunni jio randan lalan lako kota Efrata.>> Ia joo kota Efrata disanga too kota Betlehem.c
8-10 Teqdamo namacora pengkitanna Yakub, sabaq matuami. Mekutanami nakua, <<Indara tee pea?>> Mebalii Yusuf nakua, <<Iamo anakkuq to Nabennaq Puang Allataala indeq tana Mesir.>> Nakuamo Yakub, <<Pamandoppiqi mai kubarakkaqii.>> Napamandoppiqmi Yusuf joo anakkana dua lako Yakub, narakaqi Yakub namaneq nnudungngi. 11 Nakua omo Yakub lako Yusuf, <<Teqda lalo kukalannaii kumua la sikita unapikiq. Na kannori Naeloran toopaq Puang Allataala ngkita anakkamu.>> 12 Napalelemi Yusuf to anakkana jio mai allaq upanna Yakub namaneq messujuq jio olona ambeqna.
13-14 Mangkai joo too, napajioi Yusuf joo dua anakkana jio olona Yakub. Ia to Efraim anak tampak napajioi olo kairinna Yakub na Manasye anak pamungah napajioi olo kananna. Apa napasitentai Yakub to limanna. Ia to lima kananna napajaoi ulunna Efraim, na ia to lima kairinna napajaoi ulunna Manasye. 15-16 Mangkai joo too, nabarakkaqimi Yakub to Yusuf sola joo dua anakkana nakua,
<<Dennaa upaq na Puang Allataala to nasompa nenekuq Ibrahim sola ambeqkuq Ishak
la mbarakkaqi tee kallolo sola dua.
Puang Allataala toomo ntulungnaq ratu lako too allo.
Iamo menjaji malaekaq llaqparannaq jio mai buda abalaq kagajatan.
Dennaa upaq na ia to sangangkuq sola sanganna ambeqkuq Ishak sola nenekuq Ibrahim,
tattaq diingaran sabaq ia tee kallolo sola dua.
Dennaa upaq Napebudaii Puang Allataala batiqna
na liwaq buda llan lino.>>
17 Teqda napumasannangngi Yusuf ngkita ambeqna mpajao lima kananna jao ulunna Efraim, natoei to limanna ambeqna la napalele lako ulunna Manasye. 18 Nakua lako ambeqna, <<Danggiqra tapasusii tuu ambeq. Indeqri to ulunna anak pamungah, iara tapanii lima kanantaq.>> 19 Apa ciaqi ambeqna, namangkada nakua, <<Ee mane, kuissen akuq battuananna tee apa kupugauk. Ia to Manasye la makuasa una na ia to batiqna la menjaji bangsa matonggo. Apa ia to Efraim adinna la laqbi makuasa na kakanna. Ia to batiqna Efraim la menjaji buda bangsa matonggo.>> 20 Nabarakkaqimi Yakub joo pea sola dua nakua, <<Ia to to-Israel ke mbarakkaqi tau, la mpaui sangammu nakua, <Dennaa upaq na Puang Allataala mpupenjajiko susi Efraim sola Manasye.> >> Susimi joo napanomoroq mesaqi Yakub to Efraim na ia to Manasye.d
21 Nakua omo Yakub lako Yusuf, <<Ee anakkuq, muissen kumua teqdamora namasain kumate. Puang Allataala la ntulung kamuq, Nasolan kamuq pole lako tana tojolomi. 22 Ia to padang Sikhem to mangka kuala jio mai to-Amori mpake laqboh lando sola pana, iko kuben, na iamo joo tawa mupulaqbih jio mai sileqtomu.>>