Yakub male sikita rajana to-Mesir
47:1-12
47
1-2 Nasolanmi Yusuf to lima sileqtona male mangngolo lako rajana to-Mesir, napangpetandanni. Nakuamo Yusuf lako raja, <<Tabeq raja, ratumi ambeqkuq sola sileqtokuq jio mai tana Kanaan, mbawa bekena, dombana, sapinna na sininna to napunnai. Na jiomi tana Gosyen too.>> 3 Nakutanaimi raja to sileqtona Yusuf nakua, <<Apara jamanmi?>> Mebalimi nakua, <<Iyeq raja, tomangrewakan susi tojolokiq. 4 Ratukan la mentoratu ntee tana Mesir, sabaq pebarrangan laqdaq jio tana Kanaan, na teqdamo apa la nakande beke sola dombakiq. Ia ke waqdingngi taelorankan kitorro jio tana Gosyen.>> 5 Mangkadami raja lako Yusuf nakua, <<Indeqmi tana Mesir too to ambeqmu sola sileqtomu. 6 Ia tee tana Mesir teqda midianggean. Pakitanni ambeqmu sola sileqtomu to tana gaja melo. Akeqmo namariqpih jio tana Gosyen. Suai to tomangrewana ambeqmu to maparaka narewai tooi to patuoankuq.>>7 Nasolanni Yusuf to ambeqna mangngolo lako raja napasitandanni. Nabarakkaqii Yakub joo raja. 8 Namekutana raja lako Yakub nakua, <<Piramira umuruqtaq?>> 9 Mebalii Yakub nakua, <<Saratuhmi tallung pulo taunna kunii male melako bang llilingngi pira-pira padang na buda paqdik kuperasai. Ia to umuruqkuq teqdapa namasain, tangdipapada umuruqna tojolokuq to male melako bang llilingngi padang mentoratu.>> 10 Mangkai joo too nabarakkaqimi Yakub to raja, namaneq messun lako salean. 11 Malemi Yusuf ntawanni ambeqna sola sileqtona joo tana Gosyen to disanga too tana Rameses, ngenan liwaq melo jio tana Mesir, natorro jio susi to napangparentan raja. 12 Napagannaqi tongan Yusuf to la naputuona ambeqna, naben tooi to sileqtona padami budanna anakkana.
Pebarrangan namasussa diampaq to kande
47:13-26
13 Umbo-umbo nanii teqdamo diampaq to la dikandena, sabaq masainmo pebarrangan joo wattu. Ia to tobuda, la to-Mesir la to-Kanaan tangpakullemi sabaq tangkumandei. 14 Narempun ngasanni Yusuf to sininna doiq alli gandum jio mai to-Mesir sola to-Kanaan, naannai llan istana rajana to-Mesir. 15 Ia tonna cappuqmo to doiqna tobuda jio tana Mesir sola jio tana Kanaan, malemi to to-Mesir mangngolo lako Yusuf namangkada nakua, <<Benkan to la kikandena, danggiq elorankan mate tangkumande. Cappuqmi doiqkiq.>> 16 Mebalii Yusuf nakua, <<Ia ke cappuqmi doiqmi, patuoanmi mipasitongkanni to la mikandena>> 17 Nabawami lako Yusuf to patuoanna. Nabenni Yusuf kande, napasitongkai nyarang, beke, domba, sapin na keledai. Sangtaunni joo nanii Yusuf mben kande tobuda napasitongka patuoan.
18 Ia tonna taun poleqmo, male omi to tobuda mangngolo lako Yusuf namangkada nakua, <<Tabeq puang, kipau manassa bangmi, cappuqmi doiqkiq sola patuoankiq sabaq kiben ngasanmikiq. Teqdamo apa la kibenkiq, ia to den kalekiq mandamora sola baraqbahkiq. 19 Danggiq elorankan mate, danggiq too natangkeasseleq to baraqbahkiq. Tabenkan kande na kalekiqmora sola baraqbahkiq kibajaranni. Tabenkan banne kitananni na keasseleq, naden to la kikandena. Maqnamo tapukaunankan taalai to baraqbahkiq assalan tuokan.>>
20 Naalli ngasanni Yusuf to tana jio tana Mesir napunnaii raja. Sininna tau mbaluk ngasan baraqbahna, sabaq liwaq sussa llolongan kande. Susimi joo napunnai ngasanni raja to sininna baraqbah jio tana Mesir. 21 Napukaunan ngasanmi Yusuf to tobuda llan tana Mesir. 22 Ia mandamo teqda naallii Yusuf to baraqbahna imang to-Mesir. Ia to imang teqda ia naparallu mbaluk baraqbahna, sabaq diben tarruh kande jio mai raja to naputuona. 23 Nakua Yusuf mangkada lako tobuda, <<Pesaqdingngii! Mangkamo kualli to baraqbahmi, kupupengkaunan toomo kamuq lako raja. Alami tee banne mitananni jio baraqbah. 24 Ianna endekmo asseleqna mitawa limai, mibenni raja sangtawan. Ia to torrona iamo la mipubanne mikande tooi piraq sola repokkomi.>> 25 Mebalimi tobuda nakua, <<Iyeq, maqnamo napukaunankan raja, sabaq takamaseimokan tapatuokan.>> 26 Ia joo wattu pamulanna nanii Yusuf mpattantu atoran jio tana Mesir kumua, ia to asseleq ditawa lima na sangtawan naputawa raja. Ratu lako too allo, ia joo atoran daqtan dipugauk. Ia manda to baraqbahna imang to-Mesir teqda napunnaii raja.
Tampak petaqdanna Yakub
47:27-31
27 Susimi joo to to-Israel torro jio tana Mesir jio tana Gosyen. Sugihmi nasabuda-budannamo batiqna. 28 Sangpulo pitumi taunna Yakub torro jio tana Mesir nadeteqi saratuh patangpulo pitu taun umuruqna. 29 Ia tonna la madoiqmo mate natambaimi to Yusuf nakua, <<Ee anakkuq, ia ke mupakamojaq tongannaq, pajioi ntee allaq upangkuq to limammu mumassumpaa kumua teqda mulallamunnaq indeq tana Mesir. Iamo mpamanassai kumua tattaqko mpakamojaqnaq. 30 La mulamun jionaq lamunan tojolokuq. La mubawanaq lako patamanaq liang jio.>> Mebalii Yusuf nakua, <<Iyeq, la kupugauk to tasuannaq.>>b
31 Nakua unapa Yakub, <<Massumpako kumua nang la mupugauk.>> Ia tonna mangkamo massumpa Yusuf, sujuqmi Yakub jao pangnguluan katindoanna mangsukkuruq.