Yakub sola repokkona male doq tana Mesir
46:1-27
46
Nasariq melomi Yakub to sininna napunnai namaneq male sola repokkona. Ia tonna ratumo lako kota Bersyeba, mpassompanni karoba digereq lako Puang Allataala to nasompa Ishak ambeqna. 2 Ia tonna bongimo llan pengkitanna Yakub, Napangkadaii Puang Allataala kumua, <<Ee Yakub!>> Mebalii Yakub nakua, <<Iyeq, indeqnaq kitaq Puang.>> 3 Nakuamo Puang Allataala, <<Akuq Puang Allataala to nasompa ambeqmu. Danggiq mumalajaq male doq tana Mesir, sabaq jiomo la Kunii mpabuda batiqmu namenjaji mesaq bangsa matonggo. 4 Akuq la ssolanko doq tana Mesir, tantu Akuq too la ssolanni pole jio mai to batiqmu. Yusuf la ssareko naparapaqi to matammu ke kaqtumi to sungaqmu.>>5 Napaendekmi anakkana to Yakub deq kereta to nakiringanni rajana to-Mesir la napake male doq tana Mesir. Napaendek tooi deq kereta to repokkona nakeqdeh jao mai kota Bersyeba male doq tana Mesir. 6-7 Nabawa ngasan tooi to patuoanna sola to napunnai, asseleq jio tana Kanaan. Jaji malemi Yakub sola batiqna doq tana Mesir, la muane la baine.a
8-15 Iamo tee to sanganna batiqna Yakub male doq tana Mesir. Yakub disanga too Israel na ia to anak muane nasikabalii Lea, iamo to Ruben, anak pamungah, Simeon, Lewi, Yehuda, Isakhar na Zebulon. Den anakkana baine disanga Dina.
Ia to anakkana Ruben, iamo to Henokh, Palu, Hezron na Karmi.
Ia to anakkana Simeon, iamo to Yemuel, Yamin, Ohad, Yakhin, Zohar na Saul. Ia to Saul anakkana Simeon jio mai baine to-Kanaan.
Ia to anakkana Lewi, iamo to Gerson, Kehat na Merari.
Ia to anakkana Yehuda, iamo to Er sola Onan to mate jio tana Kanaan, Syela, Peres, na Zerah. Ia to Peres njajian Hezron sola Hamul.
Ia to anakkana Isakhar, iamo to Tola, Pua, Ayub na Simron.
Ia to anakkana Zebulon, iamo to Sered, Elon na Yahleel.
Ia ngasanmo joo to batiqna Yakub nasikabalii Lea to jaji jio ngasan tana Mesopotamia. Den tallung pulo tallu batiqna Yakub to nasikabalii Lea.
16-18 Ia to anak nasikabalii Yakub na Zilpa, iamo to Gad na Asyer.
Ia to anakkana Gad, iamo to Zifyon, Hagi, Syuni, Ezbon, Eri, Arodi na Areli.
Ia to anakkana Asyer, iamo to Yimna, Yiswa, Yiswi na Beria sola Serah anakkana baine. Ia to Beria njajian Heber sola Malkiel.
Den sangpulo annan batiqna Yakub nasikabalii Zilpa. Ia tee Zilpa kaunanna Laban naben Lea napukaunanni.
19 Ia to anak nasikabalii Yakub na Rahel, iamo to Yusuf sola Benyamin. 20 Ia to anak nasikabalii Yusuf na Asnat, iamo to Manasye sola Efraim. Asnat anakkana Potifera to-Mesir to menjaji imang jio kota Heliopolis.b
21 Ia to anakkana Benyamin, iamo to Bela, Bekher, Asybel, Gera, Naaman, Ehi, Ros, Mupim, Hupim na Ared.
22 Den sangpulo appaq batiqna Yakub nasikabalii Rahel.
23-25 Ia to anak nasikabalii Yakub na Bilha, iamo to Dan sola Naftali.
Ia to anakkana Dan, iamo to Husim.
Ia to anakkana Naftali, iamo to Yahzeel, Guni, Yezer na Syilem.
Den pitu batiqna Yakub nasikabalii Bilha. Ia tee Bilha kaunanna Laban naben Rahel napukaunanni.
26 Ia to batiqna Yakub male doq tana Mesir annanpulona annan tau, teqdapa nadipasireken to mamintunna. 27 Ia to dua anakkana Yusuf jaji jioi tana Mesir. Pitungpuloi sola ngasan to Yakub sola sininna anak ampona jio tana Mesir.c
Yakub sola repokkona jio tana Mesir
46:28-34
28 Nasuai Yakub to Yehuda jolo mpauanni Yusuf kumua, <<La sitammukan jio tana Gosyen.>> Ia tonna ratumo Yakub sola batiqna lako tana Gosyen, 29 endekmi deq keretana to Yusuf namale sitammu ambeqna. Ia tonna sitammumo, narakaqi Yusuf to ambeqna nakumarrak gaja sain jao kamalaqna ambeqna. 30 Nakuamo Yakub lako Yusuf, <<Ee anakkuq, maqnamo kumatemo too, sabaq kukitamoko kumua tuo unapoko.>>
31 Mangkadami Yusuf lako sileqtona sola lako keluargana nakua, <<La malemoq too mpauanni rajana to-Mesir kumua, <Ratumi to ambeqkuq, sileqtokuq sola repokkona jao mai tana Kanaan. 32 Mbawai bekena, dombana, sapinna sola sininna to napunnai, sabaq tomangrewai.> 33 Ianna tambai kamuq raja, nakutanai kamuq kumua apara jamanmi, 34 la mipebali kumua, <Mellao biccuqpakan kimangrewamo susi to napugauk tojolokiq.> Susipi joo mipau namaneq nneloran kamuq raja torro jio tana Gosyen.>> Napauanni Yusuf susi joo, sabaq ia ke siamaqi tomangrewa to to-Mesir, nasanga teqda anggaqna to kalena.