Yusuf mpangpeissenan kalena lako sileqtona
45:1-28
45
Ia joo wattu ciqdiqmora nakumarrak Yusuf, gaja doang mpasau maliqna lako sileqtona. La mpangpeissenanni kalena kumua iamo Yusuf, apa ciaqi ke denni tau laen jio nasolan. Iamo joo nasuai topangjamana messun lako salean.a 2 Ia tonna teqdamo tau laen, nagasaqmi Yusuf kumarrak nasaqdingngi to-Mesir jio salean, arannai naissen ngasan tau llan istana raja kumua kumarrakki Yusuf. 3 Mangkadami Yusuf lako sileqtona nakua, <<Akuqmo Yusuf, sileqtomi. Tuo unapiraka ambeqtaq?>> Tangnaissen mebali to sileqtona sabaq sabakanni nasimalajatan. 4 Nakua omo Yusuf, <<Ntee-tee kamuq.>> Mengkandoppiqmi to sileqtona. Nakua poleq omo Yusuf, <<Akuqmo Yusuf sileqtomi to mangka mibaluk kudibawa ratu indeq tana Mesir. 5 Danggiqmo mimasussa baqtu ssassan kalemi, sabaq mibaluknaq kuratu indeq. Sitonganna Puang Allataala to solannaq ratu njoloan kamuq la mpasalamaq buda tau danggiq namate tangkumande. 6 Maneqi duang taun to pebarrangan indeq tana Mesir. La limang taunpa teqda namanengko to tau na teqda too asseleqna to padang. 7 Mejangngaran tee cara Napake Puang Allataala mangtulung. Nasuanaq njoloan kamuq ratu indeq, misalamaq nadaqtan den batiqmi. 8 Jaji sitonganna tangngia pangngeloranmi kuratu indeq, apa pangngeloran-Na Puang Allataala. Puang Allataala mpupenjajinaq to naala ambeq rajana to-Mesir, kudipakuasa sininna apa llan istana raja sola sininna tee tana Mesir.9 Polemo kamuq madoiq mipauanni ambeqtaq kumua, <Susi tee pepasanna Yusuf anakkataq, <<Napupenjajimoq Puang Allataala ngkuasai sininna tana Mesir. Malemikiq mai madoiq ssikitannaq. 10 La torro jiokiq tana Gosyen, mandoppiq jio mai to kunii torro. Bawa tooi to anakkataq sola ampotaq na beketaq, dombataq, sapin sola sininna to taampui. 11 Ia ke jiomikiq tana Gosyen waqdingnaq mparakaikiq sola ngasan, sabaq la limang taunpa to pebarrangan namasussa diampaq to kande. La kuparakaikiq sola repokkotaq na sininna to tasolan, nadanggiq takakurangan kande.>> > >>b
12 Nakuapa Yusuf, <<Ee sileqtokuq, mikanassaimo too, moi iko Benyamin, kumua akuq tonganmo Yusuf to ssipangkadan kamuq. 13 Pauanni ambeqtaq kumua dipakuasamoq indeq tana Mesir, micuritan tooi to apa mangka mikita. Madoiq kamuq ssolanni jio mai.>>
14 Ia tonna mangka Yusuf mangkada susi joo, narakaqmi to Benyamin adinna, nakumarrak sola dua. 15 Mukkunni Yusuf kumarrak, napasilelei narakaq to kakanna naudungngi. Mangkai joo too, maneqri sipangkada-kada.
16 Ia tonna issenmi tau llan istana kumua ratumi sileqtona Yusuf, masannangngi raja sola pangjamana llan istana. 17 Mangkadai raja lako Yusuf nakua, <<Suai tuu matiq sileqtomu napamawaii kande to keledainna napole deq tana Kanaan. 18 Nasolanni jio mai to ambeqmu sola sininna tau llan bolana. La kubenni padang to gaja melo indeq tana Mesir, naputuoi to asseleqna joo padang maloppo. 19 Sua tooi mbawa baqtu pira-pira kereta lako Kanaan la napake mbawa bainena sola batiqna sileqtomu sola ambeqmu ke ratui indeq tana Mesir. 20 Danggiq omo nanawa-nawai to barangna masussa nabawa, sabaq ia to melona indeq tana Mesir la napunnai.>>
21 Napugauk ngasan Yusuf sola sileqtona to nasuanni raja. Nabenni Yusuf baqtu pira-pira kereta sola kinallo la nakande lako lalan. 22 Diben tooi sisangpasang pakean baru, apa ia to Benyamin limang pasang dibenni sola doiq tallu ratuh peraq. 23 Sangpulo keledai muane dipamawai mangrupa-rupa barang to melona jio tana Mesir nakiringan ambeqna. Den toopa sangpulo keledai baine dipamawai gandum, roti na kinallo laen to dipasadia la nakande llan kalingkan ke malei doq tana Mesir. 24 Ia tonna la malemo to sileqtona napangngingaranni kumua, <<Danggiq misisakka-sakka lako lalan.>>
25 Polemi to sileqtona Yusuf lako ambeqna deq tana Kanaan. 26 Ia tonna ratumo deq nacuritami lako ambeqna kumua, <<Tuo unapi Yusuf na ngkuasaimi sininna tana Mesir.>> Ia tonna saqdingngi Yakub joo curita, takkajannaqi nateqda namatappaq. 27 Apa ia tonna curitan ngasanni anakkana to apa napauanni Yusuf, nakita toomi Yakub to baqtu pira-pira kereta to nakiringanni Yusuf la napake male doq tana Mesir, masumangaqmi 28 nakua, <<Oo, tuo unapi paleq dikkaq to Yusuf anakkuq! Gannaqmo joo lako kalekuq! La malenaq ssikitanni, kumaneq mate.>>