Isotan taqde
44:1-17
44
Mangkai joo too nasuami Yusuf to kapala nnurusuq bolana nakua, <<Issianni gandum to karungna joo toratu nnalli gandum, padami to nakullena nabawa padami patamanni. Patama poleqi karungna to doiq pamajahna patoppoqi jao gandum. 2 Patamai karungna joo adi tampakkana to isotan peraqkuq sola doiq pamajahna.>> Napugaukmi joo kapala nnurusuq bolana Yusuf. 3 Melambik unapa nadieloranmo pole to sileqtona Yusuf sibawa keledainna. 4 Teqdapa namasain male ssalai kota, mangkadami Yusuf lako kapala nnurusuq bolana nakua, <<Madoiqko nnulaqi joo tau mudeteqi, mukuanni, <Ciapari mipabalahhii panggaukan gajaq to kameloan mangka napugauk puangkuq lako kalemi? 5 Ciapari mibokoi to isotan peraqna puangkuq? Ia joo isotan napake mangngisoq, napake too pakita-kita. Gajaq tuu panggaukanmi!> >>6 Ia tonna deteqmo sileqtona Yusuf joo todisua, napaumi to apa disuanni. 7 Mebalimi to sileqtona Yusuf nakua, <<Dampangankan puang, apara kitaq tasanga? Massumpakan kumua teqda kamiq kipugaukki tuu. 8 Na taissen kumua ia to doiq kiampaq llan karungkiq, dipatoppoq jao gandum baqtu piran, kibawa poleqmi jao mai tana Kanaan kipapoleankiq. Jaji teqda lalo kamiq akkattakiq la mboko peraq baqtu bulawan jio mai bolana wakkeleq raja! 9 Inda-indannakan tanii nnampaqi joo isotan, maqnamo tapateii, tapukaunan toopakan sola ngasan.>> 10 Nakuamo joo kapala nnurusuq bolana Yusuf, <<Melomi, apa ia mandara la kupukaunan to todinii nnampaqi to isotan peraq, ia to laenna waqdingmo mpatarruh kalingkanna.>> 11 Pada naparri-parrimi mpupellao karungna jao mai keledai nabukaii, 12 naparessai kapala nnurusuq bolana Yusuf, mangpamula jio mai karungna anak pamungah ratu lako karungna anak tampak. Ia tonna karungnamo Benyamin naparessa, naampaqmi to isotan peraqna wakkeleq raja. 13 Pada ncaqceanmi bajunna to kakanna, sabaq massei penawanna. Napaendek poleqi to karungna deq keledainna, napole bokoq ngasan tama kota.
14 Jio unapi bolana Yusuf tonna ratu Yehuda sola sileqtona. Sujuqmi joo sileqtona doq litak. 15 Mangkadami Yusuf nakua, <<Ee, ciapari mimangpanggaukan susira tuu? Teqdaraka miissenni kumua ia tee akuq topakita-kitanaq?>> 16 Mebalii Yehuda nakua, <<Iyeq puang, apapara la kipau? Teqdamo kiissen ntonganan kalekiq. Umbopara la kikua mesakkan na Napangpekitanmi Puang Allataala kumua nang salakan? Jaji maqnamo tapukaunan ngasankan danggiq na ia manda to todinii nnampaqi joo isotan.>> 17 Nakuamo Yusuf, <<Teqda kulampugaukki susii tuu. Ia manda to todinii nnampaq isotan la kupukaunan. Ia to kamuq laenna waqdingmo kamuq pole rampaq lako ambeqmi.>>
Yehuda mpangkadan Benyamin
44:18-34
18 Malemi Yehuda ngkandoppiq Yusuf namangkada nakua, <<Taaddampangannaq puang, denpa la napau tee akuq kaunantaq. Danggiq takagallinaq, padakiq to rajana to-Mesir. 19 Susi tee to la kupau puang. Tapekutananmo tongkiratu baqtu piran kumua, <Denparaka ambeqmi? Denparaka sileqtomi?> 20 Kimebali kumua, <Den unapa ambeqkiq apa matuami. Na denpa mesaq adingkiq apa malolleqpa, sabaq matuami ambeqkiq namaneq jaji. Ia to kakanna mesaq indo, matemi. Jaji ia mandamo tuo na liwaq napakamojaq ambeqkiq.> 21 Tasuakan kisolanni tawaqding ngkitai. 22 Apa mebalikan kumua, <Ia joo adingkiq teqda nakullei sisarak ambeqkiq. Ia ke dipasisarakki, iamo la napumate ambeqkiq.> 23 Takuapa, <Teqdamo miwaqding ratu mangngolo poleq ke teqda misolanni to adimmi.> 24 Na ia tongkipole lako ambeqkiq jio Kanaan, kipauan ngasan to kadantaq susi to tapau. 25 Ia tonna sua poleqkan ambeqkiq ratu indeq mangngalli gandum, 26 mebalimokan kumua, <Teqda kamiq kilamale. Iapi kimaneq male ke kisolanni tuu adingkiq, sabaq teqda kidieloran mangngolo lako wakkeleq raja ke teqda kisolanni. Jaji la male unakan ke kisolanni.> 27 Nakuamo ambeqkiq, <Miissen kumua duara anak tokusikabalii Rahel. 28 Ia to pamungah nasalaimoq, mangkai napatei olok-olok, nateqdamo kukitai ratu lako too. 29 Ammilannalai omoq tee anak tampakkuq na matuamoq? Ia ke nnampaqi abalaq lako lalan liwaq napumasse penawangkuq, kamuq mpusabaqi na iamo la kupumate.> >>
30-31 Nakua omo Yehuda lako Yusuf, <<Taaddampangankan puang, gaja matuami ambeqkiq na liwaq napumasumangaq to anak tampakkana. Ia ke polekan lako ambeqkiq nateqda kisolanni to Benyamin adi tampakkiq, manassa iamo la napumasse penawanna. Jaji ia joo kamassean penawanna, kamiq mpusabaqi na iamo la napumate. 32 Na mangkamoq massumpa lako ambeqkiq kumua akuq la mbarakkanni tuu adingkiq. Kukua ianna teqda kisolanni pole tee adingkiq lako ambeqkiq, iamo kupusala kudisessa ratu lako matekuq. 33 Jaji metaqda tulungnaq lako kitaq puang, maqnamo na akuq torro indeq tapukaunan ssullei tee adingkiq Benyamin, akeqmo napole sola sileqtokuq laenna lako ambeqkiq. 34 Umbo la kukua pole lako ambeqkiq ke teqda kusolanni tuu adingkiq? Na tangkusara ngkita ambeqkiq ke masessai.>>