Yakub dilamun
50:1-14
50
Merraqbami Yusuf rrakaq ambeqna nakumarrak nnudungngi. 2 Nasuami Yusuf to kaunan biasa mpusara tomate, narampa-rampaii to tomate Yakub. 3 Den patangpulo allona dinii mpalakoi rampa-rampa joo tomate Yakub situruq adaq. Nabatingngii to-Mesir pitungpulo allona. 4 Ia tonna liwaqmo to wattu kamasussan, mangkadami Yusuf lako pangjama istana rajana to-Mesir nakua, <<Metaqda tulungnaq, paratupi lako raja tee petaqdangkuq kumua, 5 <Den petaqdanna Yusuf susi tee, <<Ia ke waqdingngi taeloranpaq male llamun ambeqkuq, sabaq ia tonna la matemo nasuanaq massumpa kumua, la kulamun jioi lamunan mangka napasadia jao tana Kanaan. Ianna mangkamo kulamun kutaqpa polemora.>> > >>a6 Nakuamo raja, <<Pauanni Yusuf kumua, <Malemoko llamunni to ambeqmu, pugaukmi to mangka mupassapan.> >> 7 Malemi Yusuf llamun ambeqna. Na sininna pangjamana raja, ambeq-ambeq llan istana na ambeq-ambeq llan tana Mesir male ngasan sola Yusuf palamun. 8 Sininna tau llan bolana Yusuf sola sileqtona na sininna tau llan bolana ambeqna male ngasan too. Pea mandamo sola patuoan to napatorro jio tana Gosyen. 9 Liwaq buda tau nturuqi, na den too tentara mangnyarang sola tomangkereta male.
10 Ia tonna ratumo lako kampong Atad jio kadellekanna Saqdan Yordan to nanii tau manglulluq gandum, gaja rongkai simbatingan memassean penawa. Napattantui Yusuf to wattu mbatingngi ambeqna pitung allo. 11 Ia tonna kitai to-Kanaan joo tau simbatingan sipangkada-kadami nakua, <<Gaja massei penawanna to to-Mesir mbatingngi tomate.>> Iamo nasangaii Abel-Mizraimb joo kampong jio kadellekanna Saqdan Yordan.
12 Susimi joo napugauk anakkana Yakub to napasan ambeqna. 13 Nabawai to tomate ambeqna deq tana Kanaan, napatamai Loqkoq Makhpela jio kadellekanna Mamre jio padang mangka naalli Nabi Ibrahim jio mai Efron to-Het.c 14 Ia tonna mangkamo Yusuf mpatamai loqkoq to tomate ambeqna, polemi doq tana Mesir sola sileqtona na sininna to tau undi palamun.
Yusuf mpakatana sileqtona
50:15-21
15 Ia tonna mangkamo llamun ambeqna sipangkada-kadami to sileqtona Yusuf nakua, <<La mangngapamikiq ke maneq la napabalahhikiq Yusuf to kagajatan tagaukanni tonna tee?>> 16 Mepasanmi lako Yusuf nakua, <<Ia tonna teqdapa namate ambeqtaq, nasuakan 17 mpaui tee kadanna matiq kumua, <Addampanganni to kasalanna kakammu to mangka napugauk.> Jaji ia tee kamiq taunnakan Puang Allataala to nasompa ambeqtaq, metaqda dampangkan to kasalan mangka kipugauk.>> Massei penawanna Yusuf tonna saqdingngi joo kada nakumarrak.
18 Malemi sileqtona mangngolo lako Yusuf, sujuqmi namangkada nakua, <<Kamiq tee kaunantaqkan.>> 19 Nakuamo Yusuf, <<Danggiq mimalajaq lako akuq, sabaq tangngianaq Puang Allataala. 20 Tongan kumua mangka kamuq mesaq penawa mpugauk kagajatan lako akuq. Apa ia joo kagajatan mipugauk, Napupenjajii kameloan Puang Allataala susi to miperasai too allo. Napakenaq Puang Allataala dikua nabuda tau dipasalamaq. 21 Danggiq mimalajaq, nang la kuben kamuq to miputuona sola repokkomi.>> Susimi joo Yusuf mpangkadai rampaq sileqtona napakatanai, nagaja sannang penawanna ssaqdingngi.
Matei Yusuf
50:22-26
22 Ia to Yusuf tattaqi torro jio tana Mesir sola keluargana. Saratuh sangpulo taun umuruqna Yusuf. 23 Nakitapa to ampo gariginna, iamo to ampo uttuqna Efraim. Tuo unapi Yusuf tonna jaji anakkana Makhir baqtu ampona Manasye nariwai susi anak jajianna.
24 Ia tonna la matemo Yusuf, nakuamo lako sileqtona, <<Teqdamo namasain kumate, apa Puang Allataala daqtan la ntulung kamuq, Nasolan kamuq messun llan mai tee tana Mesir, male deq tana to mangka Najanji ton-Namassumpa lako Nabi Ibrahim, Ishak na Yakub.>> 25 Nasua ngasanni Yusuf to sileqtona massumpa kumua, <<Ianna solanmo kamuq Puang Allataala lako joo tana Najanjian Puang Allataala lako Nabi Ibrahim, la mibawa tooi to batang rabukkuq.>>d
26 Saratuh sangpulo taun umuruqna Yusuf, namate jio tana Mesir. Dirampa-rampaii to batang rabukkuna nadipatama patti.