Kakanna Yusuf male doq tana Mesir mangngalli gandum
42:1-24
42
Ia tonna issenmi Yakub kumua den gandum dibaluk jiong tana Mesir, nacoccoi to anakkana nakuanni, <<Ciapari mimangjoko-joko bangra? 2 Den adeq gandum dibaluk jiong tana Mesir. Male kamuq doq mialliankiq, danggiq tamate tangkumande.>>a 3 Jaji malemi doq tana Mesir to sangpulo kakanna Yusuf nnalli gandum. 4 Ciaqi Yakub ke nasolanni to Benyamin adinna Yusuf, sabaq malajaqi iamo ke denni abalaq ngkannai joo anakkana. 5 Buda tau male nnalli gandum lako tana Mesir. Male todami anakkana Yakub, sabaq pebarranganmi namasussa diampaq to kande jio tana Kanaan.6 Ia joo wattu Yusuf wakkeleq raja jiong tana Mesir, na ia dipakuasa mangbaluk gandum lako tobuda. Ia tonna ratu kakanna Yusuf, mangngoloi lako Yusuf nasujuq jio olona. 7 Ia tonna kitai Yusuf to kakanna, sitonganna naissen, apa naanggaiq bang tangmperupai. Nakassakkii nakutanai nakua, <<Ee, topole umbora kamuq?>> Mebalimi nakua, <<Iyeq puang, to-Kanaankan, ratukan la mangngalli gandum.>> 8 Naissen Yusuf kumua kakanna tee ratu mangngolo, apa teqda naperupai kakanna. 9 Ia tonna sujuqmo kakanna, taqpa naingaranmi Yusuf to tindona tonna tee. Nakuamo Yusuf, <<Ratura kamuq mmata-matai umbonnara to ngenan tangdijagai indeq tana Mesir.>>b 10 Mebalii nakua, <<Teqda puang, raturakan tee kaunantaq nnalli gandum. 11 Ia tee kamiq mesaq ambeqrakan, tomaruruhkan, tangngiakan mata-mata.>> 12 Nakuamo Yusuf, <<Danggiq mangnguraga! Ratu kamuq mmata-matai kumua umbonnara to ngenan llan tee tana Mesir to teqda nadijagai.>> 13 Mebali omi kakanna Yusuf nakua, <<Sangpulo duakan sileqto puang, namesaq ambeqrakan. Ia to anak tampak torroi jio Kanaan sola ambeqkiq, na mesaqmi to jolo lako.>> 14 Mebalii Yusuf nakua, <<Tongan to kadangkuq kumua mata-mata kamuq. 15 La kuuji kamuq. Massumpanaq mpau sanganna raja kumua teqda miwaqding ssalaii tee tana Mesir, ke teqda naratu joloq to adi tampakkami. 16 Polemo kamuq mesaq nnalai. Ia to laenna la ditahan joloq ratu lako manassa to kadammi kumua tangngia kamuq mata-mata. Ia anna teqda misolanni ratu to adimmi, la massumpanaq mpau sanganna raja, tongan kamuq mata-mata.>> 17 Ditahan ngasanmi tallung allo.
18 Ia tonna tallung allomo ditahan, mangkadami Yusuf nakua, <<Akuq tee tongkalajaq-ngkasiriq-Naq Puang Allataala. La kuben kamuq lalan midaqtan tuo apa den mesaq to la mipugauk. 19 Ia ke manassa tomaruruh kamuq, akeq miditarungku mesaq mipole to laenna mbawanni gandum to keluargami danggiq natangkumande. 20 Ia to la mipugauk nang la misolan ratu indeq to adi tampakkami. Iamo la mpamanassai kumua tongan to kadammi, na teqda midipatei.>> Nasitujuimi sola ngasan.
21 Sipangkada-kadami nakua, <<Iamo tee buanna to kasalantaq lako adintaq to tapakario-rio tonna tee. Taperasai todami too to paqdik susi to tapakario-rioanni, moi namengkamase-mase tongan metaqda tulung lako kitaq, apa teqda tapesaqdingngii.>> 22 Nakuamo Ruben, <<Na tangkukuaraka baqtu piran, <Danggiq mipaqdikki tuu adintaq.> Apa ciaq kamuq mpesaqdingnginaq. Na ia too natulamikiq kamateanna.>>c 23 Sitonganna napahang Yusuf to basana, apa teqda naissenni kakanna sabaq mpakeri tau mbattuananni tonna sipangkada. 24 Nasalaii Yusuf, namale kumarrak. Ia tonna matanamo penawanna, male poleqmi sipangkada kakanna. Naalami to Simeon napangpepumpunganni jio olona sileqtona.
Kakanna Yusuf pole lako Kanaan
42:25-38
25 Napangpesuanmi Yusuf nadiissi gandum to karungna kakanna, nadipapole poleq to doiq pamajahna tama karungna. Nadipakinalloi too to la nakandena lako lalan. Napugauk ngasan tau to napangpesuan Yusuf. 26 Mangkai joo too, napaendekmi to karung gandumna deq keledainna, namaneq pole. 27 Ia tonna la mangbongimo denni mesaq sileqtona mbukai karung gandumna la mpakande keledainna. Nakitai to doiq pamajahna toppoq jao gandum. 28 Taqpa metambai nakua, <<Ee mane, dipapoleannaq doiq pamajahkuq. Kitari llanni karungkuq.>> Simalajatanmi, nambeqbeh mangkada kumua, <<Apamora tee Nagaukankiq Puang Allataala?>>
29 Ia tonna ratumo deq tana Kanaan, nacurita ngasanni lako ambeqna to apa pura jaji jiong tana Mesir. 30 Nakua, <<Nakassakkikan wakkeleq raja jiong tana Mesir, na nasangakan mata-mata. 31 Apa mebalikan kikua, <Tomaruruhkan kamiq, tangngiakan mata-mata. 32 Sangpulo duakan sileqto kisangngambeq. Mesaqmi jolo lako na ia to anak tampak torroi sola ambeqkiq jio tana Kanaan.> 33 Nakua omo joo wakkeleq raja, <La kuuji kamuq kumua tonganraka tomaruruh kamuq. Nang la kupatorro kamuq mesaq. Ia to laenna waqdingmo pole mbawan gandum keluargami to maparriq tangkumande. 34 Ia ke ratumi misolan to adi tampakkami, kuissenmi kumua tomaruruh tongan kamuq, tangngia kamuq mata-mata. Kumaneq llaqparanni to sileqtomi, miwaqding nnangahhi indeq tana Mesir to la miputuona.> >>
35 Ia tonna pada ntolloii to karungna, pada nnampaqi doiq pamajahna llan bang unapa sepuqna. Simalajatanmi tonna kitai joo doiq, moi ambeqna malajaq tooi. 36 Mangkadami ambeqna nakua, <<Taqdemi to anakkakuq, sabaq pangpubuaqmi. Taqdemi Yusuf sola Simeon, na la miala omi tee Benyamin. Andoq ee, tangkupuramo tee paqdikkuq!>> 37 Nakuamo Ruben lako ambeqna, <<Eloranni tee adingkuq male na akuqmora mbarakkanni. Ia ke teqda kusolanni pole, iamora tee anakkuq dua muane tapatei.>> 38 Apa nakua Yakub, <<Ciaqnaq ke misolanni to Benyamin, sabaq ia mandamo tuo, matemi to Yusuf. Na matuamoq, ia ke nnampaqi abalaq lako lalan, liwaq la napumasse penawangkuq, na iamo la kupumate.>>