Yusuf mbattuananni tindona rajana to-Mesir
41:1-36
41
Den duang taun mangkanna pangramean allo kajajianna raja to-Mesir, namangtindo raja keqdeh jio randan Saqdan Nil. 2 Ngkitai pitu sapin endek jiong mai saqdan, simalanyik kalena na simaloppo, ngkande reu jio randan saqdan. 3 Mangkai joo too ngkita omi pitu sapin laen siganjang kalena, simadoko endek jiong mai saqdan, na keqdeh jio saqde sapin simaloppo. 4 Ia tuu lako sapin siganjang kalena na simadoko ngkande sapin simalanyik kalena na simaloppo, sacappuqna. Mangkai joo too taqpa panaqdingmi raja.5 Ia tonna leppeng poleqmo raja, mangtindo omi ngkita sangbatang gandum den pitu bulinna mellong na simalappuk. 6 Mangkai joo too, ngkita omi gandum laen pitung buli, makase na simalangko, nairiq angin pebarrangan. 7 Ia joo gandum simalangko ngkande gandum simalappuk. Taqpa panaqdingmi raja naissenni kumua mangtindori paleqna.
8 Ia tonna makaleqmo, tangrapaqmi penawanna raja, napangpesuanmi ntambai sininna tomacca sola topaissen-issen jio tana Mesir. Ia tonna ratu ngasanmo, nacuritami raja to tindona, apa teqda bang to nnissen battuananna.a 9 Taqpa mangkadami joo tonnurusuq to naisoqna raja nakua, <<Metaqda dampangnaq lako kaletaq, sabaq den salakuq. Den parallu la kupauankiq tonna tee, apa tangkuingaranni. 10 Ia tontakagallikan sola tomanggaraga roti ditarungkukan sola dua llan bolana kapala pangjaga istana. 11 Den sangbongi kipada mangtindo na ia to tindokiq silaenan battuananna. 12 Den mesaq kallolo to-Ibrani, taunna kapala pangjaga istana, kisolan llan pangtarungkuan. Kicuritanni to tindokiq lako, na pada mpauankan battuananna. 13 Najaji tongan susi battuananna to tindokiq, tapapolenaq lako jamangkuq, na ditokeq to tomanggaraga roti.>>
14 Napangpesuanmi raja namale diala Yusuf, nataqpa dipasun llan mai pangtarungkuan. Ia tonna mangkamo mangcakkuruq sola ssullei pakeanna, mangngolomi lako raja. 15 Nakuamo raja, <<Mangtindonaq na moi mesaq tau teqda nnissenni battuananna. Den tau mpauannaq kumua musaqding mandai to tindo dicurita mumaccamo mbattuanannii.>> 16 Mebalii Yusuf nakua, <<Iyeq, tangngia kitaq akuq, apa Puang Allataala ia to la mpamanassa tonganni to battuananna na la tapumelo.>>
17 Nacuritanmi raja to tindona nakua, <<Mangtindonaq keqdeh jio randan Saqdan Nil. 18 Ngkitanaq pitu sapin endek jiong mai saqdan, simalanyik kalena na simaloppo, ngkande reu jio randan saqdan. 19 Mangkai joo too, ngkita omoq pitu sapin laen tangpakulle, siganjang kalena na simadoko endek jiong mai saqdan. Teqdapa naden kukita sapin susi joo ganjangna indeq tana Mesir. 20 Ia joo sapin simadoko na siganjang kalena ngkande sapin simaloppo. 21 Apa ia tonna mangkamo ngkandei, teqda pajan jio kalena, daqtan bang unai sidongkongan. Taqpa panaqdingmoq joo too. 22 Ia tongkuleppeng poleq omo, mangtindo omoq ngkita sangbatang gandum den pitu bulinna mellong na simalappuk. 23 Mangkai joo too, ngkita poleq omoq gandum pitung buli, malaju, makase na simalangko nairiq angin pebarrangan. 24 Ia joo gandum simalangko ngkande gandum simalappuk. Mangkami kucurita joo dua tindokuq lako topaissen-issen, apa moi mesaq teqda ngkullei mbattuanannii.>>
25 Mebalii Yusuf nakua, <<Ia joo dua tindotaq raja, sangrupara battuananna. Napauanmikiq Puang Allataala to apa la Napugauk. 26 Ia to pitu sapin simaloppo battuananna pitung taun. Ia to pitung buli gandum simalappuk battuananna pitung taun too, napada battuananna. 27 Ia to pitu sapin simadoko na ganjang kalena, na pitung buli gandum malangko na malaju nairiq angin pebarrangan, battuananna la pitung taun pebarrangan namasussa diampaq to kande. 28 Susimi joo to kusanga kumua, Napangpekitananmo Puang Allataala lako raja to apa la Napugauk. 29 Ia tee pitung taun lako, la nanii endek buda asseleq padang indeq sininna tana Mesir. 30-31 Mangkai joo too, la den pebarrangan pitung taun. Ia joo wattu teqdamo nadiingaran tonna buda asseleq padang, sabaq gaja laqdaq to pebarrangan namakase to sininna padang. 32 Penduankiq mangtindo, battuananna Napattantumo Puang Allataala to la jaji na la madoiq Napugauk.
33 Melo ke tapileii mesaq to tomacca to melo pangpikkirisanna, tapabarakkannii nnatoroq tee tana Mesir. 34 Tapilei tooi to baqtu pira-pira tau to la tapabarakkanni rrempun gandum indeq tana Mesir tee pitung taun wattu dioloi lako to nanii buda asseleq gandum, ia to asseleqna ditawa lima na sangtawan dianna. 35 Narempunni to sininna la dikandena llan wattu kabudanna kande, tapabarakkannii, naannai llan sininna kota. 36 Ia joo gandum dianna, dipasadia la dikande ke nadeteqmi to pebarrangan pitung taun indeq tana Mesir. Susipi joo namaneq teqda namate tangkumande to tobuda.>>
Yusuf diala wakkeleq raja
41:37-57
37 Ia joo napau Yusuf, nasitujui ngasan raja sola sininna kapala pangjamana. 38 Nakuamo raja ngkuanni sola ngasan, <<Teqda tanii nnampaq tau susi Yusuf, to gaja Nabarakkaqi Roh Allataala.>> 39 Nakuamo raja lako Yusuf, <<Napauan ngasanmoko Puang Allataala joo, jaji manassamo kumua moi mesaq tau teqda ncauq maccako nateqda too ncauq melo pangpikkirisanmu. 40 La kupakuasako indeq kaparentankuq na sininna taungkuq la naturuq ngasan to mupangparentan. Akuq manda to njaoanni kuasammu.>>b 41-42 Mangkai joo too, naalaimi raja llan mai jarinna to cincin caq karajaan napatamai jarinna Yusuf, namangkada nakua, <<Ia tee cincin la mpaassahko mangparenta indeq tana Mesir.>> Namaneq mpapakeii baju kaen lenan allusuq sola naparantei bulawan to kollongna.c 43 Napangparentanni raja nadipaendek kereta wakkeleq raja to Yusuf, najolo to pangbaraninna raja metamba lako tobuda nakua, <<Sadia kamuq, loqbanganni lalan!>> Susimi joo Yusuf diala wakkeleq raja jio tana Mesir. 44 Nakua raja ngkuanni, <<Akuqmo raja indeq tana Mesir, apa moi mesaq tau teqda waqding mangpugauk, ke teqda mueloranni.>> 45-46 Tallungpulomi taunna Yusuf tonna diangkaq wakkeleq raja. Nasangaii raja, <<Zafnat-Paaneah>>, napasibali tooi mesaq baine disanga Asnat, anakkana Potifera imang jio kota Heliopolisd.
Mangkai joo too, mekatabeqmi Yusuf lako raja namessun llan mai istana namale llilingngi tana Mesir. 47 Llan joo pitung taun tonna keasseleq melo tongan to padang, liwaq buda kande. 48 Ia to gandum napangperempunan Yusuf llan pitung taun, dianna ngasan llan kota. Jaji sininna kota dinii nnanna gandum asseleq baraqbah siandah kota. 49 Kabudannamo gandum napangperempunan Yusuf natangdipuramo ssukaqi, susi kassiq budanna titombon jio randan tasik.
50 Teqdapa nadideteq to pebarrangan namasussa diampaq to kande, najajimo dua anakkana Yusuf to nasikabalii Asnat anakkana Potifera, imang jio kota Heliopolis. 51 Nasangaimi Yusuf to anak pamungahna Manasye,e sabaq nakua, <<Naelorannaq Puang Allataala tangningaran kamasussankuq sola keluargana ambeqkuq.>> 52 Na ia to anak mangpenduanna nasangaii Efraim,f sabaq nakua, <<Nabennaq anak Puang Allataala jio tana kamasussankuq.>>
53 Ia tonna pitung taunmo keasseleq melo tongan to padang jio tana Mesir, 54 mangpamulami to pebarrangan pitung taun, susi to mangka napau Yusuf. Sininna kampong nakanna ngasan pebarrangan namasussa diampaq to kande, apa jio tana Mesir den bang to la dikandena.g 55 Ia tonna cappuqmo to la nakandena tobuda jio tana Mesir, pada malemi lako raja metaqda kande. Nasuai raja male lako Yusuf nakua, <<Male kamuq lako Yusuf mipugaukki to la nasuan kamuq.>>h 56 Ia tonna masainmo to pebarrangan llan sininna tana Mesir, napangparentanmi Yusuf naditimbakan ngasan to gudang dinii nnanna gandum, nadibaluk lako tobuda. 57 Ratu ngasan lako tana Mesir to tau jio mai bangsa laen nnalli gandum lako Yusuf, sabaq umbo-umbo nanii teqdamo nasala pebarrangan naliwaq masussa diampaq to kande.