Yusuf mbattuananni tindona dua tau llan pangtarungkuan
40:1-23
40
Ia tonna ditarungkumo Yusuf, den dua tomangjamana raja to-Mesir llan istana mpugauk kasalan lako raja. Iamo to kapala to nnurusuq naisoqna raja sola kapala to manggaraga rotinna raja. 2 Gaja galli raja lako joo dua tomangjamana, 3 napangpetarungkuanni llan bola kapala pangjaga istana to dinii ntarungku Yusuf. 4 Masain-sainmi llan pangtarungkuan, nasuai kapala pangjaga istana to Yusuf nnurusuqi.5 Den pissen wattu napada mangtindo joo dua tomangjamana raja. Ia to tindona silaenan battuananna. 6 Ia tonna makaleqmo nakitai Yusuf masse sola dua. 7 Nakutanaii nakua, <<Ciapari mimassera mane?>> 8 Pada mebalimi nakua, <<Mangtindokan, nateqda tau la mbattuanannii.>> Nakuamo Yusuf, <<Puang Allataala manda to waqding mpaissennikiq battuananna to tindo. Pauannaq kee to tindomi.>>
9 Napaumi tindona joo tonnurusuq to naisoqna raja nakua, <<Mangtindonaq ngkita mesaq garontoq anggur jio olokuq. 10 Ia joo garontoq anggur tallu tangkena. Maneq mentaruk to tangkena nataqpa mencaqbi, na ia to sisangrongeq taqpa matasak buanna. 11 Ia joo wattu ntoenaq isotanna raja, kualai joo bua anggur, kuparrai tama, kumaneq mbenni raja.>> 12 Nakuamo Yusuf, <<Susi tee battuananna tuu tindomu. Ia joo tallu tangkena battuananna tallung allo. 13 Jaji, tallung allopi napasunko raja llan mai ntee pangtarungkuan, napupangjama poleqko jio jaman jolomu, nnurusuq to naisoqna raja susi to biasanna mupugauk. 14 Apa ingarannaq dau ke melomi katuoanmu. Papajanni kameloan penawammu lako akuq, mupauanpi raja apa sabaqna kuditarungku, kuwaqding dipasun toda llan mai tee pangtarungkuan, 15 sabaq todibawa buniraq jio mai tana to-Ibrani, kuratu indeq tana Mesir, nateqda akuq kagajatan kupugauk kuditarungku.>>
16 Ia tonna issenmi joo tomanggaraga rotinna raja kumua melo battuananna joo tindona tonnurusuq to naisoqna raja, mpau todami tindona lako Yusuf nakua, <<Mangtindonaq njujung roti tallu bakuq. 17 Ia to bakuq jaona liu, nanii mangrupa-rupa deppa la diben raja, apa ratui to manuk-manuk ngkandei.>> 18 Nakuamo Yusuf, <<Susi tee battuananna to tindomu. Ia joo tallu bakuq battuananna tallung allo. 19 Tallung allopi napasunko raja llan mai pangtarungkuan, namaneq ntokeqko jao kaju mumate, naratu to manuk-manuk sikandei jukuqmu.>>
20 Ia tonna tallung allomo, sirumpai allo kajajianna raja, mpadenmi pangmaroasan sola sininna pangjama llan istana. Napangpesuanmi raja nadipasun llan mai pangtarungkuan to tonnurusuq to naisoqna raja sola tomanggaraga roti, nadisua keqdeh jio olona sininna pangjama istana. 21 Ia joo tonnurusuq to naisoqna raja, dipapole poleqi lako jaman jolona, nampasadian to naisoqna raja. 22 Apa ia joo tomanggaraga roti, ditokeqi, susi to tindona nabattuananni Yusuf.
23 Ia joo tonnurusuq to naisoqna raja nakalupaimi to Yusuf, teqdamo naingaran ncuritai lako raja to petaqdanna Yusuf.