Yusuf llan bolana Potifar
39:1-23
39
Nabawami to-Ismail to Yusuf doq tana Mesir nabalukki lako mesaq to-Mesir disanga Potifar. Ia to Potifar pangjamana rajana to-Mesir, to ngkapalai pangjaga istana. 2 Natulungngi PUANG Allataala to Yusuf namelo ngasan to asseleq jamanna. Torro jioi bolana Potifar puangna.a 3 Nakitai puangna kumua keasseleq melo ngasan to jamanna Yusuf, sabaq Natulungngi PUANG Allataala. 4 Gaja nakabudai Potifar, naangkaqi menjaji kapala pangjama llan bolana, napabarakkanni tooi sininna to napunnai. 5 Sipamula Yusuf napabarakkanni jaman Potifar llan bolana, Nabarakkaqi PUANG Allataala to Potifar sola repokkona na sininna to napunnai, la llanna bola, la jiona baraqbah. 6 Padami napunnai, padami napabarakkanan lako Yusuf. Ia mandamo naurusuq Potifar to nakandena.Ia to Yusuf melo pangkaleanna namagarattaq too. 7 Teqdapa namasain Yusuf torro jio bolana Potifar, nakacinnaimi balinna Potifar nasedei la sisola mammaq. 8 Apa ciaqi Yusuf nakua, <<Taaddampangannaq, sabaq sininna to napunnai puangkuq napakuasan ngasanmoq, teqdamo na ia mpuissenni to apa llan tee bola. 9 Teqdamo to laqbi makuasa na akuq llan tee bola, kitaq mandamo teqda kukuasaikiq, sabaq balinnakiq. Makaraka la kupugauk to kedo gajaq to tang-Nakabudai Puang Allataala?>> 10 Moi samatumbanna allo-allo nasede balinna Potifar, apa ciaqi Yusuf sisola mammaq.
11 Den wattu namentama bola Yusuf la mangjama, sirumpai teqda lalo muane laen llan bola. 12 Natoeimi balinna Potifar to bajunna Yusuf nakuanni, <<Maleko mai tasisola mammaq.>> Apa nalossokanni Yusuf to bajunna to napentoei joo baine, nalari lako salean. 13 Ia tonna kitami balinna Potifar to Yusuf lari natorro to bajunna, 14 ntambai ngasanmi kaunanna nakuanni, <<Kitai! Ia joo to-Ibrani ratu nabawa balingkuq, teqda naanggaqkiq. Mentamai sapaqkuq la nggauk salanaq, apa metamba-tambanaq. 15 Ia tongkumetamba-tambamo, larimi lako salean, natorro tee bajunna.>>
16 Naannai balinna Potifar joo baju, arannai ratu Potifar. 17 Ia tonna ratumo Potifar taqpa mangpeasami balinna nakua, <<Ia to to-Ibrani tabawa ratu indeq bola, mentamai sapaqkuq la nggauk salanaq. 18 Apa ia tongkumetamba-tambamo, taqpa larimi messun natorro tee bajunna.>> 19 Ia tonna mangkamo balinna mangpeasa, gaja birihmi Potifar. 20 Napangpejokkoanmi to Yusuf, naditarungku jio pangtarungkuan to dinii ntarungku tokasalan lako raja. Susimi joo naditarungku Yusuf.
21 Apa Natulung PUANG Allataala to Yusuf, Nadaqtan mpakamojaqi, iamo nakabudaii kapala pangtarungkuan.b 22 Napakuasai to Yusuf nnurusuq padanna toditarungku. Napakuasa tooi nnurusuq sininna jaman llan pangtarungkuan. 23 Teqdamo napuissenni kapala pangtarungkuan to jaman mangka napabarakkanan Yusuf, sabaq Natulungngi PUANG Allataala anna melo ngasan to asseleqna.