Yehuda na Tamar
38:1-30
38
Ia joo wattu malemi Yehuda ssalai sileqtona natorro sola mesaq muane to-Adulam disanga Hira. 2 Jiomo nanii Yehuda siissen mesaq anaqdara to-Kanaan disanga Syua to ambeqna, nasibali. 3 Kebaqtangmi joo bainena, nanjajian mesaq anak muane, nasangaii Er. 4 Kebaqtang omi joo bainena nanjajian anak muane, nasangaii Onan. 5 Njajian poleq omi mesaq anak muane, nasangaii Syela. Ia tonna jaji tee pea jioi kampong Kezib ambeqna.6 Ia to anak pamungahna Yehuda disanga Er napasibalii Tamar. 7 Apa Nakagallii PUANG Allataala to Er Napateii, sabaq gajaqi panggaukanna. 8 Mangkadami Yehuda lako Onan adinna Er nakua, <<Sisulle allonanmoko kakammu, ammujajian anak to waqding direken batiqna kakammu.>> 9 Apa naissen Onan kumua ianna den anakkana, teqda na ia la mpusangai. Jaji ianna sisola Tamar mammaq, to pura bainena kakanna, nabolloan saleananni to maninna, sabaq teqda namadoang ke denni anak nasikabalii. Jaji teqda batiq la dipasigona kakanna. 10 Apa gajaq joo panggaukanna Onan, Napumagalli PUANG Allataala Napatei tooi. 11 Nakuamo Yehuda lako Tamar, <<Polemoko lako tomatuammu, maqnamo mubalu joloq. Matonggopi anakkakuq Syela, mumaneq ratu poleq.>> Mangkadai Yehuda susi joo, sabaq malajaqi kumua iamo ke mate susi todai kakanna to Syela. Jaji polemi Tamar lako tomatuanna.
12 Masain-sain mangkanna joo, matemi anakkana Syua, bainena Yehuda. Na ia tonna mangkamo wattu kamasussanna Yehuda, malemi sola sobaqna disanga Hira, to-Adullam, deq kota Timna to nanii nggoncingngi bulu dombana. 13 Den tau mpaui lako Tamar kumua, <<Ia to Yehuda matuammu, jiomi lalan mangnguju deq kota Timna la male nggoncingngi bulu dombana.>> 14 Nasulleimi to pakean balunna, nasamboii bobong to lindona, namale cumadokko jio randan lalan tama kota Enaim to diola male lako kota Timna. Naissen Tamar kumua matonggomi to Syela anak tampakkana Yehuda, na teqda bang unapa nadipasiala.
15 Ia tonna kitai Yehuda teqda naissenni kumua Tamar, nasangari baine bandarang, sabaq nasamboi bobong to lindona. 16 Malemi Yehuda ngkandoppiqi joo baine cumadokko jio randan lalan nakuanni, <<Maleko mai tasisola mammaq.>> Teqda naissenni kumua ia tee baine mamintunna. Mekutanami Tamar nakua, <<Apara tabennaq ke sisolakiq mammaq?>> 17 Mebalii Yehuda nakua, <<La kubenko mesaq anak beke.>> Nakuamo Tamar, <<Waqding assalan denni kupentoei, arannai tasua to tau mbawannaq joo beke.>> 18 Mekutanami Yehuda nakua, <<Apara la kubenko mupentoei?>> Mebalii Tamar nakua, <<Tabennaq tuu cincin caqtaq to diulangngi jio kollongtaq sola tuu tekkentaq.>> Naben ngasanni joo apa napetaqda, namaneq sisola mammaq, nakebaqtang Tamar. 19 Polemi Tamar lako bolana, naalaii to bobongna, napake poleqi to pakean balunna.
20 Baqtu pira-pira masainna, nasuami Yehuda to Hira male mbawanni anak beke joo baine, dikua napapoleanni to apa mangka napangpetoean. Apa teqda naampaqi joo baine. 21 Napekutananmi Hira lako tau jio Enaim nakua, <<Umbori to baine bandaranga to biasa cumadokko ntee randan lalan?>> Mebalii joo tau nakua, <<Teqdapa ia naden baine bandarang ntee.>> 22 Polemi Hira mpauanni Yehuda nakua, <<Teqda kuampaqi joo baine. Na nakua too joo to-Enaim kumua, <Teqdapa ia naden baine bandarang ntee randan lalan tama kota.> >> 23 Nakuamo Yehuda, <<Akeqmo naala ngasanni to apa mangka kupangpetoean, assalan danggiq takasirisan. Kupangngattaimo la llaqbakki anak beke, apa teqda musiampaq.>>
24 Den tallung bulan masainna, nasaqdingmi Yehuda to kareba kumua ia to Tamar mamintunna mangkai manggauk sala nakebaqtang. Napangpesuanmi Yehuda kumua, <<Bawai jio mai joo baine, naditunu namate.>> 25 Ia tonna malemo disolan, mepasanni lako ambeq matuanna nakua, <<Oo, ambeq, ia to nnampui tee apa, iamo ngkebaqtangnginaq. Takita rampaqi, indara sipuapa tee cincin caq to diulangngi sola tee tekken.>> 26 Nakita rampaqmi Yehuda, naissenni kumua apanna joo, nakuamo, <<Tongan ia tee baine, akuqra to sala, sabaq nang teqdapa kupasibalii anakkakuq Syela.>> Teqdamo naden nasisola mammaq Yehuda na Tamar.
27 Ia tonna deteqmi wattu kakeanakanna Tamar, diissenmi kumua rendui to pea llan baqtangna. 28 Ia tonna mangnguriwaq mpasunni limanna joo pea mesaqna, natammui tomangpakeanak napagallangngii bannang malea nakua, <<Iamo tee pamungah.>> 29 Apa taqpa naruiq poleqi to limanna tama, namenjolo jaji to mesaqna. Disangaii Peresb, sabaq nakua tomangpakeanak, <<Gaja uku messun tee pea.>> 30 Mangkai joo too, maneqri jaji rendunna to dikapuq bannang malea, nadisangai Zerah.