Yusuf sola kakanna
37:1-11
37
Ia to Yakub torro jio tana Kanaan to nanii ambeqna mentoratu. 2 Susi tee curitanna batiqna Yakub.Den anakkana Yakub disanga Yusuf. Malolleqpa to Yusuf, maneq umuruq sangpulo pitu taunna namale mangrewa sola sileqtona muane to najajian Bilha na Zilpa bainena Yakub. Mangpeasai Yusuf lako ambeqna to panggaukan gajaq napugauk kakanna.
3 Matuami Yakub tonna jaji Yusuf, iamo nalaqbi mpakamojaqi to Yusuf na ia to kakanna. Nakabuatan tooi baju lando maballo. 4 Ia tonna issenni kakanna kumua laqbi dipakamojaq to Yusuf, nakabaqcii kakanna na teqdamo napangkadai meloi.
5 Den wattu namangtindo Yusuf, napaui lako kakanna joo tindona, nalaqbi napumabaqci kakanna. 6 Nakuamo lako kakanna, <<Pesaqdingngii, kucuritan kamuq tindokuq! 7 Mangtindonaq tajio ngasan baraqbah megandum, na ia to pangkutuhkuq jenjen llan tangnga. Na ia to pangkutuhmi ntalimbungngi joo gandumkuq namessujuq ssompai!>> 8 Nakuamo kakanna, <<Ee, musangarika kumua la menjaji rajako mparentakan?>> Samabaqci-baqcinnami kakanna ssaqdingngi joo curita tindona Yusuf.
9 Mangtindo poleq omi Yusuf nacurita poleqi lako kakanna nakua, <<Mangtindo poleq omoq, kukita allo sola bulan, na sangpulo mesa bintuin ssujuqnaq.>> 10 Ia joo tindona nacurita tooi lako ambeqna. Apa mabirihhi ambeqna nakua, <<Apara buaqna to tindomu, musangarika kumua la ratunaq sola indomu sola sileqtomu la ssujuqko?>> 11 Samapaqdik-paqdiknami penawanna kakanna Yusuf, apa ia joo tindona napallan penawa bang ambeqna.a
Yusuf dibaluk nadibawa lako tana Mesir
37:12-36
12 Den wattu namale to kakanna Yusuf rrewai beke sola dombana ambeqna jio siandah kota Sikhem. 13 Nakua Yakub lako Yusuf, <<Maleko req kota Sikhem to nanii kakammu mangrewa.>> Mebalimi nakua, <<Iyeq ambeq.>> 14 Nakuapa ambeqna, <<Maleko ngkitai, malagah-lagah unaraka to kakammu na matumba-tumbai to pangrewana, mupole mpauannaq.>> Malemi Yusuf jio mai Lombok Hebron arannai ratu lako kota Sikhem.
15 Male-melakoi Yusuf jio padang nnangah kakanna, nasitammu mesaq muane nakutanaii to Yusuf nakua, <<Apara taangah?>> 16 Mebalii Yusuf nakua, <<Nnangahnaq kakangkuq. Takitaraka umbo nanii mangrewa?>> 17 Mebalii joo tau nakua, <<Oo, nteei nnenaq, apa malemi. Kusaqding nakua la malei lako kota Dotan.>> Taqpa malemi Yusuf rrundunni, naampaq tonganni jio.
18 Mambela unapi Yusuf nakitami kakanna. Teqdapa naratu lako, nasitujuimi kakanna la mpateii. 19 Nakua sipangkada, <<Kitari, ratumi to salle tindo. 20 Aramo tapateii! Tacaqbeanni to tomate doq ntee bubun makase! Takuamora lako ambeqtaq kumua nakandei olok-olok masiaq. Takitai kumua matumbari jajinna joo tindona.>> 21 Nasaqdingngi Ruben to nasitujui adinna, namangngatta mpasalamaqi to Yusuf nakua, <<Danggiq tapateii! 22 Tapadoq bangmi bubun ntee tangnga padang, danggiq tapaqdikkii.>> Mangkadai Ruben susi joo, sabaq madoangngi la llaqparanni to Yusuf, namaneq ssuai pole lako ambeqna.
23 Ia tonna ratumo Yusuf lako, taqpa narabakkimi kakanna to baju lando maballona. 24 Namaneq nggararakki nasumbananni doq bubun makase. 25 Mangkai joo too, malemi kumande to sileqtona. Ia tonna mukkun kumande, ngkitami sangsiturusan pangdangkang to-Ismail pole jio mai membuntunna Gilead mangnguju doq tana Mesir. Ia to untana dipassampei damaq, lite kaju dipupejampi sola lite kaju busarungnguq. 26 Nakuamo Yehuda lako sileqtona, <<Apara buaqtaq la mpatei buni adintaq? 27 Tabaluk bangmi lako joo pangdangkang to-Ismail. Danggiq tapaqdikkii, moi samatumbanna nang la adintaqi.>> Nasitujuimi sileqtona, apa teqdai Ruben jio. 28 Na ia tonna liumo to pangdangkang to-Ismailb, napaendekmi to Yusuf jiong mai bubun, nabalukki lako to-Ismail duangpulo peraq.c Nabawami pangdangkang lako tana Mesir.d 29 Ia tonna male poleq Ruben lako ntuu joo bubun nakitai nateqdamo Yusuf jiong, ncaqceanmi bajunna, sabaq massei penawanna. 30 Malemi lako to nanii adinna namangkada nakua, <<Andoq ee, apamora la kupugauk? Na taqdemi joo adintaq jiong bubun!>>
31 Mangkai joo too, nggereqmi mesaq beke to kakanna, nacummui to bajunna Yusuf doq rara beke. 32 Napangpebawanmi joo baju lando maballo, namepasan lako ambeqna nakua, <<Ia tee baju kiampaq. Takita meloi kee, bajunnaraka anakkataq?>>
33 Nakanassai Yakub joo baju, nakua, <<Io, tonganna, bajunna anakkuq tee. Manassa naattami olok-olok masiaq. Huu, matemi anakkuq Yusuf, natame-tame olok-olok!>> 34 Nacaqceanmi Yakub to baju llan kalena, nasulleii baju karung, sabaq gaja sussai penawanna. Gaja sainni mbatingngii joo anakkana. 35 Ratu ngasanni to anakkana muane sola baine mpakatanai, apa teqda namadoang dipakatana. Nakua, <<Sitammupaq anakkakuq jiong lino tomate, kumaneq paja masussa.>> Susimi joo Yusuf nabatingngi ambeqna.
36 Ia tonna jiomo tana Mesir to Yusuf, nabaluk poleq omi to-Ismail lako Potifar, pangjamana rajana to-Mesir, to ngkapalai pangjaga istana.