Batiqna Esau
36:1-19
36
Ia to Esau to disanga too Edom susi tee to nunnungan batiqna, 2 Esau sibali tallu baine to-Kanaan, iamo to Ada anakkana Elon to-Het, Oholibama anakkana Ana, ampona Zibeon to-Hewi,a 3 Basmat anakkana Ismail adinna Nebayot.b 4 Ada njajian Elifas, Basmat njajian Rehuel, 5 na Oholibama njajian Yeush, Yaelam na Korah. Ia to anakkana Esau, jaji jio ngasan tana Kanaan.6 Malei Esau lako kampong laen ssalai Yakub, nasolan ngasanni to bainena sola anakkana, nasolan tooi to taunna. Nabawa ngasanni to sininna patuoanna sola to napunnai, asseleqna jio tana Kanaan. 7 Messarakmi Esau jio mai Yakub, sabaq teqdamo nakullei torro sola jio padang nanii mariqpih, napada sugihmi. Teqdamo nagannaq to reu nakande patuoanna, sabaq gaja budami. 8 Ia to Esau to disanga too Edom, torro jaoi padang membuntunna Seir.
9 Iamo tee to batiqna Esau, tojolona to-Edom, jao padang membuntunna Seir. 10-13 Ia to bainena Esau disanga Ada, njajian mesaq anak muane disanga Elifas. Na Elifas lima anakkana anak muane, iamo to Teman, Omar, Zefo, Gaetam na Kenas. Denpa kaunanna Elifas napubaine, disanga Timna. Njajianni anak muane disanga Amalek. Iamo joo to ampona Ada, bainena Esau.
Ia to bainena Esau disanga Basmat njajian mesaq anak muane disanga Rehuel. Na ia tee Rehuel, appaq anakkana muane, iamo to Nahat, Zerah, Syama na Miza. Iamo joo to ampona Basmat, bainena Esau.
14 Ia to bainena Esau disanga Oholibama, anakkana Ana, ampona Zibeon, njajian tallu anak muane disanga Yeush, Yaelam, na Korah.
15 Iamo tee to kapala suku jio mai batiqna Esau: Ia to Elifas anak pamungahna Esau, iamo tojolona tee kapala suku: kapala suku Teman, kapala suku Omar, kapala suku Zefo, kapala suku Kenas, 16 kapala suku Korah, kapala suku Gaetam na kapala suku Amalek. Ia ngasanmo joo to kapala suku batiqna Elifas jio tana Edom, batiqna Ada bainena Esau. 17 Ia to Rehuel, anakkana Esau, iamo tojolona tee kapala: kapala suku Nahat, kapala suku Zerah, kapala suku Syama, na kapala suku Miza. Ia ngasanmo joo to kapala suku batiqna Basmat, bainena Esau jio tana Edom. 18 Ia to kapala suku batiqna Esau nasikabali Oholibama, iamo to kapala suku Yeush, kapala suku Yaelam, na kapala suku Korah, ia ngasanmo joo kapala suku batiqna Oholibama bainena Esau, anakkana Ana. 19 Iamo joo to sininna batiqna Esau to disanga too Edom sola kapala sukunna.
Batiqna Seir
36:20-30
20-21 Ia to jolo torro jio tana Edom iamo to batiqna Seir to-Hori. Ia to kapala sukunna, iamo to Lotan, Syobal, Zibeon, Ana, Disyon, Ezer na Disyan. 22 Lotan, iamo tojolona Hori sola Heman. Den baine sileqtona Lotan disanga Timna. 23 Syobal, iamo tojolona Alwan, Manahat, Ebal, Syefo na Onam. 24 Ia to Zibeon dua anakkana muane, iamo to Aya sola Ana. Iamo tee Ana, to nnampaq mata wai malussu jio padang makase tonna rrewai keledainna ambeqna. 25-26 Ia to Ana, iamo ambeqna Disyon, na ia tee Disyon iamo tojolona Hemdan, Esyban, Yitran sola Keran. Den too anakkana Ana baine disanga Oholibama. 27 Ia to Ezer, iamo tojolona Bilhan, Zaawan sola Akan. 28 Ia to Disyan, iamo tojolona Us sola Aran. 29-30 Ia to to-Hori jio tana Edom, ia to kapala sukunna iamo to Lotan, Syobal, Zibeon, Ana, Disyon, Ezer na Disyan.
Sininna raja to mangparenta jio tana Edom
36:31-43
31-39 Ia tonna teqdapa raja mangparenta jio tana Israel, ia to raja situruq-turuq mangparenta jio tana Edom, iamo to Bela anakkana Beor tojio mai kota Dinhaba, Yobab anakkana Zerah to-Bozra, Husyam tojio mai tana Teman, Hadad anakkana Bedad tojio mai kota Awit, iamo to ntalo to-Midian llan kapararian jio tana Moab, Samla to-Masreka, Saul to-Rehobot kota jio randan saqdan, Baal-Hanan anakkana Akhbor na Hadar tojio mai kota Pahu. Ia to bainena Hadar disanga Mehetabeel, anakkana Matred, ampona Mezahab.
40-43 Ia to Esau, iamo tojolona kapala suku to-Edom to dipau ntee, iamo to Timna, Alwa, Yetet, Oholibama, Ela, Pinon, Kenas, Teman, Mibzar, Magdiel na Iram. Na pantan ssangaii to kampong nanii torro situruq sanga kapala sukunna.