Yakub pole lako kota Betel sola repokkona
35:1-8
35
Den wattu namangkada Puang Allataala lako Yakub nakua, <<Akuqmo Puang Allataala to mpessitammuiko jio kota Betel, tommupalai jio mai kakammu Esau. Sadiamoko male deq kota Betel. Torromoko jao mukabuaq mesaq ngenan pangkaroban to la munii massompa lako Akuq.>>a 2-3 Nakuamo Yakub lako repokkona sola lako sininna to tonasolan torro kumua, <<Tasadiamo tamellele lako kota Betel. La ngkabuaqnaq ngenan pangkaroban lako Puang Allataala jio, Puang Allataala to mangka ntulungnaq tongkumasussa, sola tattaq ssolannaq umbo-umbo kunii male. Caqbeanni to tau-tau dewata miampui, mipaccingngi kalemi, mipake pakean macero.>> 4 Naben ngasanmi lako Yakub to tau-tau dewata sola anting-anting to napunnai. Nalamunni Yakub jio toq garontoq kaju matonggo siandah kota Sikhem. 5 Ia tonna malemo Yakub sola repokkona, Napupemmalajaqi Puang Allataala to tau llan kota mengguririkkina, nateqda naulaqi to Yakub sola anakkana.6 Ratumi Yakub sola repokkona lako kota Betel jio tana Kanaan. Ia joo kota Betel disanga Lus tonna tee. 7 Ngkabuaqmi ngenan pangkaroban Yakub jio, nasangaii, <<El-Betel>>,b sabaq iamo ngenan mangka nanii Puang Allataala mpessitammuii, tonna palai jio mai kakanna. 8 Ia tonna matemo Debora to ntaranak Ribka tonna biccuq, dilamunni jio siandah garontoq kaju matonggo sauqna kota Betel. Iamo nadisangai joo garontoq kaju, <<Kaju Mepakumarrak>>.
Puang Allataala mbarakkaqi Yakub jio Betel
35:9-15
9 Ia tonna polemo Yakub jio mai Mesopotamia, Napessitammui poleqmi Puang Allataala Nabarakkaqii. 10 Nakua Puang Allataala ngkuanni, <<Teqdamo muladisanga Yakub, apa disangamoroko Israel.>> Susimi joo, Puang Allataala ssullei sanganna Yakub.c 11 Mangkada omi Puang Allataala lako Yakub Nakua, <<Akuqmo Puang Allataala to makuasa. La Kupebudai batiqmu namenjaji buda bangsa. Pole jio mai batiqmu nanii jaji pira-pira raja. 12 Ia tee tana Kanaan to mangka Kuben Ibrahim nenemu sola Ishak ambeqmu, la Kubenko sola batiqmu.>>d 13 Ia tonna mangkamo Puang Allataala mangkada susi joo, Nasalaimi joo ngenan to Nanii mpangkadai Yakub. 14 Napakeqdehhimi batu Yakub joo ngenan menjaji batu pangpangngingaran. Napassompan anggur jao joo batu, namaneq ntolloii minynyak zaitun.e 15 Nasangai Yakub joo ngenan <<Betel>>, sabaq iamo ngenan mangka nanii Puang Allataala mpangkadai Yakub.f
Kamateanna Rahel
35:16-22a
16 Mangkai joo too keqdehmi Yakub sola taunna jio mai kota Betel. Ia tonna mandoppiqmo lako kota Efrata, la keanakmi Rahel, apa gaja sussai keanak. 17 Ia tonna gaja suliq mangnguriwaq, nakuamo joo tomangpakeanak, <<Pemawatangngii penawammu Rahel, muane unapa tee pea mujajian.>> 18 Ia tonna gajaqmo nasaqding Rahel, na la kaqtumi sungaqna, nasangaimi Ben-Oni joo anakkana maneq najajian, battuananna <<anak kamaparrisankuq>>, apa ia ke ambeqna nasangaii Benyamin, battuananna <<anak maupaq>>.g 19 Ia tonna matemo Rahel, dilamunni jio randan lalan lako kota Efrata, to disanga kota Betlehem too allo. 20 Naosokkii pasuk Yakub to lamunanna Rahel, naratu lako too allo jio unapi joo pasuk.
21 Mangkai joo too, mpatarruhmi kalingkanna Yakub, to disanga too Israel, nampakeqdeh tenda jio mesaq ngenan sambaliqna menara Eder. 22 Ia tonna jio unapa to nanii mangtenda, malei Ruben mammaq sola Bilha baine laenna ambeqna, kaunanna Rahel. Nasaqdingngi Yakub joo apa jaji nagaja birih.h
Sanganna anakkana Yakub to pea muane
35:22b-26
Ia to Yakub sangpulo dua anakkana muane. 23 Ia to anak nasikabalii Lea, iamo to Ruben anak pamungah, namaneq Simeon, Lewi, Yehuda, Isakhar na Zebulon. 24 Ia to anak nasikabalii Rahel, iamo to Yusuf sola Benyamin. 25 Ia to anak nasikabalii Bilha, kaunanna Rahel, iamo to Dan sola Naftali. 26 Ia to anak nasikabalii Zilpa, kaunanna Lea, iamo to Gad sola Asyer. Iamo joo to anakkana Yakub jaji jio tana Mesopotamia.
Kamateanna Ishak
35:27-29