Dina sola Sikhem
34:1-31
34
Den anakkana Yakub to najajian Lea disanga Dina. Den wattu namale joo anaqdara sikita baqtu pira-pira baine to-Kanaan. 2 Nakitai Sikhem anakkana Raja Hemor to-Hewi joo anaqdara nalarianni namaneq nggauk salai. 3 Napangkadai mellongngi to Dina, sabaq gaja nakabudai na liwaq nakacinnai. 4 Nakuamo Sikhem lako ambeqna, <<Tatulungnaq umbo nakua cara kuwaqding nnalai joo anaqdara, kupubainei.>> 5 Nasaqdingmi Yakub to kareba kumua mangkai Dina nagauk sala Sikhem. Ia to anakkana Yakub muane jio ngasanpi padang mangrewa, jaji nakammaran bangpi Yakub joo passalan ratu lako polena to anakkana.6 Malemi Hemor ambeqna Sikhem, la sipangkada Yakub. 7 Sirumpa todai pole jio mai padang to anakkana Yakub. Ia tonna saqdingngi joo apa jaji lako adinna, gaja paqdikki penawanna naliwaq mabirih, sabaq mangkai Sikhem mpakasiriq to-Israel iamo to nggaukki sala Dina, anakkana Yakub. Teqda lalo nawaqding dipugauk susi joo. 8 Nakuamo Hemor lako Yakub sola lako anakkana, <<Gaja nakabudai Sikhem anakkuq, joo anakkataq, tulungnaq tapasibalii. 9 Melo ke tasitujuii kumua ia to anaqdarammi la merrampean lako bangsakiq, na ia to anaqdarangkiq merrampean lako bangsami. 10 Waqdingkiq torro indeq kampongkiq. Malekiq llingkai padang, iami takabudai iamo tanii torro, tapupadangngi.>> 11 Mangkadami Sikhem lako ambeqna Dina sola kakanna nakua, <<Dennaa upaq mitarimai tee petaqdangkuq, apa to mikadoangngi iamo la kuben kamuq. 12 Paui apara to mikabudai, mipattantui pira to la kupaendek. La kuben kamuq apa to mipetaqda assalan mielorannaq sibali sola tuu anaqdarammi.>>
13 Mangnguragai anakkana Yakub lako Sikhem sola Hemor ambeqna, sabaq mangkai Sikhem nggauk sala Dina. 14 Nakuamo kakanna Dina lako Sikhem sola ambeqna, <<Kipumasiriq mpasibali adingkiq na toteqda nadisunnaq, jaji teqda kiwaqding mpugaukki joo. 15 La kitarima to petaqdammi ke mitarima todai tee petaqdankiq, iamo to sininna muane llan ntee kampong la disunnaq ngasan susi kamiq. 16 Mangkapi joo, tamaneq waqding sirampean. Kitorro indeq tamenjaji mesaq bangsa. 17 Apa ia ke ciaq kamuq ntarimai to petaqdangkiq, la kibawa kamiq tee adingkiq kimale ssalai tee kampong.>> 18 Nasitujuimi Hemor sola Sikhem joo petaqdanna anakkana Yakub. 19 Taqpa sadiami Sikhem la disunnaq susi to napattantu anakkana Yakub sabaq liwaq nakacinnai joo Dina. Ia to Sikhem gaja dianggaq llan sininna kaum keluargana.
20 Malemi Hemor sola Sikhem lako ngenan kasirempunan jio babangan kota, napaui lako tau to torro llan kota nakua, 21 <<Ee tokupusileqto! Ia to to-Israel, madoangngi tasisobaq. Jaji maqnamo natorro indeq kampongtaq, na teqda ssakkalangngi llingkai padang. Masagena una tee kampongtaq la nanii torro. Waqdingkiq sibali anaqdaranna, susi tooi, waqdingngi sibali anaqdarantaq. 22 Apa iapi namadoang torro indeq kampongtaq tamenjaji mesaq bangsa, ke tatarimai to napattantu kumua, sininna to muane llan tee kampong la disunnaq, susi to muane to-Israel disunnaq. 23 Ia ke tasitujuii to petaqdanna, tatorro sola na sininna patuoanna sola to napunnai, taampui toomi.>> 24 Sininna to tosirempun ntuu jio babangan kota, ssitujuii joo petaqdanna Hemor sola Sikhem, nadisunnaq ngasan to muane llan joo kota.
25 Tallung allo mangkanna joo, tonna kamapaqdik-paqdikanna joo muane mangka disunnaq, ia to anakkana Yakub dua, kakanna Dina disanga Simeon sola Lewi, nnala laqboh landona namentama kota teqda sakkalangngii. Napatei ngasanni to muane llan ntuu joo kota. 26 Moi Hemor sola Sikhem nabaqta tooi laqboh lando namate. Naalai to Dina jio mai bolana Sikhem nasolanni pole. 27 Mangkai joo too, ratumi to anakkana Yakub laenna nnalai to napunnai tau to napatei llan kota. Membalahhi, sabaq ia to Dina adinna, mangkai nagauk sala Sikhem. 28 Naala ngasanni to bekena, dombana, sapinna, keledainna, na sininna to apa llan kota sola jio padang. 29 Naala ngasan tooi to sininna barang makeanggaq, natarungku ngasanni to baine sola pea, naala ngasanni to issi bola llan kota.
30 Nakuamo Yakub lako Simeon sola lako Lewi kumua, <<Misussainaq. La nakabaqcimoq sininna tau llan tee tana Kanaan, iamo to to-Kanaan sola to-Feris. Na teqda nabuda tauntaq. Ia ke mangmesai joo tau nnewakiq nararikiq, la masolang ngasan to keluargataq.>> 31 Apa nakua anakkana Yakub, <<Teqda kilangkita-kitai to adingkiq dipasusi baine bandarang.>>