Yakub sitammu Esau
33:1-20
33
Nakitami Yakub to Esau ratu sola pataratuh taunna. Pada napabarakkannimi lako indona to anakkana, lako Lea, lako Rahel, na lako joo dua kaunan Zilpa sola Bilha. 2 Nasuai Yakub jolo joo dua kaunan sola anakkana, namaneq Lea sola anakkana, naundi jio bokoq to Rahel sola Yusuf anakkana. 3 Na ia to Yakub jolo lako lumingka. Pempitui sujuq arannai ndeteq kakanna. 4 Apa larii Esau mpendeteqi Yakub narakaqi naudungngi. Nakumarrak sola dua. 5 Ia tonna kitai Esau tuu lako baine sola pea, mekutanai nakua, <<Indamora tuu musolan?>> Mebalii Yakub nakua, <<Anakkuq ngasanmo joo. Nabarakkaqimoq anak Puang Allataala.>> 6 Mangkai joo too napendeteqimi to Esau joo dua kaunan sola anakkana, nasujuq jio olona. 7 Namaneq ratu Lea sola anakkana nasujuq, naundi Yusuf sola Rahel nasujuq too. 8 Mekutanai Esau nakua, <<Apara tujunna joo tokusitammuan nnenaq mbawa patuoan?>> Mebalii Yakub nakua, <<Ia to patuoan la kubenkiq dikua namasannang penawantaq ntarimanaq.>> 9 Apa nakua Esau, <<Ee adingkuq, paitiq bangmi tuu la mubennaq, gannaq una to kuampui.>> 10 Nakuamo Yakub, <<Danggiq tasusi tuu kakangkuq. Ia ke takamaseinaq, tarimami tee la kubenkiq. Ia ke kukitai lindotaq padanaq to ngkita lindo-Na Puang Allataala, sabaq masannangkiq ntarimanaq. 11 Tatarimami tee apa kubenkiq, sabaq Nakamaseinaq Puang Allataala, Nabennaq sininna to apa kuparallui.>> Nasede tarruhhi Yakub arannai natarima Esau joo nabenni. 12 Nakuamo Esau, <<Tamalemo sola, kujoloan kamuq.>> 13 Apa mebalii Yakub nakua, <<Taissen kakangkuq kumua, ia tee mai pea, tangnakullepa lumingka, maqnamo kipaelaq-elaq bangmi. Na ia tee mai patuoan cumucupa to anakkana, ia ke diparukui matikaq lumingka, sangngallora napuramo mate. 14 Jolomikiq kuundi sola tee pea mpaenaq-enaqi sola patuoan kiarannai ratu lako membuntunna Seir to tanii torro.>> 15 Nakuamo Esau, <<Ia ke susii tuu melo ke kupatorroanko baqtu pira-pira taungkuq.>> Apa nakua Yakub, <<Danggiq omo tasussai bang kaletaq, gannaqmo to masannangkiq ntarimanaq.>> 16 Susimi joo, na ia bang unamo joo allo, napole Esau lako membuntunna Seir. 17 Apa ia to Yakub male lakoi Sukot, nampakeqdeh bola jio, na ia to patuoanna nakabuatan bola-bola. Iamo nasangai Sukota joo ngenan.18 Mangkai joo too, mellelemi Yakub jio mai Sukot, mangnguju lako tana Kanaan. Salamaqi ratu lako kota Sikhem na mpakeqdeh tenda siandah kota. Susimi joo Yakub pole jio mai Mesopotamia. 19 Ia joo padang nanii mpakeqdeh tenda jio Sikhem, naalli saratuh doiq peraq jio mai batiqna Hemor. Ia joo Hemor ambeqna Sikhem.b 20 Mpakeqdehmi ngenan pangkaroban Yakub jio, nasangaii, <<El, Elohe Israel>>. Battuananna Puang Allataala to nasompa Israelc, Iamo Puang Allataala.