Yakub sadia la sitammu Esau
32:1-21
32
Mpatarruhmi kalingkanna Yakub pole lako kampongna. Ratumi to baqtu pira-pira malaekaq-Na Puang Allataala ssitammuanni. 2 Ia tonna kitai Yakub joo malaekaq nakuamo, <<Ia tee ngenan, nanii tendana tentara-Na Puang Allataala.>> Iamo nasangai Mahanaima joo ngenan.3 Nasuami Yakub to baqtu pira-pira tau jolo lako membuntunna Seir jio tana Edom mpau pepasan lako Esau kakanna. 4 Nakua Yakub lako taunna, <<Susi tee to pepasankuq la mipau lako kakangkuq Esau kumua, <Ia tee akuq Yakub kaunantaq. Ia to wattu pura dibokoq susinaq tomentoratu torro sola ambequrekuq Laban. 5 Na ia too nnampuimoq sapin, keledai, domba, beke sola kaunan muane na baine. Mepasannaq, kukua kentakamaseinaq puang.> >> 6 Ia tonna polemo joo tonasua Yakub, pada nakuamo, <<Polemokan sikita kakantaq Esau, na llanmi kalingkan too, la ratu ssitammuankiq. Den pataratuh tau nasolan.>> 7 Napaduang torroanni Yakub to taunna, sola dombana, bekena, sapinna na untana, sabaq ia tonna saqdingngi Yakub joo kareba karatuanna Esau, gaja lajaqi natangrapaq penawanna. 8 Napikkiriqi kumua, <<Ia ke ratui Esau rrarii to sangtorroanna, den unapa sangtorran waqding mpalaian kalena.>> 9 Massambajangmi Yakub nakua, <<Oo PUANG Allataala to nasompa nenekuq Ibrahim sola ambeqkuq Ishak, Tapesaqdingnginaq! Tasuamoq pole lako kampongkuq to nanii keluargakuq. Na mangkamoq Tajanji kumua la Tapugauk lako akuq to sininna la kupumelona. 10 Tattaqkiq mpakamojaqnaq na sitonganna tangsipatoqnaq ntarimai joo pangpakamojaq-Taq. Ia tongkumale llambanni Saqdan Yordan, teqda bang to kubawa, tekken mandara. Na ia too, poleqmoq, mbawa duang torroan taungkuq sola patuoankuq. 11 Metaqda tulungnaq, Tapasalamaqnaq jio mai kakangkuq Esau. Malajaqnaq iamo ke ratui mpateinaq sola balingkuq na anakkuq. 12 Mangkami-Kiq mangjanji kumua la Tapugauk lako akuq to sininna la kupumelona na la Tabennaq buda batiq, susi budanna kassiq jio randan tasik, teqda tau ngkullei rrekenni.>>b
13 Ia tonna mangkamo mangbongi jio to nanii massambajang, naalami Yakub to patuoanna la naben Esau kakanna, 14 iamo to dua ratuh beke baine, duangpulo beke muane, dua ratuh domba baine, duangpulo domba muane, 15 tallung pulo indo unta sola anakkana to cumucu unapa, patangpulo sapin baine, sangpulo sapin muane, duangpulo keledai baine na sangpulo keledai muane. 16 Natawai joo patuoanna baqtu pirang-pirang torroan, napada mpabarakkannii lako simesaq kaunanna. Nakuanni kumua, <<Jolomo kamuq, kuundimora. Padenni parallaqna to sisangtorroan.>> 17 Napangparentanni Yakub lako kaunanna pamula njoloanni nakua, <<Ia ke sitammuko kakangkuq Esau nakutanaiko kumua, <Indara sanganna puangmu? Umbora la mupangngujui? Indara patuoan tuu mubawa?> 18 La mebaliko kumua, <Patuoanna kaunantaq Yakub, la nabenkiq. Ia to kaunantaq Yakub undimi jio mai bokoq.> >> 19-20 Na susi too napauanni to kaunan mangpenduanna, mangpentallunna, sola to pira-pirapa kaunan to napabarakkanni joo pirang torroan patuoanna. Nasabaq napikkiriqi Yakub kumua ia joo patuoan napassedean lako Esau la napumatanai, na ia ke sitammui dau, la masannang penawanna ntarimai. 21 Nakiringngi joloq joo patuoan, natorropa mangbongi jio tendana.
Yakub massiboboq jio Pniel
32:22-32
22 Ia bang unamo joo bongi, namiqcok Yakub nasolanni joo bainena dua sola dua kaunanna to napubaine too, na sangpulo mesa anakkana, namale mpalambanni jio kalambanan Saqdan Yabok. 23 Ia tonna mangkamo Yakub mpalamban repokkona, pole poleqmi na ia to sininna napunnai nabawa ngasan, nasuai to kaunanna mpalambanni. 24 Apa torro unapi Yakub mesa-mesa. Ratumi to mesaq muane, nasiboboq ratu lako la tibangkahna mariwang. 25 Ia tonna issenni joo muane kumua teqda nalapatalo, nasalaqpai to garontoq upanna Yakub, nasisala to panglesoanna. 26 Nakuamo joo muane, <<Laqparannaq kumale, la tibangkahmi to mariwang.>> Mebalii Yakub nakua, <<Teqda kulalaqparankiq ke teqdapi tabarakkaqinaq.>>c 27 Mekutanai joo muane nakua, <<Indara sangammu?>> Mebalii Yakub nakua, <<Disanganaq Yakub.>> 28 Nakuamo joo muane, <<Tangngiamo Yakub sangammu, disangamoroko <Israel>, sabaq mangkamoko siboboq Puang Allataala, muewa too tolino, na iko patalo.>>de 29 Mangkadai Yakub nakua, <<Tapau todai to sangan-Taq.>> Apa mebalii joo muane nakua, <<Teqda muparallu mpekutananni to sangangkuq.>> Nabarakkaqimi to Yakub.f 30 Nakuamo Yakub, <<Mangkamoq sikita lindo Puang Allataala, apa tuo unapaq.>> Iamo nasangaii Yakub joo ngenan Pnielg. 31 Ia tonna mariwangmo, nasalaimi Yakub joo ngenan disanga Pniel, apa gentoi sabaq sisalai to panglesoan upanna. 32 Ratu lako too allo, ia to batiqna Israel teqda nakandei to jukuq olok-olok ssamboi panglesoan upa, sabaq mangkami Yakub disalaqpa upanna nagento.