Yakub mpalaian kalena jio mai bolana Laban
31:1-21
31
Nasaqdingmi Yakub to kadanna anakkana Laban muane nakua, <<Ia to kasugiranna Yakub naala jio ngasan mai kasugiranna ambeqtaq na iamo napusugih Yakub too.>> 2 Nakita too Yakub kumua teqdamo nakabassai Laban susi tonna jolona. 3 Mangkada-Mi PUANG Allataala lako Yakub Nakua, <<Polemoko lako kampongna ambeqmu sola lako kaum keluargamu. Akuq la ssolanko.>> 4 Napangpesuanmi Yakub naratu Rahel sola Lea ssitammuanni jio padang to nanii bekena sola dombana. 5 Nakuamo Yakub lako joo dua bainena, <<Kukita kumua teqdamo nakabassanaq ambeqmi susi tonna jolona, apa Puang Allataala to nasompa ambeqkuq ssisolannaq. 6 Miissen too sola dua kumua, mangkamoq silaqdaq tongan mpangjaman ambeqmi. 7 Moi nasusi joo, mangkanaq nauraga, pessangpulomi natongkai to sarokuq. Apa ia joo kagajatan napugauk Laban teqda Naeloranni Puang Allataala mparuginaq. 8 Ia tonna tee ke nakua ambeqmi, <Ia to la mupusaro beke sola domba buriqtik-riqtik,> buriqtik-riqtik ngasanmi to anak beke sola domba jaji. Ia ke nakua ambeqmi, <Ia to beke sola domba macureq-cureq iamo saromu,> macureq-cureq ngasanmi to anak beke sola domba jaji. 9 Susimi joo carana Puang Allataala mbennaq patuoanna ambeqmi.10 Ia tonna wattunna kawin to patuoan, mangtindonaq kukitai kawin to sininna beke muane macureq-cureq, buriqtik-riqtik sola kambalang. 11 Napangkadainaq malaekaq-Na Puang Allataala llan joo tindokuq nakua, <Ee Yakub!> Mebalinaq kukua, <Iyeq Puang.> 12 Mangkadami joo malaekaq nakua, <Kitai, macureq-cureq na buriqtik-riqtik sola kambalang ngasan to beke muane kawin. Jajii susi joo, sabaq kukita ngasan to napugauk Laban lako iko. 13 Akuqmo Puang Allataala to mangka mpangpekitan kale-Kuq lako iko jio Betel. Jiomo munii mpakeqdeh mesaq batu menjaji tanda pangpangngingaran mubulloii minynyak zaitun. Jio toomo munii mangtinjaq lako Akuq. Na ia too sadiamoko mupole lako kampong kajajianmu.> >>a
14 Mebalimi Rahel sola Lea lako Yakub nakua, <<Teqda toomo kamiq tawakiq la kipumanah jio mai ambeqkiq. 15 Ia tee kamiq susimorakan tomentoratu to dibaluk, ia to la kiputawa nacappuqi ngasanmi ambeqkiq. 16 Sininna to kasugiran mangka Naala Puang Allataala jio mai ambeqkiq sitonganna tawakiq sola anakkiq. Pugaukmi apa to Napangparentan Puang Allataala lako kitaq.>>
17-18 Mangpasadiami Yakub la pole lako ambeqna jio tana Kanaan. Napaendekmi deq unta to anakkana sola bainena, nabawa ngasanni to patuoanna sola sininna to napunnai, asseleqna jio tana Mesopotamia.
19 Ia joo wattu, jioi padang to Laban mukkun nggoncingngi bulu dombana. Iamo joo wattu nabokoi Rahel to tau-tau dewata pangngampa-ampa keluargana ambeqna. 20 Naakkalannii Yakub to Laban to-Aram, nateqda napauanni to kamaleanna. 21 Naala ngasanmi to sininna kasugiranna, naparri-parrii male. Llambannimi Saqdan Efrat namangnguju lako membuntunna Gilead.
Laban male nnulaq Yakub
31:22-42
22 Tallung allomira mangkanna palai Yakub, namaneq dipauan Laban kumua palaimi Yakub. 23 Nasuami Laban sirempun to keluargana muane, namale sola nnulaq Yakub. Pitung alloi namaneq ndeteq Yakub jio membuntunna Gilead. 24 Ia tonna bongi ratu-I Puang Allataala mangkada lako Laban to-Aram llan tindo Nakua, <<Ingaranni, danggiq lalo mumangkada kassaraq lako Yakub moi sangbuku kada.>> 25 Ia tonna deteqmi, mangkami Yakub mpakeqdeh tendana jao buntu. Mpakeqdeh todami tendana Laban sola keluargana jio membuntunna Gilead. 26 Mangkadami Laban lako Yakub nakua, <<Ciapari muakkalanninaq mumale mbawa anakkuq susi to toditalo llan kapararian? Ciapari mumangpanggaukan susi tuu? 27 Ciapari muakkalanninaq, mumale buni. Ia kemmulametaqda rampaq nang la kueloranko male masannang mudipakkelongan dipannonian rebana sola cuqbekan. 28 Moi la nnudungnaq anakkuq sola ampokuq teqda too mubennaq wattu. Gaja bangoqko iko. 29 Waqding bangnaq mangpanggaukan gajaq lako iko, apa Puang Allataala to nasompa ambeqmu mpangngingarannaq pubongiq llan tindokuq, Nakua, <Ingaranni, danggiq lalo mumangkada kassaraq lako Yakub, moi sangbuku kada.> 30 Kuissen kumua gaja maliqmoko la pole lako bolana tomatuammu. Apa ciapari mubokoi to tau-tau dewata pangngampa keluargakuq?>> 31 Mebalii Yakub nakua, <<Iamo nateqda kupaui kumale, sabaq malajaqnaq ke teqda taeloranni to anakkataq kusolan. 32 Ia to tau-tau dewata tasanga, ia ke denni sala mesaqkiq tanii nnampaqi, maqnamo nadipatei. Paressami jio olona keluargataq, denraka joo apantaq kiala. Ia ke denni taala bangmi.>> Teqda naissenni Yakub kumua Rahel paleq nnalai joo tau-tau dewata. 33 Malemi Laban tama tendana Yakub mparessai. Namaneq male lako tendana Lea sola tendana joo dua baine kaunan, apa teqda naampaqi to tau-tau dewata. Mangkai joo too mentamami tendana Rahel. 34 Apa ia joo tau-tau dewata naalai Rahel, napatamai kocikan lapik untana, nacumadokko jao. Naparessa ngasanmo Laban to tendana Rahel, apa teqda too naampaqi. 35 Mangkadami Rahel lako ambeqna nakua, <<Oo ambeq, danggiq takabirihnaq sabaq teqda kukeqdeh ntammuikiq, sabaq macarepanaq.>> Napemaangahhimo Laban joo tau-tau dewata, apa teqda naampaqi.
36 Gaja birihhi Yakub na siteqgeh Laban. Namangkada Yakub nakua, <<Apamora kasalankuq? Apara dosakuq taulaqnaq? 37 Mangkami taparessa to sininna tendakuq na denraka taampaq joo apantaq? Pasun ngasanni to parewakuq, panteqi nakitai keluargataq sola dua, napattantui kumua indannarikiq tongan. 38 Duangpulokiq taunna mangka torro sola. Gaja budami beke sola dombataq na teqdapa naden moi mesaq beke baine baqtu domba baine lossoq, na moi mesaq beke muane baqtu domba muane teqda bangpa kukande jukuqna. 39 Ia to patuoantaq to napatei olok-olok masiaq, teqda kubawankiq apa taqpa kusulleii. Ia to naboko allo tau baqtu naboko bongi, tuli tasuanaq ssulleii. 40 Malussunaq ke alloi, macakkeqnaq ke bongii, biasa toomoq tangmammaq. 41 Susimi joo to paqdik kuperasai tongkupangjamankiq duangpulo taunna. Sangpulo appaq taunna kunii mangjama tamaneq mbennaq joo anakkataq dua na annan poleq o taunna kunii mpangjamankiq namaneq den beke sola domba saro pangrewakuq. Pada masainna joo, den pessangpulo tanii tuli ntongkai to la kupusarona. 42 Ia ke la teqdai Natulungnaq Puang Allataala to nasompa nenekuq Ibrahim sola ambeqkuq Ishak, nang la taelorannaq pole mangpalaq loqbang. Apa Naparinawa Puang Allataala to kamaparrisankuq sola kaboqjorankuq. Susimi joo to Nanii Puang Allataala rraqtahhi tee kara-karataq pubongiq.>>
Yakub sijanji Laban
31:43-55
43 Mebalimi Laban lako Yakub nakua, <<Ia tuu bainemu dua, anakkuq, na ia to anakkana ampokuq too, na ia tuu patuoan apangkuq too. Sitonganna sininna tee apangkuq ngasan. Apa teqda kuissen to la kupugauk, na danggiq musolanni to anakkuq sola ampokuq. 44 Na ia paleq ke susii tuu tasijanjimo, tapaden tanda saqbi.>> 45 Naalami Yakub to mesaq batu napakeqdehhi, tandana kumua den nasijanji Laban.
46 Namaneq ssuai to keluargana na rrempun batu natombonni. Mangkai joo too, sirempunmi kumande siandah joo batu ditombon. 47 Nasangaii Laban joo batu ditombon <<Yegar-Sahaduta>>, apa ianna Yakub nasangairi <<Galed>>.b 48 Nakua Laban lako Yakub, <<Ia tee batu ditombon, iamo tapusaqbi sola dua.>> Iamo nadisanga Galed joo batu ditombon. 49 Nakua toopa Laban, <<PUANG Allataala ngkitakiq ke pada mabelamikiq.>> Iamo nasangai tooi Mizpa joo ngenan.c 50 Nakua omo Laban, <<Ia ke mupakario-rioi to anakkuq baqtu mupangkebainean poleqi, moi nateqda tau nnissenni, ingaranni Puang Allataala ngkitakiq. 51 Ingaranni, ia tee batu ditombon sola ia tee batu dipakeqdeh, 52 iamo tanda tapusaqbi kumua, teqda kulambulewanni ke la raturaq ssolangngiko, susi too iko teqda mulambulewanni ke la raturoko ssolangnginaq. 53 Ia to Puang Allataala nasompa nenemu Ibrahim sola Nahor ambeqkuq, la menjaji tomangraqtahtaq sola dua.>> Massumpami Yakub mpau Puang Allataala to nasompa Ishak ambeqna kumua, la naingaran tongan joo nasijanjii. 54 Nggereqmi mesaq patuoan jao joo buntu, natunui, napangkarobanni piraq, natambaii to keluargana ngkandei to jukuq piraq. Ia tonna mangka kumande mangbongipi jao joo buntu. 55 Ia tonna makaleqmo, napelambikkii Laban nnudung anakkana sola ampona, nabarakkaqii namaneq sisarak napole Laban lako kampongna.